Tiʼ melol chuqui utsʼat ñumen ñuc to bajcheʼ utsʼatax bʌ xajlel tac

Haykanush chumul yicʼot i ñoxiʼal ti Armenia. Tiʼ chaʼticlelob xsubtʼañob maxto bʌ i chaʼleyob chʼʌmjaʼ. Ti jumpʼejl bʌ qʼuin, Haykanush tsiʼ loto jumpʼejl pasaporte yaʼ tiʼ tʼejl i yotot, jiñi pasaporte jiñʌch jumpʼejl jun muʼ bʌ i cʼʌñob ti ñumel ti yambʌ país. Tiʼ mal jiñi jun an tarjeta tac chaʼan banco yicʼot cabʌl taqʼuin. Cheʼ bʌ tsiʼ loto jiñi, tsiʼ sube i ñoxiʼal.

Mach wen añobic i taqʼuin ti jiñi bʌ ora yicʼot añob i bet. Pero tsiʼ sʌclʌbeyob i yum jiñi tsaʼ bʌ i lotoyob, i maʼañic tsiʼ chʼʌmʌyob jiñi taqʼuin. Toj sajtel i pusicʼal i yum jiñi taqʼuin i cheʼ jaʼel jiñi i familia cheʼ bʌ tsaʼ chaʼ cʼotiyob ti sutqʼuibentel. Haykanush yicʼot i ñoxiʼal tsiʼ yʌlʌyob chaʼan cʌmbil i chaʼañob i melol chuqui utsʼat come woli (choncol) i cʌntesʌntelob chaʼan Biblia. Tiʼ tsictesʌbeyob bajcheʼ yilal jiñi i testigojob Jehová yicʼot tsiʼ cʌybeyob jun tac loqʼuem bʌ ti Biblia.

Jiñi familia tsiʼ ñopo i yʌqʼueñob taqʼuin, pero Haykanush maʼañic tsiʼ chʼʌmʌ. Cheʼ ti yijcʼʌlal, i yijñam jiñi wiñic tsaʼ chaʼ majli i julaʼtan Haykanush yicʼot i ñoxiʼal. Chaʼan Haykanush miʼ qʼuel chaʼan mucʼʌch i wen aqʼuentelob wocolix i yʌlʌ, jiñi xʼixic tsiʼ wersa sube i chʼʌm jumpʼejl anillo am bʌ i chaʼan wen utsʼatax bʌ xajlel.

Lajal bajcheʼ ili familia, cabʌlob tajol toj sajtelob i pusicʼal chaʼan chuqui utsʼat bʌ tsiʼ meleyob Haykanush yicʼot i ñoxiʼal. Pero ¿muʼ ba i toj sajtel i pusicʼal Jehová? ¿Bajcheʼ miʼ qʼuel Jehová ili tsaʼ bʌ i meleyob? ¿Anto ba i wenlel cheʼ tsiʼ meleyob chuqui utsʼat?

MELBALɅL TAC ÑUMEN ÑUC BɅ I CʼɅJÑIBAL

Mach wocolic i jacʼbal jiñi cʼajtiya tac. ¿Chucoch? Come jiñi i wiñicob Dios yujilob chaʼan ñumen ñuc i cʼʌjñibal cheʼ miʼ lajibentel i melbal Jehová ñumen bajcheʼ jiñi oro o yan tac bʌ xajlel wen utsʼatax bʌ. Jehová an chuqui wen ñuc miʼ qʼuel mach bʌ cheʼic tiʼ wut quixtañujob (Isaías 55:8, 9). Miʼ wen qʼuel ti ñuc cheʼ jiñi i wiñicob miʼ chaʼleñob wersa i lajibeñob i melbal.

Jumpʼejl ejemplo, jiñi Biblia an chuqui miʼ yʌl chaʼan cheʼ mi laj cʼʌn lac ñaʼtʌbal yicʼot miʼ cʼotel lac chʼʌmben isujm, ti Proverbios 3:13-15 miʼ yʌl: «Tijicña muʼ bʌ i taj wen bʌ i ñaʼtʌbal chaʼan miʼ chʼʌmben isujm. Come ñumen an i cʼʌjñibal wen bʌ lac ñaʼtʌbal bajcheʼ plata, ñumen i cʼʌjñibal bajcheʼ wen fino bʌ oro. Ñumen i cʼʌjñibal wen bʌ lac ñaʼtʌbal bajcheʼ letsem tac bʌ i tojol xajlel. Maʼanic yambʌ lac wenlel lajal bʌ i cʼʌjñibal». Tsiquil chaʼan iliyi jiñʌch wen ñuc bʌ miʼ qʼuel Jehová, i mach jiñic chubʌʼañʌl tac.

¿Ixcu cheʼ mi lac mel chuqui utsʼat?

