xMonjajon lojon ti ñaxan i wʌle isujm bʌ hermanajon lojon

Felisa: Tsaʼ coliyon ti España ti jumpʼejl familia wen católicojoʼ bʌ. Yaʼ ti c familia, 13 tsaʼ ochiyob bajcheʼ cura o tsiʼ chaʼleyob eʼtel chaʼan jiñi Iglesia. Juntiquil i primo jiñi c ñaʼ jiñʌch muʼ bʌ i yʌcʼ clase ti jumpʼejl escuela católica. Cheʼ bʌ tsaʼ chʌmi, jiñi papa Juan Pablo II tsiʼ mele ti chʼujul. Wen pʼumpʼun jiñi c familia. Jiñi c tat tsiʼ chaʼle eʼtel ti jumpʼejl fábrica i jiñi c ñaʼ tsiʼ chaʼle eʼtel ti jamil. An 8 querañob, joñoñʌch jiñi chichʌl bʌ.

Cheʼ bʌ 12 c jabilel, tsaʼ tejchi guerra yaʼ ti España. Cheʼ tsaʼix ñumi, jiñi añoʼ bʌ i yeʼtel tsiʼ yotsayob ti cárcel jiñi c tat tiʼ caj chuqui miʼ yʌl chaʼan bʌ política. Wocol tsiʼ yubi c ñaʼ chaʼan miʼ yʌqʼueñon lojon i bʌl lon c ñʌcʼ. Jin chaʼan, tsiʼ choco majlel Araceli, Lauri yicʼot Ramoni ti jumpʼejl convento yaʼ ti Bilbao. Yaʼi maʼañic mi caj i yubiñob wiʼñal.

Araceli: Cheʼ bʌ tsaʼ chojquiyon lon majlel yaʼ ti convento, 14 c jabilel, Lauri 12 i Ramoni 10. Jiñi xmonjajob tsiʼ wen acʼʌyon lojon ti troñel. Cheʼ ñumeñix chaʼpʼejl jab tsaʼ chojquiyon lojon majlel ti colem bʌ convento ti Zaragoza, baqui miʼ cʌntʌntel ñoxobix bʌ. Mic sujcun lon cocina i tiʼ pejtelel ora wen lujbeñix mi lon cujtel. Mic wen ñaʼtan lojon c familia.

Felisa: Cheʼ bʌ tsaʼ majliyob ti Zaragoza, jiñi quijtsʼiñob, jiñi c ñaʼ yicʼot quichan tsiʼ chocoyoñob majlel jaʼel yaʼ ti convento. xMotomaj jiñi quichan. Tsiʼ meleyob chaʼan juntiquil chʼiton choncol bʌ i mulañon miʼ cʌy i tsajcañon. Come mij cʼuxbin Dios, wen com jax majlel yaʼ ti convento. Tiʼ pejtelel ora mic majlel ti misa yicʼot tsaʼ c ñaʼta sujtel ti misionera, lajal bajcheʼ juntiquil c primo am bʌ ti África.

Mach tijicña tsaʼ cubi cheʼ yaʼix añon ti convento come maʼañic miʼ mejlel c mel tsaʼ bʌ c ñaʼta. Jiñi monjajob maʼañic tsiʼ ñijcayob c pusicʼal c melben i yeʼtel Dios ti yambʌ país cheʼ bajcheʼ tsaʼ c ñaʼta. Cheʼ ñumeñix jumpʼejl jab, tsaʼ chaʼ sujti j cʌntan quichan ti cotot, jiñi xmotomaj bʌ. Mic mel yom bʌ melol ti otot, i ti jujumpʼejl icʼan mic mel lojon jiñi oración cʌmbil bʌ bajcheʼ rosario. Tsaʼ c wen mulaj c tojʼesan ñich teʼ tac chaʼan jiñi iglesia yicʼot c xojben i pislel jiñi imagen tac yicʼot i chaʼan jiñi yambʌ chʼujul tac bʌ i chaʼañob.

Araceli: Yom mi cʌcʼ ñuc bʌ tʼan chaʼan mic mejlel ti ochel bajcheʼ monja. Ñaxan tsaʼ c mele ti Zaragoza. Ti wiʼil jiñi xmonjajob yʌñʌlix baqui tsiʼ chocoyon lojon majlel ti jujuntiquil. Lauri tsaʼ majli yaʼ ti convento am bʌ ti Valencia, Ramoni tsaʼ cʌle yaʼ ti Zaragoza, i joñon tsaʼ chojquiyon majlel ti Madrid. Yaʼi tsaʼ c chaʼ acʼʌ c tʼan chaʼan mi cochel bajcheʼ monja. Ti jiñi convento miʼ cʌytʌl cabʌl xqʼueljuñob yicʼot añobix bʌ i jabilel, i cabʌl troñel. Tsaʼ c chaʼle troñel ti jumpʼejl hospital yaʼ ti convento.

