¿Muʼ ba lac chʼʌmben isujm chaʼan yom mi laj cʌntesan yambʌlob?

1, 2. ¿Chucoch yom mi laj coltañob i taj i yeʼtel ti congregación jiñi yambʌlob?

JESÚS tsiʼ chaʼle wersa i sub jiñi wen tʼan chaʼan bʌ Yumʌntel. Pero tsiʼ wen aqʼue i yorajlel i cʌntesan jaʼel jiñi xcʌntʼañob i chaʼan. Tsiʼ cʌntesayob chaʼan wem bʌ xcʌntesajob yicʼot chaʼan miʼ cʌntañob i wiñicob Dios (Mateo 10:5-7). Felipe juntiquilʌch xcʌntʼan tsaʼ bʌ i wen chaʼle subtʼan. Pero tsiʼ cʌntesayob ti subtʼan jaʼel jiñi i yixicʼalob (yixicpʼeñalob) (Hechos 21:8, 9). Joñonla yom mi laj cʌntesan yambʌlob jaʼel ili ora. ¿Chucoch?

² Yaʼ ti congregación tac tiʼ petol pañimil (mulawil) cabʌlob maxto bʌ wen jalic i cʌñʌyob i sujmlel chaʼan Biblia i maxto i chʼʌmʌyob jaʼ. Jin chaʼan yom mi laj cʌntesañob. Yom mi laj coltañob i chʼʌmbeñob isujm chucoch weñʌch cheʼ miʼ wen pejcañob tiʼ bajñelil jiñi Biblia. Yom mi laj cʌntesañob ti subtʼan jaʼel i chaʼan miʼ cʌntesan yambʌlob chaʼan bʌ jiñi Yumʌntel. Jiñi tsaʼ jaxto bʌ i chʼʌmʌyob jaʼ yom miʼ cʌntesʌntelob chaʼan miʼ sujtelob bajcheʼ siervo ministerial yicʼot anciano. Ti lac pejtelel miʼ mejlel laj coltan jiñi tsijiʼob to bʌ (Proverbios 4:2).

LAʼ LAJ CɅNTESAÑOB I BAJÑEL PEJCAÑOB I BIBLIA JIÑI TSIJIʼOB TO BɅ

3, 4. a) Cheʼ bajcheʼ tsiʼ yʌlʌ Pablo, ¿bajcheʼ miʼ taj i bʌ i pejcʌntel jiñi Tsʼijbujel tac yicʼot jiñi subtʼan? b) ¿Chuqui yom mi lac mel chaʼan mi lac ñijcʌben i pusicʼal yambʌlob chaʼan miʼ bajñel pejcañob jiñi Biblia?

³ Ti lac pejtelel muʼ bʌ lac melben i yeʼtel (troñel) Jehová yom mi lac wen pejcan jiñi Biblia chaʼan mi lac ñaʼtan chuqui yom. Jiñi apóstol Pablo cheʼʌch tiʼ tsictesʌbe jiñi hermanojob ti Colosas. Tsiʼ yʌlʌ: «Maʼanic mij cʌy lojon c mel oración chaʼañetla. Mij cʼajtiben lojon Dios chaʼan miʼ bujtʼesañetla ti wen bʌ laʼ ñaʼtʌbal [...] chaʼan mi laʼ chʼʌmben isujm tiʼ pejtelel laʼ pusicʼal chuqui yom Dios». ¿Chucoch ñuc i cʼʌjñibal cheʼ jiñi xñoptʼañob miʼ pejcañob jiñi Tsʼijbujel tac? Come yaʼʌch mi caj i tajob i ñaʼtʌbal yicʼot i coltʌntel chaʼan miʼ mejlelob ti chumtʌl cheʼ bajcheʼ yom Jehová. Jiñʌch muʼ bʌ caj i coltañob jaʼel chaʼan miʼ tajob wem bʌ i melbal, ñumento ti jiñi subtʼan (Colosenses 1:9, 10). Jin chaʼan, cheʼ an majqui woli (choncol) la cʌqʼuen estudio, laʼ laj coltan i chʼʌmben isujm chaʼan cheʼ miʼ wen pejcan jiñi Biblia mucʼʌch i coltan i melben i yeʼtel Jehová.