Jehová miʼ mel chuqui utsʼat jaʼel. Jiñi Biblia miʼ yʌl chaʼan ‹mach yujilic lot› (Tito 1:2). Tsiʼ yʌcʼʌ chaʼan jiñi apóstol Pablo miʼ tsʼijbuben junmojt quixtañujob ili tʼan: «Yom mi laʼ tajon lojon ti oración. Cujil lojon maʼanic c mul lojon ti laʼ tojlel. Come tiʼ pejtelel lojon c pusicʼal com c mel lojon chuqui utsʼat» (Hebreos 13:18).

Jesucristo tsiʼ pʌsʌ bajcheʼ miʼ mejlel lac mel. Ti jumpʼejl bʌ qʼuin, jiñi ñuc bʌ motomaj Caifás tsiʼ sube: «Mic subeñet tiʼ cʼabaʼ jini cuxul bʌ Dios chaʼan maʼ subeñon lojon mi Cristojet. Subeñon lojon mi i Yalobilet Dios». Jesús maʼañic tsiʼ mucu mi jiñʌch jiñi Cristo o Mesías. Anquese yujil chaʼan miʼ mejlel ti jopʼbentel i mul i chaʼan miʼ mejlel ti tsʌnsʌntel, tsiʼ chaʼle tʼan ti isujm ti jiñi ñuc bʌ melobʌjʌl i chaʼan judíojob (Mateo 26:63-67).

¿Ixcu joñonla? ¿Chuqui mi caj lac mel mi jumpʼejl bʌ qʼuin yom mi lac chaʼlen lot o mach tsʼʌcʌlic mi la cʌl i sujmlel chaʼan mi lac locʼsʌben i wenlel? ¿Mucʼʌch ba caj lac muc i sujmlel?

¿CHUCOCH WEN WOCOL TIʼ MELOL CHUQUI UTSʼAT?

Ti ili cojix bʌ qʼuin, cabʌl i bajñel jach bʌ miʼ cʼuxbiñob i bʌ yicʼot miʼ cʼuxbiñob taqʼuin, i wocolʌch tiʼ melol chuqui utsʼat (2 Timoteo 3:2). Cheʼ bʌ maʼañic taqʼuin o wocol ti tajol jumpʼejl eʼtel (troñel), cabʌl miʼ techob xujchʼ o miʼ melob mach bʌ utsʼatic. Iliyi wen cʌmbilix i jin chaʼan cabʌl majqui miʼ ñaʼtan chaʼan cheʼ jach miʼ mejlel lac taj chuqui la com. An xñoptʼañob jaʼel cheʼ to bʌ cʼotem i melob bajcheʼ iliyi. Tiʼ caj jiñi, mach utsʼatix miʼ qʼuejlelob ti congregación (1 Timoteo 3:8; Tito 1:7).

Pero cabʌl xñoptʼañob lajal miʼ melob bajcheʼ Jesús yicʼot utsʼat chuqui miʼ melob. Yujilob chaʼan ñumen wen cheʼ miʼ lajiñob bajcheʼ yilal i melbal Dios i mach jiñic i tajol taqʼuin o bajñel i wenlelob. Jin chaʼan, jiñi xñoptʼañob añob to bʌ ti escuela maʼañic miʼ chaʼleñob lot cheʼ miʼ melob i tarea (Proverbios 20:23). Anquese mach yom i yʌl chaʼan tiʼ pejtelel ora an chuqui wem bʌ mi caj lac taj bajcheʼ Haykanush cheʼ mi lac mel chuqui utsʼat. Pero utsʼatʌch miʼ qʼuelonla Dios. Sʌc miʼ yajñel laj conciencia, i jiñʌch wen ñuc bʌ i cʼʌjñibal.

Jiñi ejemplo i chaʼan Gagik miʼ pʌs chaʼan ñumen weñʌch cheʼ mi lac mel chuqui utsʼat. Cheʼ maxto Testigojic, miʼ yʌl chaʼan tsiʼ chaʼle eʼtel ti jumpʼejl colem compañía. I yum jiñi compañía mach tsʼʌcʌlic miʼ sub bajcheʼ cʼamel miʼ tajob taqʼuin, i cheʼ jiñi mach oñic miʼ chaʼlen tojoñel ti xʼeʼtelob. Come Gagik jiñʌch muʼ bʌ i qʼuel jiñi eʼtel, an tiʼ wenta chaʼan miʼ mucu aqʼuen taqʼuin jiñi xʼeʼtelob ti yumʌl, i cheʼ jiñi maʼañic chuqui miʼ subentelob. Tiʼ caj jiñi, Gagik mach utsʼatic bajcheʼ tsaʼ caji ti cʌjñel. Pero tsaʼ cʼoti i cʌn i sujmlel am bʌ ti Biblia i maʼañic tsaʼ chʌn caji ti lot anquese wen letsem miʼ tojtʌl. Jin chaʼan tsiʼ ñaʼta i bajñel mel i yeʼtel. Tiʼ tejchibal tsiʼ chucu ti jun jiñi empresa woli (yʌquel) bʌ i jam yicʼot tsiʼ yʌcʼʌ tiʼ pejtelel jiñi tojoñel muʼ bʌ i cʼajtintel (2 Corintios 8:21).