Cheʼ maxto ochemoñic bajcheʼ monja, tsaʼ c ñaʼta chaʼan mi caj c wen pejcan Biblia. Pero mach cheʼic tsaʼ ujti. Maʼañic mi lon c pejcan Biblia mi jiñic to mi cʌl lojon chaʼan bʌ Dios o Jesús. Tsaʼ c tsʼitaʼ cʌñʌ latín, tsaʼ j cʌñʌ chaʼan jiñi chʼujul bʌ miʼ qʼuejlelob ti católicojob yicʼot tsaʼ c chʼujutesa María. Pero ñumen tsaʼ c chaʼle eʼtel.

Mach tijicña tsaʼ caji cubin c bʌ. Tsaʼ caji c ñaʼtan chaʼan yom mic ñumen sʌclan taqʼuin chaʼan mij coltan c familia i mach troñelic yaʼ ti convento baqui yambʌ majqui miʼ pʼojlel i taqʼuin. Cheʼ jiñi, tsaʼ c pejca jiñi am bʌ tiʼ wenta xmonjajob, tsaʼ c sube chaʼan comix loqʼuel. Chaʼan mij cʌy c ñaʼtan jiñi, tsiʼ juc ñupʼuyon.

Jiñi xmonjajob tsiʼ yʌcʼʌyoñob loqʼuel, pero tsiʼ chaʼ ñupʼuyoñob cheʼ bʌ tsiʼ qʼueleyob chaʼan chʌn comʌch sujtel. Uxyajl tsiʼ meleyob. Cheʼ jiñi, tiʼ subeyoñob chaʼan cojach mi caj c loqʼuel miʼ mucʼʌch c tsʼijbun iliyi: «Mic majlel chaʼan com c melben i yeʼtel Satanás i mach jiñic Dios». Toj sajtel c pusicʼal. Anquese comʌch sujtel, maʼañic tsaʼ c tsʼijbu jiñi. Tsaʼ j cʼajti chaʼan mic majlel c sub c bʌ tiʼ tojlel juntiquil cura. Tsaʼ c luʼ sube, i tsaʼ mejli i locʼsan jumpʼejl permiso tiʼ tojlel jiñi obispo chaʼan mic chaʼ sujtel majlel yaʼ ti convento ti Zaragoza. Tsaʼ to jumucʼ ajñiyon yaʼi jinto tsaʼ ajqʼuiyon sujtel. Mach cabʌlic ora tsaʼ ñumi, Lauri yicʼot Ramoni tsiʼ cʌyʌyob jaʼel jiñi convento.

JUMPʼEJL LIBRO TSIʼ TʼOXOYON LOJON

Felisa: Tsaʼ ñujpuñiyon i tsaʼ majliyon ti chumtʌl ti jumpʼejl tejclum i cʼabaʼ Cantabria yaʼ ti España. Ti jujumpʼejl semana tsaʼ chʌn majliyon ti misa. Ti jumpʼejl domingo, jiñi cura tsiʼ locʼsa jiñi libro La verdad que lleva a vida eterna. Wen michʼ tsiʼ subeyon lojon chaʼan mi an lon c chaʼan jiñi libro, mi cʌqʼuen lojon o mic choc lon ti basura.

Maʼañic c chaʼan jiñi libro, pero tsaʼ c mulaj jumpʼejl. Ti chaʼpʼejl uxpʼejl jach qʼuin, tsaʼ cʼoti ti cotot chaʼtiquil xʼixic Testigojoʼ bʌ i tsiʼ yʌqʼueyoñob jiñi libro. Ti jiñi jach bʌ acʼʌlel tsaʼ c pejca. Cheʼ bʌ tsaʼ chaʼ cʼotiyob ti julaʼ, tsiʼ subeyoñob jumpʼejl estudio loqʼuem bʌ ti Biblia, i tsaʼʌch c jacʼʌ.

Tiʼ pejtelel ora tsaʼ c mulaj cʌn Dios. Cheʼ bʌ tsaʼ j cʌñʌ i sujmlel chaʼan Jehová, tsaʼ caji j cʼuxbin. Tsaʼ c mulaj c suben tiʼ pejtelel quixtañu. Tsaʼ c chaʼle chʼʌmjaʼ ti 1973. Cheʼ bʌ mic mejlel, mic subeñob c familia chaʼan jiñi wen tʼan. Pero tsiʼ subeyoñob chaʼan mach isujmic, ñumento jiñi quijtsʼin Araceli.

