Jiñi xpejcaya juñob miʼ cʼajtibeñob i bʌ

Ezequiel tsiʼ qʼuele tiʼ ñajal juntiquil wiñic am bʌ i pluma yicʼot tinta, i yambʌ 6 wiñicob añoʼ bʌ i yespada. ¿Majquiyob iliyi?

Jiñobʌch jiñi ángelob tsaʼ bʌ i chʼʌmʌyob tiʼ wenta chaʼan miʼ jisʌntel Jerusalén yicʼot muʼ bʌ caj i yotsañob i bʌ cheʼ miʼ jisʌntel i pañimil (mulawil) Satanás yaʼ ti Armagedón. Ili jiñʌch lac tsijib tsictesʌbentel. ¿Chucoch yom miʼ qʼuextʌyel bajcheʼ tsaʼ ñaxan tsictesʌnti?

Cheʼ bʌ anto yom miʼ cʼotel jiñi jabil 607 cheʼ bʌ maxto tilemic Cristo, Jehová tsiʼ wʌn pʌsbe Ezequiel muʼ bʌ i cajel ti ujtel ti Jerusalén. Yaʼ tiʼ ñajal tsiʼ qʼuele chaʼan mach wentaquic woli (choncol) bʌ i melob yaʼ ti tejclum. Ti wiʼil tsiʼ qʼuele 6 wiñicob añoʼ bʌ ‹i yespada tiʼ cʼʌb chaʼan miʼ chaʼleñob tsʌnsa›. Yicʼot tsiʼ qʼuele juntiquil wiñic lino bʌ i pislel am bʌ i chaʼan «pluma yicʼot tinta tiʼ cajchiñʌcʼ» (Ezequiel 8:6-12; 9:2, 3). Jehová tsiʼ sube jiñi wiñic: «Yom maʼ ñumel tiʼ yojlil Jerusalén chaʼan maʼ wʌqʼueñob i marcajlel yaʼ tiʼ pam jini winicob muʼ bʌ i chaʼleñob uqʼuel yicʼot tsic pusicʼal chaʼan i jontolil i piʼʌlob». Jiñi 6 wiñicob tsaʼ subentiyob i tsʌnsan tiʼ pejtelel maʼañobic bʌ i marcajlel (Ezequiel 9:4-7). ¿Chuqui mi laj cʌn joñonla? ¿Majqui jiñi wiñic am bʌ i pluma yicʼot tinta?

Ili tsiʼ yʌlʌ Ezequiel cheʼ ti 612 cheʼ bʌ maxto tilemic Cristo. Tsaʼ ñaxan tsʼʌctiyi cheʼ an jaxto joʼpʼejl jab i yʌjlel, cheʼ bʌ jiñi Babiloniojob tsiʼ jisayob Jerusalén. Cheʼ bajcheʼ iliyi, Dios tsiʼ cʼʌñʌ jiñi babiloniojob chaʼan miʼ yʌqʼuen i toj i ñusatʼan i tejclum (Jeremías 25:9, 15-18). Pero ¿chuqui tsiʼ chaʼle jiñi xucʼul bʌ judíojob tsaʼ bʌ i tajayob i chʼijiyemlel tiʼ caj mach bʌ utsʼatic woli (yʌquel) i yujtel ti Jerusalén? Jehová tsiʼ coltayob.

Ti jiñi ñajal, Ezequiel maʼañic majqui tsiʼ yʌqʼue i marcajlel mi tsaʼic i yotsa i bʌ tiʼ jisʌntel Jerusalén. Jiñobʌch tsiʼ chʼʌmʌyob tiʼ wenta jiñi ángelob. Ili profecía miʼ yʌqʼueñonla lac ñaʼtan chuqui tsaʼ ujti yaʼ ti panchan. Jehová tsiʼ sube i yángelob chaʼan miʼ chʼʌmob tiʼ wenta miʼ jisʌntel jiñi xñusatʼañob i miʼ qʼuelob chaʼan cojach cuxul miʼ cʌytʌl jiñi xucʼuloʼ bʌ.a

Ili profecía an yambʌ bajcheʼ miʼ tsʼʌctiyel. ¿Bajcheʼ yicʼot jala? Jiñi lac jun tac ñaxan tiʼ tsictesa chaʼan jiñi wiñic am bʌ i pluma yicʼot i tinta jiñobʌch jiñi bombiloʼ bʌ (yajcʌbiloʼ bʌ) ti espíritu cʌylemob to bʌ wʌʼ ti Pañimil. Cheʼ jaʼel, chaʼan majqui jach miʼ jacʼob jiñi wen tʼan muʼ bʌ lac tsictesʌbeñob jiñʌch muʼ bʌ i chʼʌmob i marcajlel chaʼañob i cuxtʌlel. Pero tsaʼix laj qʼuele chaʼan ili tsictesʌntel yom miʼ qʼuextʌyel. ¿Chucoch? Come maxto wen jalic tsaʼ laj qʼuele muʼ bʌ i yʌl ti Mateo 25:31-33 i tsaʼ laj cʌñʌ chaʼan jiñʌch Jesús muʼ bʌ i cajel ti meloñel ti talto bʌ qʼuin, cheʼ tiʼ yorajlel jiñi ñuc bʌ wocol. Ti jiñi bʌ ora, mi caj i qʼuel majqui lajal bajcheʼ tiñʌmeʼ yicʼot majqui lajal bajcheʼ chivo. Cuxul mi caj i yajñel jiñi lajaloʼ bʌ bajcheʼ tiñʌmeʼ, pero jiñi lajaloʼ bʌ bajcheʼ chivo mi caj i jisʌntelob.

