Chʌn ajñen ti lʌcʼʌl a wicʼot Jehová cheʼ añet ti jumpʼejl congregación ti yambʌ tʼan

1-3. a) ¿Chuqui jiñi ñumen ñuc bʌ yom miʼ qʼuelob jiñi i wiñicob Dios? b) ¿Baqui tac bʌ wocol tajbil i chaʼan jiñi hermanojob woli bʌ i cʌñob yambʌ tʼan, i baqui bʌ cʼajtiya tac mi caj lac jacʼ ti ili temaj? (Qʼuele jiñi foto am bʌ tiʼ tejchibal).

ILI ora, cabʌl i testigojob Jehová woliyob (choncolob) ti coltaya chaʼan miʼ tsʼʌctiyel jiñi profecía am bʌ ti Apocalipsis 14:6. Ili profecía miʼ yʌl chaʼan jiñi wen tʼan chaʼan Yumʌntel mi caj i sujbel «tiʼ pejtelel tejclum tac yicʼot pejtelel winicob xʼixicob yujiloʼ bʌ tʼan ti chajp ti chajp». Cabʌl Testigojob woli (yʌquel) i ñopob yambʌ tʼan. An misionerojoʼ bʌ yicʼot an muʼ bʌ i majlelob ti yambʌ país baqui ñumen yom to subtʼan. An tsaʼix bʌ cʼaxiyob ti jumpʼejl congregación ti yambʌ tʼan.

² Tiʼ tojlel i wiñicob Dios, jiñi ñumen ñuc bʌ jiñʌch cheʼ chʌn pʼʌtʌl miʼ yajñel yicʼot i familia tiʼ tojlel Jehová (Mateo 5:3, TNM). Tajol cabʌl la queʼtel (lac troñel) i wocol mi la cubin chaʼan mi lac locʼsʌben i yorajlel chaʼan mi lac bajñel pejcan lac Biblia. Pero jiñi hermanojob woliyoʼ bʌ ti coltaya ti jumpʼejl congregación baqui yujilob yambʌ tʼan, miʼ tajob yan tac bʌ wocol.

³ Anquese yomʌch miʼ cʌñob yambʌ tʼan jiñi hermanojob, pero mach yomic miʼ cʌy i bej cʌñob jiñi wocol tac bʌ ti chʼʌmbentel isujm yaʼ tiʼ Tʼan Dios (1 Corintios 2:10). Cheʼ bʌ an chuqui miʼ yʌjlel ti congregación maʼañic bʌ miʼ wen chʼʌmbeñob isujm, ¿chuqui miʼ mejlelob i mel chaʼan maʼañic miʼ cʌyob i cʌn jiñi wocol tac bʌ ti chʼʌmbentel isujm yaʼ ti Biblia? ¿Chucoch yom miʼ qʼuelob jiñi tatʌlob añoʼ bʌ ti jumpʼejl congregación baqui yujilob yambʌ tʼan mi wolʌch i cʼotel tiʼ pusicʼal i yalobilob jiñi i sujmlel am bʌ ti Biblia? Laʼ laj qʼuel.

MUʼ BɅ I MEJLEL I TICʼLAN BAJCHEʼ AÑONLA LA QUICʼOT JEHOVÁ

4. ¿Chuqui miʼ mejlel i ticʼlan chaʼan bajcheʼ añonla la quicʼot Jehová? Alʌ jumpʼejl ejemplo.

⁴ Cheʼ maʼañic mi lac chʼʌmben isujm jiñi cʌntesa tac chaʼan Biblia ti yambʌ tʼan, miʼ mejlel i ticʼlan bajcheʼ añonla la quicʼot Jehová. Laʼ laj qʼuel tsaʼ bʌ ujti ti wajali. Cheʼ bʌ Nehemías tsaʼ sujti majlel ti Jerusalén, tsiʼ qʼuele chaʼan cabʌl xbiʼtalob mach yujilobic jiñi tʼan hebreo (pejcan Nehemías 13:23, 24). Jin chaʼan, maʼañic tsaʼ mejli i chʼʌmbeñob isujm jiñi i Tʼan Dios i tsaʼ cʼunʼayob tiʼ tojlel Jehová (Nehemías 8:2, 8).

5, 6. ¿Chuqui qʼuelbil i chaʼan jiñi tatʌlob añoʼ bʌ ti jumpʼejl congregación ti yambʌ tʼan, chucoch?