⁴ Mi la com lac ñijcʌbeñob i pusicʼal chaʼan miʼ bajñel pejcañob i Biblia jiñi woli (yʌquel) bʌ laj cʌntesañob, cheʼʌch yom mi lac mel jaʼel. Cheʼ ti bele ora mi lac pejcan yicʼot mi lac wen ñaʼtan muʼ bʌ i yʌl jiñi Biblia, miʼ coltañonla ti laj cuxtʌlel yicʼot ti subtʼan. Jumpʼejl ejemplo, mi an majqui miʼ melbeñonla tsʌts bʌ cʼajtiya ti subtʼan, mi caj laj cʼʌn jiñi Biblia chaʼan mi lac jacʼ. O cheʼ mi lac pejcan chaʼan Jesús, Pablo yicʼot yambʌlob maʼañic tsiʼ cʌyʌyob i bʌ ti subtʼan, mi caj i yʌqʼueñonla lac chʼejlel i maʼañic mi caj laj cʌy subtʼan anquese wocolʌch. Cheʼ mi lac suben yambʌlob chuqui cʌmbil lac chaʼan yaʼ ti Biblia yicʼot bajcheʼ coltʌbil i chaʼañonla, tajol mi caj i ñumen mulañob i pejcan chaʼan miʼ tajbeñob i wenlel.

5. Alʌ bajcheʼ miʼ mejlel laj coltan i ñʌntesan i bʌ chaʼan miʼ pejcan i Biblia jiñi woli bʌ la cʌqʼuen estudio.

⁵ Tajol mi laj cʼajtiben lac bʌ bajcheʼ yom mi laj coltan i ñʌntesan i bʌ chaʼan miʼ pejcan i Biblia jiñi woli bʌ la cʌqʼuen estudio. Miʼ mejlel lac pʌsben bajcheʼ yom miʼ chajpan i bʌ chaʼan jiñi muʼ bʌ caj laj qʼuel. Tajol miʼ mejlel lac suben chaʼan miʼ qʼuel jiñi versículo tac muʼ bʌ i tilel yaʼ ti párrafo. Mi woli laj qʼuel la quicʼot jiñi libro Muʼ bʌ i cʌntesañonla jiñi Biblia, miʼ mejlel lac suben i qʼuel jiñi apéndice muʼ bʌ i chʼʌm tilel. Ti wiʼil miʼ mejlel lac pʌsben bajcheʼ yom miʼ chajpan i bʌ chaʼan tempa bʌ i miʼ mejlel i yʌcʼ i comentario. Miʼ mejlel lac suben jaʼel chaʼan miʼ pejcan jiñi revista Lac Tsictesʌbentel yicʼot ¡Despertad! Cheʼ jaʼel, miʼ mejlel lac pʌsben i cʼʌn jiñi Watchtower Library o jiñi BIBLIOTECA TI INTERNET Watchtower chaʼan miʼ tajben i jacʼbal i cʼajtiya tac. Cheʼ bʌ miʼ cʼotel i cʌn muʼ tac bʌ i mejlel i cʼʌn chaʼan miʼ chajpan i bʌ, tijicña mi caj i yubin yicʼot mi caj i ñumen mulan i cʌn.

6. a) ¿Bajcheʼ miʼ mejlel a coltan jiñi woli bʌ a cʌntesan chaʼan miʼ qʼuel ti ñuc i Tʼan Dios? b) Mi jiñi woli bʌ laj cʌntesan miʼ cʼotel i qʼuel ti ñuc jiñi Tsʼijbujel tac, ¿tajol bajcheʼ yubil mi caj i yubin i bʌ?

⁶ Cheʼ bʌ an majqui woli laj cʌntesan, la com miʼ ñaʼtan chaʼan wen ñuc i cʼʌjñibal jiñi Biblia come miʼ coltan i ñumen cʌn Jehová. Laʼ laj cʌntesan chaʼan yom tijicña cheʼ woli ti estudio, i mach lac wersa xicʼ. Mi caj i ñumen mulan i pejcan jiñi Biblia cheʼ miʼ ñumen cʌn majlel. Tajol cheʼ mi caj i yubin i bʌ bajcheʼ tsaʼ bʌ i yʌlʌ ili salmo: «Pero joñon mic taj c wenlel cheʼ mic ñochtan Dios. Tsaʼix c xucʼchoco c bʌ ti lac Yum» (Salmo 73:28). Jiñi i yespíritu Jehová mi caj i coltan majqui yom bʌ sujtel tiʼ yamigo.