Araceli: Mach tijicñayoñic chaʼan c ñopbal yicʼot tsiʼ wen michʼesayon come tsaʼ wen ticʼlʌntiyon yaʼ ti convento. Pero maʼañic tsaʼ j cʌyʌ majlel ti misa cheʼ ti domingo yicʼot ti jujumpʼejl qʼuin mi cʌl jiñi oración chaʼan rosario. Com c chʼʌmben isujm muʼ bʌ i yʌl jiñi Biblia, jin chaʼan mij cʼajtiben i coltaya Dios. Jumpʼejl bʌ qʼuin, Felisa tsiʼ subeyon chuqui woliʼ cʌn. Pero joñon maʼañic mic mulan. Felisa wen tijicña tsaʼ j qʼuele i tsaʼ c ñaʼta chaʼan tsaʼix i wen mulaj.

Ti wiʼil tsaʼ chaʼ sujtiyon majlel ti troñel ti Madrid. Yaʼʌch tsaʼ ñujpuñiyon. Tsaʼ cʼoti j qʼuel chaʼan jiñi quixtañujob tiʼ pejtelel bʌ ora miʼ majlelob ti iglesia maʼañic miʼ chumtañob cheʼ bajcheʼ tsiʼ pʌsʌ Jesús. Jin chaʼan tsaʼ j cʌyʌ majlel ti iglesia i maʼañix tsaʼ caji c sub c bʌ ti jiñi cura. Tsaʼ j cʌyʌ c ñop jiñi chʼujul tac bʌ i chaʼañob yicʼot jiñi toj mulil ti cʼajc. Tsaʼ c choco tiʼ pejtelel imagen tac am bʌ c chaʼan. Anquese mach cujilic mi weñʌch woli bʌ c mel, tsaʼ c mele come tsiʼ yʌqʼueyon c chʼijiyemlel c ñopbal. Tsaʼ c sube Dios: «¡Coltañon! Com j cʌñet». Cʼajal c chaʼan cheʼ bʌ wen tsajñiyob ti cotot jiñi i testigojob Jehová, pero maʼañic tsaʼ cotsayob. Maʼañix wem bʌ ñopbalʌl chaʼañon.

Lauri chumul ti Francia, i jiñi Ramoni ti España. Lʌcʼʌl ti 1980 tsaʼ cajiyob ti estudio yicʼot i testigojob Jehová. Tsaʼ c ñaʼta chaʼan cheʼ añob bajcheʼ Felisa, i woli jach i lotintelob. Ti wiʼil tsaʼ sujti ti camiga juntiquil i testigo Jehová yaʼ bʌ chumul tic tʼejl, i cʼabaʼ Angelines. Angelines yicʼot i ñoxiʼal mach junsujtel jach tsiʼ subeyoñob mi com j cʌn chaʼan jiñi Biblia. Tsaʼ c subeyob chaʼan mach comic. Pero tsiʼ qʼueleyob chaʼan mucʼʌch c mulan j cʌn chaʼan jiñi Biblia. Ti jumpʼejl bʌ qʼuin tsaʼ c subeyob chaʼan mucʼʌch, pero mi jiñʌch mij cʼʌn lojon jiñi c Biblia, i cʼabaʼ Nácar-Colunga.

JIÑI BIBLIA TSIʼ TEMPAYON LOJON

Felisa: Cheʼ bʌ tsaʼ c chʼʌmʌjaʼ ti 1973, an cheʼ bʌ 70 Testigojob yaʼ ti Santander, i capital Cantabria. Cabʌl alʌ tejclum yaʼi. Chaʼan mic suben lojon jiñi wen tʼan tiʼ pejtelel jiñi quixtañujob, mic chaʼlen lon ñajt bʌ xʌmbal ti autobús. Ti wiʼil tsaʼ caji c mel lon ti alʌ carro tac.

Ti ili jabil ñumen bʌ, cabʌl cʌntesʌbil c chaʼañob ti Biblia. Yonlel católicojob, 11 tsiʼ chaʼleyob chʼʌmjaʼ. Tsaʼ c wen pʌsʌ c pijt. Mach orajic mi caj i cʌñob chaʼan mach isujmic jiñi ñopol bʌ i chaʼañob, cheʼ bajcheʼ tsaʼ ujti tic tojlel. Cujil chaʼan cojach jiñi Biblia yicʼot jiñi chʼujul bʌ espíritu miʼ mejlel i coltan i qʼuextan i melbal juntiquil yicʼot miʼ cʌn i sujmlel (Hebreos 4:12). Jiñi c ñoxiʼal tsiʼ chaʼle troñel ti policía, i tsaʼ cʼoti ti chʼʌmjaʼ ti 1979. Cheʼ bʌ mach jalix mi caji i chʌmel jiñi c ñaʼ, tsaʼ caji ti estudio loqʼuem bʌ ti Biblia.