⁵ An tatʌlob añoʼ bʌ ti jumpʼejl congregación ti yambʌ tʼan qʼuelbil bʌ i chaʼañob chaʼan jiñi i yalobilob tsaʼix cʼunʼayob ti Jehová. ¿Chucoch? Come maʼañic miʼ wen chʼʌmbeñob isujm muʼ bʌ i yʌjlel ti tempa bʌ tac. Jin chaʼan, maʼañic miʼ cʼotelob tiʼ pusicʼal muʼ bʌ i ñʌchʼtañob yicʼot maʼañic chuqui miʼ ñijcañob tiʼ melol. Laʼ laj qʼuel muʼ bʌ i yʌl Pedro, chʼoyol bʌ ti Sudamérica, tsaʼ bʌ majli ti chumtʌl yicʼot i familia ti Australia: «Cheʼ bʌ woli la cʌl i chaʼan bʌ Jehová yaʼʌch yom an lac pusicʼal jaʼel»^[1] (qʼuele jiñi nota am bʌ tiʼ yujtibal ili temaj) (Lucas 24:32).

⁶ Yambʌ wocol jiñʌch cheʼ maʼañic miʼ yoque cʼotel ti lac pusicʼal muʼ bʌ lac pejcan ti yambʌ tʼan. Cheʼ jaʼel, maʼañic majqui miʼ mejlel lac wen pejcan. Ili miʼ mejlel i lujbʼesañonla yicʼot i cʼuñʼesañonla tiʼ melol i yeʼtel Jehová. Jin chaʼan, yom mi laj cʌntan bajcheʼ añonla la quicʼot Jehová anquese wen la comʌch laj coltan jumpʼejl congregación ti yambʌ tʼan (Mateo 4:4).

I WIÑICOB DIOS TSAʼ BɅ I CɅNTAYOB BAJCHEʼ TSAʼ AJÑIYOB YICʼOT JEHOVÁ

7. Chaʼan Daniel miʼ yotsan i bʌ tiʼ cultura yicʼot i ñopbal jiñi Babilonia, ¿chuqui tsiʼ mele jiñi babiloniojob?

⁷ Cheʼ bʌ Daniel yicʼot i yamigojob tsaʼ cʌjchiyob majlel ti Babilonia, tsaʼ xijqʼuiyob chaʼan miʼ cʌmbeñob i cultura yicʼot i ñopbal jiñi tejclum. ¿Bajcheʼ? Jiñi babiloniojob tsiʼ pʌsbeyob i tʼan yicʼot tsiʼ qʼuextʌbeyob i cʼabaʼ (Daniel 1:3-7). Jiñi i cʼabaʼ tsaʼ bʌ aqʼuenti Daniel miʼ taj i bʌ yicʼot Bel, i cʼabaʼ jiñi dios muʼ bʌ i ñumen qʼuelob ti ñuc jiñi babiloniojob. Tajol jiñi rey ti Babilonia tsiʼ mulaj i yʌqʼuen i ñaʼtan chaʼan ñumen pʼʌtʌl i dios, i mach jiñic Jehová, i Dios Daniel (Daniel 4:8).

8. ¿Chuqui tsiʼ mele Daniel chaʼan utsʼat miʼ yajñel yicʼot Jehová?

⁸ Daniel tsaʼ aqʼuenti yaʼ ti Babilonia wen sumuc tac bʌ i bʌl i ñʌcʼ jiñi rey. Pero maʼañic tsiʼ cʼuxu come miʼ chʼujbin i mandar Dios (Daniel 1:8). Daniel pʼʌtʌl tsaʼ ajñi tiʼ tojlel Jehová anquese maʼañic tiʼ país. ¿Bajcheʼ tsaʼ mejli? Tsiʼ pejca jiñi chʼujul bʌ tsʼijbujel tac am bʌ ti hebreo (Daniel 9:2). Cheʼ ñumeñix 70 jab i cʼotel ti Babilonia, Daniel wen cʌmbil to cheʼ bajcheʼ an i cʼabaʼ ti hebreo (Daniel 5:13).

9. ¿Bajcheʼ yilal tsiʼ qʼuele i Tʼan Dios jiñi tsaʼ bʌ i tsʼijbu Salmo 119?