Cheʼ jiñi, ¿chuqui mi laj cʌn tiʼ ñajal Ezequiel? Laʼ laj qʼuel joʼchajp:

1. Cheʼ maxto jisʌnti Jerusalén, Jehová tsiʼ cʼʌñʌ Ezequiel, Isaías yicʼot Jeremías chaʼan miʼ tsictesañob chuqui mi caj i chaʼlen jiñi tejclum. Ili ora, chaʼan miʼ cʌntesan i wiñicob yicʼot miʼ wʌn tsictesʌbentel wiñicob xʼixicob (quixtañujob) cheʼ maxto tejchi jiñi ñuc bʌ wocol, Jehová miʼ cʼʌn alʌ junmojt yajcʌbiloʼ bʌ ti espíritu. Jiñi «añoʼ bʌ tiʼ yotot» Cristo, yom i yʌl, tiʼ pejtelel i wiñicob Dios, woliʼ tsictesʌbeñob jaʼel jiñi wiñicob xʼixicob (Mateo 24:45-47).

2. Ezequiel maʼañic tsiʼ yʌqʼue i marcajlel jiñi cuxul bʌ tsaʼ cʌyleyob. Jiñi i wiñicob Dios ili ora maʼañic miʼ yʌqʼuen i marcajlel jiñi quixtañujob. Cojach miʼ chaʼleñob subtʼan yicʼot miʼ wʌn subeñob chuqui miʼ caj ti ujtel ti talto bʌ qʼuin. Yicʼot i coltaya jiñi ángelob miʼ mejlel jiñi subtʼan tiʼ pejtelel pañimil (Apocalipsis 14:6).

3. Jiñi cuxul bʌ tsaʼ cʌyleyob tiʼ yorajlel Ezequiel, maʼañic tsaʼ yoque aqʼuentiyob i marcajlel tiʼ pam. Ili ora, maʼañic mi caj i yʌqʼuentelob i marcajlel tiʼ pam jiñi cuxul bʌ mi caj i ñumelob ti jiñi ñuc bʌ wocol. ¿Chuqui yom miʼ melob jiñi cuxul bʌ yomob cʌytʌl? Yom miʼ tsajcañob cheʼ bajcheʼ tsiʼ mele Cristo, miʼ yʌcʼob i bʌ ti Dios yicʼot miʼ subob jiñi wen tʼan chaʼan miʼ coltañob i yermañojob Cristo (Mateo 25:35-40). Jiñi quixtañujob mi caj i yʌqʼuentelob i marcajlel cheʼ tiʼ yorajlel jiñi ñuc bʌ wocol, yom i yʌl, mi caj i yajcʌntelob chaʼan cuxul miʼ cʌytʌlob.

4. Jiñi wiñic am bʌ i pluma yicʼot i tinta jiñʌch Jesús. Jiñʌch muʼ bʌ caj i yʌqʼuen i marcajlel jiñi yonlel wiñicob xʼixicob cheʼ bʌ miʼ cajel ti meloñel i miʼ yajcan majqui lajaloʼ bʌ bajcheʼ tiñʌmeʼ. Cheʼ jiñi, mi caj i mejlelob ti chumtʌl tiʼ pejtelel ora wʌʼ ti Pañimil (Mateo 25:34, 46).b

5. Ili ora, jiñi 6 wiñicob añoʼ bʌ i yespada jiñobʌch yom i yʌl jiñi ángelob añoʼ bʌ tiʼ wenta Jesús. Lʌcʼʌlix mi caj i jisañob jiñi tejclum tac yicʼot tiʼ pejtelel jontolil (Ezequiel 10:2, 6, 7; Apocalipsis 19:11-21).

Ili joʼchajp tsaʼ bʌ laj cʌñʌ miʼ coltañonla laj cʌcʼ ti ñuc chaʼan Jehová cuxul mi caj i cʌy jiñi xucʼul bʌ i wiñicob cheʼ bʌ miʼ jisʌntel jiñi jontoloʼ bʌ (2 Pedro 2:9; 3:9). Yicʼot miʼ cʼajtesʌbeñonla chaʼan wʌle ora wen ñuc i cʼʌjñibal jiñi subtʼan. Cheʼ maxto tilemic i jilibal, tiʼ pejtelel quixtañu yom miʼ yubiñob jiñi tʼan (Mateo 24:14).