Cheʼ jaʼel, Gagik miʼ yʌl chaʼan wocol tsiʼ yubi chaʼan miʼ mʌcʼlan i familia come tsʼitaʼ jax tsaʼ caji i taj taqʼuin. Pero tijicña miʼ yubin i bʌ yicʼot sʌc i conciencia tiʼ tojlel Jehová. Utsʼat chuqui woliʼ cʌntesʌben jiñi chaʼtiquil i yalobilob yicʼot an i yeʼtel ti congregación. Cheʼ jaʼel, wen bajcheʼ miʼ qʼuejlel ti yumʌlob yicʼot tiʼ wiñicob ti eʼtel come cʌmbil chaʼan miʼ mel chuqui utsʼat.

JEHOVÁ MIʼ COLTAÑONLA

Jehová miʼ cʼuxbin jiñi muʼ bʌ i lajibeñob i melbal, bajcheʼ tiʼ melol chuqui utsʼat (Tito 2:10). Miʼ yʌcʼ i tʼan chaʼan mi mucʼʌch lac lajiben i melbal mi caj i coltañonla. Anquese ñoxix jiñi rey David, Jehová tsiʼ yʌqʼue i tsʼijbun chaʼan maʼañic baʼ ora tsiʼ qʼuele chaʼan i bajñel jax juntiquil xucʼul bʌ tiʼ tojlel Dios mi jiñic i yalobilob ñusʌbil bʌ i chaʼañob wiʼñal (Salmo 37:25).

Jumpʼejl ejemplo chaʼan iliyi jiñʌch Rut. Xucʼul bʌ xʼixic maʼañic bʌ tsiʼ cʌyʌ i suegra. Tsaʼ majli i piʼlen ti chumtʌl ti Israel, yaʼ baqui miʼ mejlel i chʼujutesan jiñi isujm bʌ Dios (Rut 1:16, 17). Utsʼat bajcheʼ tsiʼ mele cheʼ tsiʼ chaʼle tsʌts bʌ eʼtel yaʼ ti jamil muʼ bʌ i cʌybentel pʼumpʼuñoʼ bʌ, cheʼ bajcheʼ tsʼijbubil tiʼ Mandar Moisés. Jehová tsiʼ cʌnta Rut yicʼot i suegra tiʼ pejtelel ora, cheʼʌch bajcheʼ tsiʼ mele tiʼ tojlel David (Rut 2:2-18). Pero Dios mach cojach tsiʼ cʌnta yicʼot tsiʼ yʌqʼue chuqui to yom i chaʼan Rut. Tsiʼ yʌcʼʌ chaʼan jiñi rey David yicʼot jiñi Mesías miʼ tilel tiʼ pʼolbal (Rut 4:13-17; Mateo 1:5, 16).

Ili ora, cabʌl i wiñicob Dios wocol miʼ yubiñob tiʼ tajol taqʼuin chaʼan chuqui to yom i chaʼañob. Pero maʼañic miʼ melob mach bʌ utsʼatic chaʼan miʼ loqʼuelob ti wocol. Miʼ chaʼleñob wersa chaʼan wem bʌ xʼeʼtelob. Cheʼʌch miʼ pʌsob chaʼan ñumen ñuc bʌ i cʼʌjñibal jiñʌch i melol chuqui utsʼat, jumpʼejlʌch bʌ i melbal Dios, i mach jiñic chubʌʼañʌl tac (Proverbios 12:24; Efesios 4:28).

Tiʼ pejtelel pañimil (mulawil), jiñi xñoptʼañob miʼ sajcʌbeñob i melbal Rut yicʼot miʼ pʌsob chaʼan jiñʌch Jehová miʼ cʌntañob. Miʼ yʌcʼob ti ñuc ili muʼ bʌ i yʌl Jehová: «Maʼanic mi caj a cʌytʌl ti mebaʼ. Maʼanic mi caj j cʌyet» (Hebreos 13:5). Mach junsujtel jach an i pʌsʌ Jehová chaʼan mucʼʌch i coltan tiʼ pejtelel majqui miʼ mel chuqui utsʼat. An i tsʼʌctesa i tʼan chaʼan tiʼ pejtelel ora miʼ yʌqʼuen i wiñicob chuqui i cʼʌjñibal i chaʼañob (Mateo 6:33).

Jiñi quixtañujob miʼ wen qʼuelob ti ñuc jiñi utsʼatax bʌ xajlel tac yicʼot chubʌʼañʌl tac. Pero jiñi lac Tat am bʌ ti panchan miʼ wen qʼuel ti ñuc cheʼ mi lac mel chuqui utsʼat, ñumento bajcheʼ utsʼat bʌ xajlel tac.