LAʼ LAJ CɅNTESAÑOB TI SUBTʼAN YICʼOT TI CɅNTESA JIÑI TSIJIB XSUBTʼAÑOB

7. ¿Bajcheʼ tsiʼ cʌntesa Jesús jiñi xcʌntʼañob chaʼan miʼ mejlel i tsictesañob jiñi Yumʌntel? (Qʼuele jiñi foto am bʌ tiʼ tejchibal).

⁷ Cabʌl chuqui miʼ mejlel laj cʌn bajcheʼ tsiʼ cʌntesa Jesús jiñi xcʌntʼañob i chaʼan. Tsiʼ chaʼle subtʼan yicʼotob, i jiñi xcʌntʼañob tsiʼ qʼueleyob bajcheʼ tsiʼ cʌntesa yambʌlob. Jesús wen tsiquil tsaʼ bʌ i subeyob chaʼan bajcheʼ yom jiñi subtʼan (Mateo, capítulo 10)^[1] (qʼuele jiñi nota am bʌ tiʼ yujtibal ili temaj). Jiñi xcʌntʼañob ti ora tsiʼ cʌñʌyob i tsictesan i sujmlel chaʼan Dios (Mateo 11:1). Laʼ laj qʼuel chaʼchajp muʼ bʌ i mejlel laj cʌntesañob cheʼ bʌ woliyonla ti subtʼan la quicʼot jiñi tsijiʼob to bʌ.

8, 9. a) ¿Bajcheʼ yilal tsiʼ pejca Jesús jiñi quixtañujob? b) Chaʼan jiñi tsijiʼ bʌ xsubtʼañob cheʼ lajal miʼ pejcan jiñi quixtañujob bajcheʼ tsiʼ mele Jesús, ¿bajcheʼ miʼ mejlel laj coltañob?

⁸ Chaʼlen tʼan a wicʼot jiñi quixtañujob. Jesús mach cojach tsiʼ cʌntesa jiñi wiñicob xʼixicob (quixtañujob) cheʼ cabʌl tempʌbilob. Tsiʼ cʌntesayob jaʼel ti jujuntiquil. Tiʼ pejtelel ora tsiʼ pʌsʌ i yutslel. Ti jumpʼejl bʌ qʼuin tsiʼ chaʼle tʼan yicʼot juntiquil xʼixic woli bʌ i locʼsan jaʼ ti jumpʼejl pozo lʌcʼʌl bʌ an yaʼ ti tejclum Sicar (Juan 4:5-30). Ti yambʌ qʼuin tsiʼ pejca juntiquil wiñic i cʼabaʼ Mateo Leví, xchʼʌm tojoñel bʌ. Jesús tsiʼ sube sujtel ti xcʌntʼan i chaʼan, i tsaʼʌch i jacʼʌ. Ti wiʼil, Mateo tsiʼ pʌyʌ ti uchʼel jiñi Jesús yicʼot yambʌlob. Jesús tsiʼ chaʼle tʼan yicʼot cabʌlob ti jiñi bʌ qʼuin (Mateo 9:9; Lucas 5:27-39).

⁹ Juntiquil wiñic i cʼabaʼ Natanael tsiʼ yʌlʌ mach tac bʌ weñic tiʼ tojlel jiñi chʼoyoloʼ bʌ ti Nazaret, i tejclum Jesús. Pero Jesús tsiʼ pʌsbe i yutslel. Cheʼ jiñi, Natanael tsaʼ qʼuextʌyi i pensar tiʼ tojlel Jesús i tsiʼ mulaj i ñumen cʌn (Juan 1:46-51). ¿Chuqui miʼ mejlel laj cʌn tiʼ tojlel Jesús? Chaʼan jiñi quixtañujob mi caj i ñumen ñʌchʼtañoñobla mi mucʼʌch lac pʌsbeñob la cutslel^[2] (qʼuele jiñi nota am bʌ tiʼ yujtibal ili temaj). Laʼ laj cʌntesan jiñi tsijib xsubtʼañob chaʼan yom utsob. Cheʼʌch mi caj i ñumen tajob i tijicñʌyel ti subtʼan.