⁹ Miʼ mejlel laj cʌn jeʼel tiʼ tojlel tsaʼ bʌ i tsʼijbu jiñi Salmo 119. Tsiʼ cuchu tiʼ pejtelel mach bʌ weñic tsaʼ ajli tiʼ tojlel. Pero tsiʼ sʌcla i coltʌntel tiʼ Tʼan Dios, i tsaʼʌch i taja i pʼʌtʌlel chaʼan maʼañic miʼ mel bajcheʼ yambʌlob (Salmo 119:23, 61). Tsiʼ yʌcʼʌ chaʼan miʼ cʼotel tiʼ pusicʼal i cʌntesa Dios (pejcan Salmo 119:11, 46).

LAʼ LAJ CɅNTAN BAJCHEʼ AÑONLA LA QUICʼOT JEHOVÁ

10, 11. a) Cheʼ mi lac pejcan i Tʼan Dios, ¿chuqui la com lac taj? b) ¿Bajcheʼ miʼ mejlel lac taj? Tsictesan yicʼot jumpʼejl ejemplo.

¹⁰ Tajol cabʌl chuqui an ti lac wenta ti congregación yicʼot ti la queʼtel, pero yom mi lac locʼsʌben i yorajlel chaʼan mi lac pejcan jiñi Biblia ti lac bajñelil yicʼot mi lac mel lac chʼujutesaya ti familia (Efesios 5:15, 16). Cheʼ mi lac pejcan jiñi Biblia yicʼot lac jun tac, mach yomic chaʼan jach mi lac pejcan ti on o chaʼan jach mi lac locʼsan laj comentario. La com bʌ jiñʌch chaʼan miʼ cʼotel ti lac pusicʼal yicʼot miʼ pʼʌtʼesan lac chʼujbiya.

¹¹ Chaʼan mi lac taj chuqui la com cheʼ mi lac pejcan jiñi Biblia, pʼisbil jach yomonla yicʼot yom mi lac ñaʼtan chuqui i cʼʌjñibal lac chaʼan, mach cojach tiʼ tojlel yambʌlob (Filipenses 1:9, 10). ¿Chucoch? Come mach tiʼ pejtelel ora mi lac ñaʼtan bajcheʼ miʼ mejlel i coltañonla woli bʌ lac pejcan cheʼ woli lac chajpan lac bʌ chaʼan subtʼan, chaʼan tempa bʌ, chaʼan jumpʼejl discurso o jumpʼejl demostración. Laʼ la cʌl tiʼ tojlel juntiquil xmel bʌlñʌcʼʌl. Cheʼ maxto i luchu jiñi bʌlñʌcʼʌl miʼ tsʼitaʼ ñop, pero ili mach yom i yʌl chaʼan jin jach mi caj i ñajʼesan. Yom miʼ cʼux wen tac bʌ bʌlñʌcʼʌl chaʼan wen miʼ yajñel. Cheʼ jaʼel, mi la com lac pʼʌtʼesan bajcheʼ añonla la quicʼot Jehová, ti bele ora yom mi lac pejcan jiñi Biblia come la com chaʼan tsʼʌcʌl i cʼʌjñibal bʌ lac chaʼan.

12, 13. ¿Chucoch cabʌl hermanojob miʼ yʌlob chaʼan weñʌch cheʼ ti lac tʼan mi lac pejcan jiñi Biblia?

¹² Cabʌl hermanojob añoʼ bʌ ti jumpʼejl congregación ti yambʌ tʼan an i qʼueleyob chaʼan weñʌch cheʼ tiʼ tʼan miʼ pejcañob jiñi Biblia (Hechos 2:8). Jiñi misionerojob miʼ yʌlob jaʼel chaʼan jiñʌch am bʌ i coltayob chaʼan chʌn pʼʌtʌl miʼ yajñelob, chaʼan mach jasʌlic muʼ bʌ i ñʌchʼtañob ti tempa bʌ tac.

¹³ Juntiquil hermano i cʼabaʼ Alain, añix bʌ 8 jab i cajel i ñop jiñi tʼan persa, miʼ yʌl: «Cheʼ bʌ mic chajpan c bʌ chaʼan tempa bʌ tac, jiñi c jol yaʼ jach an ti jiñi tʼan persa. Mach tiʼ pejtelel ora miʼ cʼotel tic pusicʼal muʼ bʌ c pejcan. Jin chaʼan ñʌmʌl c pejcan jiñi Biblia yicʼot jiñi jun tac am bʌ tic tʼan».