Araceli: Cheʼ bʌ tsaʼ cajiyon ti estudio yicʼot i testigojob Jehová, maʼañic mic wen ñop chuqui miʼ yʌlob. Pero cheʼ tsaʼ j qʼuele chaʼan mucʼʌch i melob chuqui miʼ subob, mach cheʼix tsaʼ caji cubin. Jiñi c ñopoñel ti Jehová yicʼot ti Biblia tsaʼ ñumen pʼʌtʼa yicʼot wen tijicñayon. Jiñi chumuloʼ bʌ tic tʼejl tsiʼ qʼueleyob chaʼan tsaʼ caji j qʼuextan c bʌ, tsiʼ subeyoñob: «Araceli, mach a cʌy jiñi bij tsaʼ bʌ a yajca».

Cʼajal c chaʼan cheʼ bʌ mic suben Jehová: «Wocolix a wʌlʌ chaʼan maʼañic tsaʼ cʌyʌyon yicʼot cheʼ tsaʼ wʌqʼueyon c taj woli bʌ c sʌclan: Jiñi i sujmlel am bʌ ti Biblia». Cheʼ jaʼel, tsaʼ c sube chaʼan miʼ ñusʌbeñon tsaʼ bʌ c sube tac Felisa. Cʼʌlʌl cheʼ jiñi maʼañix mi lon c chaʼlen leto, tijicñayix mij cʌl lojon chaʼan bʌ jiñi Biblia. Tsaʼ c chʼʌmʌ jaʼ ti 1989, cheʼ bʌ añix 61 c jabilel.

Felisa: Añix 91 c jabilel yicʼot c bajñel jax. Maʼañix mic wen mejlel ti subtʼan bajcheʼ ti ñaxan, pero muʼto c pejcan Biblia ti jujumpʼejl qʼuin. Mic majlel ti tempa bʌ yicʼot ti subtʼan cheʼ mucʼʌch c mejlel.

Araceli: Mic mulan c suben i chaʼan bʌ Jehová jiñi curajob yicʼot xmonjajob, tajol chaʼan monjajon ti wajali. An c tajayob wem bʌ miʼ chaʼleñob tʼan yicʼoton. Cabʌl an i chʼʌmʌyob libro yicʼot revista tac. Cʼajal c chaʼan cheʼ bʌ tsaʼ c wen chaʼle tʼan yicʼot juntiquil cura. Jumpʼejl bʌ qʼuin tsiʼ subeyon chaʼan cheʼʌch miʼ ñaʼtan jaʼel. Pero tsiʼ yʌlʌ: «¿Baqui to mic majlel cheʼ ñoxoñix? ¿Chuqui mi caj i yʌlob jiñi quixtañu yicʼot c familia?». Tsaʼ c sube: «¿I chuqui miʼ yʌl Dios?». Tsiʼ yubi i chʼijiyemlel cheʼ bʌ tsiʼ ñaʼta chaʼan isujm woli bʌ cʌl. Pero tajol miʼ bʌcʼñan i qʼuextan i bʌ.

Maʼañic mi caj i ñajʌyel c chaʼan cheʼ bʌ tsiʼ subeyon c ñoxiʼal chaʼan yom majlel tiʼ Yotlel Tempa bʌ. Ñumeñix 80 i jabilel cheʼ bʌ ñaxan tsajñi ti tempa bʌ, i maʼañic baqui ora tsiʼ cʌyʌ. Tsaʼ caji ti estudio i tsaʼ caji ti subtʼan. Cabʌl maʼañic bʌ miʼ ñajʌyel c chaʼan cheʼ bʌ temel tsaʼ c chaʼle lon subtʼan. An jaxto chaʼpʼejl uw i chaʼle chʼʌmjaʼ cheʼ bʌ tsaʼ chʌmi.

Felisa: Cheʼ bʌ tsaʼ caji c melben i yeʼtel Jehová, jiñi quijtsʼiñob maʼañic tsiʼ mulayob. Pero ti wiʼil tsaʼ sujtiyob tiʼ testigo Jehová jeʼel. Tiʼ sujm, jiñʌch ñumen wem bʌ ujtem tic tojlel. Muqʼuix c mejlel lojon ti tem ajñel yicʼot mi lon cʌl chaʼan bʌ Dios yicʼot i Tʼan, jiñi Biblia. Temelix mic chʼujutesan lojon Jehová.a