10-12. a) ¿Chuqui tsiʼ mele Jesús chaʼan jiñi quixtañujob miʼ ñumen mulan i ñʌchʼtañob jiñi wen tʼan? b) ¿Bajcheʼ miʼ mejlel laj coltan jiñi tsijiʼob to bʌ chaʼan miʼ sujtelob ti wem bʌ xcʌntesa?

¹⁰ Cʌntesan jiñi yomoʼ bʌ i ñʌchʼtan. Jesús cabʌl chuqui tsiʼ mele. Pero tsiʼ yʌqʼue i yorajlel yicʼot tsiʼ cʌntesa jiñi quixtañujob yomoʼ bʌ i ñʌchʼtan. Jumpʼejl ejemplo, ti jumpʼejl bʌ qʼuin tsaʼ cʼoti cabʌl quixtañu tiʼ tiʼ jaʼ chaʼan miʼ ñʌchʼtañob i cʌntesa. Jesús tsaʼ letsi yicʼot Pedro ti jumpʼejl barco chaʼan miʼ cʌntesañob. Pero an chuqui tsiʼ mulaj i cʌntesʌben jaʼel jiñi Pedro. Tsiʼ mele jumpʼejl milagro chaʼan miʼ mejlel i chuc cabʌl chʌy. Ti wiʼil tsiʼ sube: «Wʌle, mux a wochel ti xchuc winicob». Jiñi Biblia miʼ yʌl chaʼan Pedro yicʼot i piʼʌlob ti orajach «tsaʼ ujti i ñijcañob majlel barco tac tiʼ tiʼ ñajb, jini xchuc chʌyob tsiʼ cʌyʌyob pejtelel i chubʌʼan». Cheʼ jiñi tsaʼ sujtiyob ti xcʌntʼan i chaʼan Jesús (Lucas 5:1-11).

¹¹ Nicodemo tsiʼ mulaj i ñumen cʌn i chaʼan Jesús jaʼel. Pero juntiquilʌch xʼeʼtel yaʼ ti ñuc bʌ melobʌjʌl i chaʼan judíojob. Jin chaʼan, tsiʼ bʌcʼña chaʼan lecoj miʼ cajelob ti tʼan tiʼ tojlel mi tsaʼ qʼuejli cheʼ woliʼ pejcan Jesús, i ti acʼʌlel tsaʼ majli i pejcan. Jesús wen tsiʼ jacʼbe i tʼan, tsiʼ yʌqʼue i yorajlel yicʼot tiʼ tsictesʌbe ñuc tac bʌ i cʼʌjñibal (Juan 3:1, 2). Jesús tsaʼʌch i tʼoxbe i yorajlel chaʼan miʼ pʌsbeñob i sujmlel yicʼot miʼ pʼʌtʼesʌbeñob i ñopoñel (chʼujbiya) jiñi quixtañujob. Ti jumpʼejl lac pusicʼal yom mi lac chaʼ julaʼtan jaʼel jiñi quixtañujob cheʼ ba ora miʼ mejlelob, i mi la cʌqʼuen i yorajlel chaʼan mi laj coltañob i chʼʌmben isujm jiñi Biblia.

¹² Cheʼ woliyonla ti subtʼan la quicʼot tsijiʼ bʌ xsubtʼañob, miʼ mejlel laj cʌntesañob chaʼan miʼ chaʼ julaʼtañob jiñi tsaʼ bʌ i ñʌchʼtayob jiñi wen tʼan. Miʼ mejlel lac pʌyob majlel ti mel revisita o ti acʼ estudio. Cheʼʌch mi caj i sujtelob ti wem bʌ xcʌntesa chaʼan Biblia yicʼot mi caj i mejlel i coltañob i cʌn Jehová jiñi yambʌlob. Ti wiʼil, mi caj i mulañob i chaʼ julaʼtan yicʼot i cʌntesan jiñi quixtañujob. Cheʼ jaʼel, mi caj i cʌñob chaʼan yom yujilob pijt i mach ti orajic miʼ lijob i bʌ cheʼ maʼañic majqui miʼ tajob ti ototʌl tac (Gálatas 5:22) (qʼuele jiñi recuadro «Tsiʼ chʌn chaʼle wersa»).