TATɅLOB, COLTAN LAʼ WALOBILOB CHAʼAN MIʼ CʼOTELOB TIʼ PUSICʼAL

14. ¿Chuqui yom miʼ wen qʼuel jiñi tatʌlob, i chucoch?

¹⁴ Jiñi tatʌlob yom miʼ wen qʼuelob mi jiñi i yalobilob mucʼʌch i chʼʌmbeñob isujm yicʼot miʼ yʌcʼob ti ñuc jiñi i sujmlel. ¿Chucoch? Laʼ laj qʼuel tsaʼ bʌ ujti tiʼ tojlel Serge yicʼot Muriel. Ñumen ti uxpʼejl jab tsaʼ ajñiyob ti jumpʼejl congregación ti yambʌ tʼan. Ti jumpʼejl bʌ qʼuin, tsaʼ caji i qʼuelob chaʼan jiñi i yalobil am bʌ 17 i jabilel maʼañix miʼ mulan subtʼan yicʼot tempa bʌ. Muriel miʼ yʌl: «Maʼañic tsiʼ mulaj subtʼan ti yambʌ tʼan, pero ti ñaxan mucʼʌch i mulan subtʼan ti francés, jiñi tʼan yujil bʌ cʼʌlʌl cheʼ tsaʼ coli». Serge miʼ yʌl chaʼan jiñi i yalobil maʼañic tsaʼ mejli ti colel tiʼ chaʼan bʌ Dios cheʼ añob ti jumpʼejl congregación mach bʌ i tʼañobic. Jin chaʼan, tsaʼ chaʼ sujtiyob majlel baqui ñaxan añob.

15. a) ¿Chuqui yom miʼ ñaʼtan jiñi tatʌlob yom bʌ i qʼuextañob i bʌ ti congregación? b) ¿Baqui bʌ ticʼol miʼ tajob jiñi tatʌlob ti Deuteronomio 6:5-7?

¹⁵ An tatʌlob woli bʌ i ñaʼtañob chaʼ majlel ti jumpʼejl congregación am bʌ ti jiñi tʼan yujil bʌ i yalobilob. ¿Chuqui yom miʼ ñaxan ñaʼtañob? Ti ñaxan, yom miʼ qʼuelob mi maʼañic i yorajlel yicʼot i pʼʌtʌlel chaʼan miʼ cʌntesañob i cʼuxbin Jehová yicʼot chaʼan miʼ pʌsbeñob yambʌ tʼan. Yambʌ, yom miʼ qʼuelob mi jiñi i yalobilob yomobʌch majlel ti subtʼan, ti tempa bʌ tac o ti jumpʼejl congregación am bʌ ti yambʌ tʼan. Cheʼ bʌ jiñi tatʌlob tsaʼix i qʼueleyob, tajol an muʼ bʌ i ñaʼtañob chaʼ majlel ti jumpʼejl congregación am bʌ ti jiñi tʼan yujilʌch bʌ i yalobilob. Ti wiʼil, tajol jiñi tatʌlob miʼ ñaʼtañob sujtel ti jumpʼejl congregación am bʌ ti yambʌ tʼan cheʼ jiñi i yalobilob utsʼat añob yicʼot Jehová (pejcan Deuteronomio 6:5-7).

16, 17. ¿Chuqui melbil i chaʼan jiñi tatʌlob chaʼan miʼ cʌntesañob chaʼan bʌ Jehová jiñi i yalobilob?

¹⁶ An tatʌlob tajbil bʌ i chaʼañob bajcheʼ tac miʼ mejlel i cʌntesañob i yalobil tiʼ chaʼan bʌ Jehová ti jiñi tʼan yujiloʼ bʌ, anquese añob ti jumpʼejl congregación o grupo am bʌ ti yambʌ tʼan. Laʼ laj qʼuel tiʼ tojlel Charles, am bʌ uxtiquil i yixicʼal, juntiquil 13 i jabilel, jiñi yambʌ 12 i jiñi cojix bʌ 9. Tiʼ pejtelelob woliyob ti coltaya ti jumpʼejl grupo am bʌ ti tʼan lingala. Charles miʼ yʌl: «Tsaʼ cʌlʌ lojon chaʼan mi caj lon c pejcan jiñi Biblia yicʼot lon c mel jiñi chʼujutesaya ti familia ti jiñi tʼan cujil bʌ lojon. Pero chaʼan jiñi xchʼocob miʼ cʌñob jaʼel jiñi lingala, mic chaʼlen lon alas yicʼot mic chajpan muʼ bʌ caj lon cʌl ti subtʼan, ti tempa bʌ o yan tac bʌ».