LAʼ LAJ CɅNTESAN JIÑI TSIJIʼOB TO BɅ CHAʼAN MIʼ COLTAÑOB JIÑI HERMANOJOB

13, 14. a) ¿Chuqui mi laj cʌn tiʼ tojlel i wiñicob Jehová ti wajali tsaʼ bʌ i coltayob yambʌlob? b) ¿Bajcheʼ tac miʼ mejlel laj cʌntesan i cʼuxbin i yermañojob jiñi xcolelob o tsijiʼob to bʌ?

¹³ Jehová yom chaʼan mi laj coltan lac bʌ yicʼot mi laj cʼuxbin lac bʌ (pejcan Lucas 22:24-27 yicʼot 1 Pedro 1:22). Jiñi Biblia miʼ yʌl chaʼan Jesús tsiʼ chaʼle wersa i coltan yambʌlob. Tsaʼto i yʌcʼʌ i cuxtʌlel ti laj caj (Mateo 20:28). Juntiquil xñoptʼan ti wajali i cʼabaʼ Dorcas tsiʼ wen colta yambʌlob (Hechos 9:36, 39). María tsiʼ chaʼle «cabʌl eʼtel» tiʼ tojlel i yermañojob ti Roma (Romanos 16:6). ¿Bajcheʼ miʼ mejlel laj coltañob i chʼʌmben isujm jiñi tsijiʼob to bʌ chaʼan yomʌch miʼ melob chuqui wen tiʼ tojlel i yermañojob?

¹⁴ Miʼ mejlel lac pʌyob majlel cheʼ mi lac julaʼtan jiñi añobix bʌ i jabilel o jiñi cʼamoʼ bʌ. Cheʼ bʌ miʼ mejlel, jiñi tatʌlob miʼ mejlel i pʌyob majlel ti julaʼ jiñi i yalobilob. Jiñi ancianojob miʼ mejlel i suben jiñi xcolelob o tsijiʼob to bʌ chaʼan miʼ chʼʌmbeñob majlel i bʌl i ñʌcʼ jiñi añobix bʌ i jabilel o chaʼan miʼ coltañob tiʼ tojʼesʌntel i yototob. Cheʼ jiñi xcolelob o tsijiʼob to bʌ miʼ qʼuelob chaʼan laja lajal miʼ coltañob i bʌ jiñi hermanojob, cheʼʌch mi caj i melob jaʼel. Laʼ laj qʼuel tsaʼ bʌ i mele juntiquil anciano. Cheʼ miʼ majlel ti subtʼan ti jumpʼejl alʌ tejclum, miʼ ñumel i julaʼtan jiñi hermanojob chaʼan miʼ ñaʼtan bajcheʼ añob. Juntiquil xcolel ti bele ora bʌ miʼ majlel yicʼot jiñi anciano tsiʼ cʌñʌ bajcheʼ tac miʼ mejlel i coltan jiñi hermanojob (Romanos 12:10).

15. ¿Chucoch yomʌch miʼ chʼʌmob ti ñuc jiñi ancianojob bajcheʼ woliʼ colelob majlel jiñi hermanojob?

¹⁵ Jehová miʼ cʼʌn wiñicob waʼchocobiloʼ bʌ chaʼan miʼ cʌntesan jiñi congregación. Jin chaʼan yom miʼ cʌñob i yʌcʼ wem bʌ cʌntesa. Jiñi ancianojob miʼ mejlel i coltañob. Jumpʼejl ejemplo, miʼ mejlel i ñʌchʼtañob cheʼ bʌ juntiquil siervo ministerial woliʼ chajpan i discurso (Nehemías 8:8)^[3] (qʼuele jiñi nota am bʌ tiʼ yujtibal ili temaj).

16, 17. a) ¿Bajcheʼ tsiʼ pʌsʌ Pablo chaʼan tsaʼʌch i qʼuele ti ñuc bajcheʼ yilal majlel Timoteo? b) ¿Bajcheʼ miʼ mejlel i coltan yambʌlob jiñi ancianojob chaʼan miʼ sujtelob ti xcʌnta tiñʌmeʼob ti congregación?