¹⁷ Laʼ laj cʌn jaʼel tiʼ tojlel Kevin. An chaʼtiquil i yixicpʼeñal, juntiquil 5 i jabilel i jiñi yambʌ 8. Kevin miʼ chaʼlen wersa i cʌntesañob chaʼan Biblia come maxto añic miʼ wen chʼʌmbeñob isujm jiñi tʼan muʼ bʌ i cʼʌjñel yaʼ ti congregación. Kevin miʼ yʌl: «Joñon quicʼot quijñam mic chaʼlen estudio quicʼotob ti francés come jiñʌch i tʼañob. Tsaʼix cʌlʌ lon jaʼel chaʼan junyajl ti jujumpʼejl uw mi caj c majlel lon ti tempa bʌ ti francés. I cheʼ bʌ mic majlel lon ti xʌmbal, mi lon c majlel baqui woliʼ yujtel uxpʼejl bʌ qʼuin colem tempa bʌ ti lon c tʼan».

18. a) ¿Bajcheʼ miʼ tajob i coltʌntel ti Romanos 15:1, 2 jiñi tatʌlob chaʼan miʼ ñaʼtañob yom bʌ miʼ melob tiʼ tojlel i yalobilob? b) Alʌ chuqui albil i chaʼan yambʌ tatʌlob.

¹⁸ Jujumpʼejl familia yom miʼ ñaʼtan baqui bʌ jiñi ñumen wem bʌ chaʼan bajcheʼ añob yicʼot Jehová jiñi i yalobilob (Gálatas 6:5). Yaʼ ti párrafo 14 tsaʼ lac taja ti tʼan Muriel yicʼot Serge. Muriel yicʼot i ñoxiʼal miʼ yʌl chaʼan tsaʼʌch i lon mulayob bej ajñel ti jiñi congregación baqui woliyob ti coltaya ti yambʌ tʼan. Pero tsiʼ qʼuextayob i bʌ chaʼan miʼ mejlel i coltañob i yalobil i pʼʌtʼesan i cʼuxbiya ti Jehová (pejcan Romanos 15:1, 2). Wʌle, Serge miʼ yʌl chaʼan weñʌch tsaʼ bʌ i mele. Miʼ yʌl chaʼan jiñi i yalobil tsaʼ pʼʌtʼa bajcheʼ an yicʼot Jehová i tsiʼ chʼʌmʌ jaʼ cheʼ bʌ tsaʼ majliyob ti jumpʼejl congregación am bʌ ti francés. Jiñi i yalobil ochemix bajcheʼ precursor regular i choncol i ñaʼtan majlel ti coltaya baqui yujilob yambʌ tʼan.

LAʼ LAJ CɅY CHAʼAN MIʼ CʼOTEL TI LAC PUSICʼAL JIÑI I TʼAN DIOS

19, 20. ¿Bajcheʼ mi lac pʌs chaʼan mucʼʌch laj qʼuel ti ñuc i Tʼan Dios?

¹⁹ Jehová miʼ cʼuxbiñonla ti lac pejtelel. An i yʌcʼʌ ti tsʼijbuntel ti yambʌ tʼan tac jiñi Biblia chaʼan «pejtelel winicob xʼixicob» miʼ cʌñob i sujmlel (1 Timoteo 2:4). Jehová yujil chaʼan miʼ ñumen pʼʌtʼan bajcheʼ añonla la quicʼot cheʼ ti lac tʼan mi lac pejcan jiñi Biblia.

²⁰ Chaʼan utsʼat mi la cajñel la quicʼot Jehová, yom mi lac chaʼlen wersa ti lac pejtelel. Chaʼan mi lac mejlel, yom mi lac pejcan ti lac tʼan jiñi Biblia. Cheʼʌch mi caj laj coltan lac familia chaʼan pʼʌtʌl miʼ yajñelob tiʼ chaʼan bʌ Dios yicʼot mi caj lac pʌs chaʼan mucʼʌch laj qʼuel ti ñuc i Tʼan Dios (Salmo 119:11).