¹⁶ Yom miʼ wen coltʌntel cabʌl hermanojob chaʼan miʼ sujtelob ti xcʌnta tiñʌmeʼob ti congregación (qʼuele jiñi recuadro «¿Chuqui yom i yʌl?»). Pablo tsiʼ cʌntesa Timoteo yicʼot tsiʼ sube chaʼan miʼ cʌntesan yambʌlob. Tsiʼ yʌlʌ: «Laʼ chʌn pʼʌtʼaquet tiʼ yutslel i pusicʼal Cristo Jesús. Jini tʼan tsaʼ bʌ c subeyet tiʼ tojlel cabʌlob, aqʼueñob tiʼ wenta xucʼul bʌ winicob muʼ bʌ caj i cʌntesañob yañoʼ bʌ» (2 Timoteo 2:1, 2). Timoteo cabʌl chuqui tsiʼ cʌñʌ tiʼ tojlel Pablo, juntiquil anciano yicʼot apóstol. Tsiʼ cʌñʌ bajcheʼ tac miʼ mejlel i ñumen weñʼesan i subtʼan yicʼot i coltan yambʌlob ti congregación (2 Timoteo 3:10-12).

¹⁷ Pablo tsiʼ wen aqʼue i yorajlel i cʌntesan Timoteo come yom chaʼan wen chajpʌbil (Hechos 16:1-5). ¿Bajcheʼ miʼ mejlel i lajiñob Pablo jiñi ancianojob? Jiñʌch cheʼ miʼ pʌyob majlel i julaʼtan hermanojob jiñi siervo ministerial chajpʌbiloʼ bʌ. Cheʼʌch mi caj i cʌñob bajcheʼ yom miʼ cʌntesan yambʌlob, chaʼan yom yujilob pijt yicʼot miʼ pʌsob i cʼuxbiya. Mi caj i cʌñob i cʼajtiben i coltaya Jehová jaʼel chaʼan miʼ mejlel i cʌntʌbeñob i wiñicob (1 Pedro 5:2).

ÑUC I CɅJÑIBAL CHEʼ MI LAJ CɅNTESAN YAMBɅLOB

18. ¿Chucoch ñuc i cʼʌjñibal mi laj cʌntesan yambʌlob tiʼ melol i yeʼtel Jehová?

¹⁸ Ti ili cojix bʌ qʼuin, cabʌl tsijiʼob to bʌ yom miʼ cʌntesʌntelob chaʼan miʼ weñʼesañob i subtʼan. Cheʼ jaʼel, an hermanojob yom bʌ miʼ cʌñob i cʌntan jiñi congregación. Jehová yom chaʼan wen chajpʌbil jiñi i wiñicob, i joñonla miʼ mejlel laj coltan jiñi tsijiʼob to bʌ. Ñuc i cʼʌjñibal cheʼ mi lac chaʼlen wersa laj cʌntesan yambʌlob, cheʼ bajcheʼ tsiʼ mele Jesús yicʼot Pablo. Yom mi laj cʌntesan yambʌlob come an cabʌl chuqui yom melol ti subtʼan cheʼ bʌ maxto juli i jilibal.

19. ¿Chucoch maʼ ñop chaʼan mucʼʌch caj a qʼuelben i wenlel cheʼ maʼ cʌntesan yambʌ hermanojob?

¹⁹ Yomʌch mi la cʌqʼuen i yorajlel yicʼot mi lac chaʼlen wersa tiʼ cʌntesʌntel jiñi tsijiʼob to bʌ. Pero miʼ mejlel lac ñop chaʼan Jehová yicʼot Jesús mi caj i coltañonla lac ñaʼtan bajcheʼ miʼ mejlel laj cʌntesañob. Tijicña mi caj la cubin cheʼ mi laj qʼuel chaʼan woliʼ chaʼleñob wersa yaʼ ti congregación yicʼot ti subtʼan (1 Timoteo 4:10). Cheʼ jaʼel, laʼ lac chaʼlen wersa chaʼan mi lac bej colel tiʼ chaʼan bʌ Dios, mi lac ñumen weñʼesan lac melbal yicʼot mi lac ñumen lʌcʼtesan lac bʌ ti Jehová.