Jiñi muʼ bʌ i chaʼlen meloñel tiʼ pejtelel pañimil toj chuqui miʼ mel tiʼ pejtelel ora

1. ¿Bajcheʼ tsiʼ pʌsʌ i xucʼtʌlel Abraham chaʼan tojʌch jiñi Jehová? (Qʼuele jiñi dibujo).

TI JUMPʼEJL bʌ qʼuin, Abraham (Abrahán) tsiʼ yʌlʌ: «Jini xMeloñel muʼ bʌ i mel pejtel añoʼ bʌ ti pañimil, ¿mach ba muqʼuic i melob ti toj?» (Génesis 18:25). Cheʼ bʌ Abraham tsiʼ cʼajti ili, maʼañic woliʼ pʌs chaʼan maʼan i ñopoñel. Ili tsiʼ mele chaʼan mucʼʌch i ñop chaʼan Jehová toj miʼ caj ti meloñel tiʼ tojlel Sodoma yicʼot Gomorra. Miʼ wen ñop chaʼan Jehová maʼañic mi caj i jisan «jini tojoʼ bʌ yicʼot jontoloʼ bʌ». Abraham maʼañic tsiʼ wis ñaʼta chaʼan Jehová mi caj i jisan jiñi tojoʼ bʌ. Cheʼ tsaʼix ñumi cabʌl jab, Moisés tiʼ tsʼijbu tsaʼ bʌ i yʌlʌ Jehová: «Jiñʌch xajlel. Tsʼʌcʌl i yeʼtel. Tojʌch pejtelel muʼ bʌ i mel. Xucʼulʌch, maʼanic i mul» (Deuteronomio 31:19; 32:4).

2. ¿Chucoch mi la cʌl chaʼan Jehová tojʌch?

² ¿Chucoch tsaʼʌch i ñopo Abraham chaʼan Jehová tojʌch muʼ bʌ i mel tiʼ pejtelel ora? Come Jehová miʼ pʌs ti tsʼʌcʌl chuqui toj. Jiñi i mandar tac tojʌch, jin chaʼan tojʌch miʼ chaʼlen meloñel. Jiñi Biblia miʼ yʌl chaʼan «miʼ cʼuxbin toj bʌ lac melbal yicʼot toj bʌ meloñel» (Salmo 33:5).

3. Alʌ jumpʼejl ejemplo chaʼan jiñi mach bʌ tojic miʼ mejlel wʌʼ ti pañimil.

³ Tijicña mi la cubin cheʼ la cujil chaʼan Jehová tojʌch tiʼ pejtelel ora. Pero ili pañimil butʼul ti mach bʌ tojic. Jumpʼejl ejemplo, an quixtañujob muʼ bʌ i yotsʌntelob ti cárcel anquese maʼañobic i mul. Cheʼ ñumeñix cabʌl jab, miʼ qʼuejlel chaʼan maʼañobic i mul i muqʼuix i locʼsʌntelob yaʼ ti cárcel. Jiñi quixtañujob miʼ michʼañob yicʼot chʼijiyemob tiʼ caj muʼ bʌ i yujtel tac. Pero tiʼ tojlel jiñi xñoptʼañob añʌch ñumen cʼux bʌ miʼ yubiñob. ¿Baqui tac bʌ?

MACH BɅ TOJIC TAC MIʼ YUJTEL YAʼ TI CONGREGACIÓN

4. ¿Chuqui miʼ mejlel i yʌcʼ ti asiyel jiñi lac ñopoñel?

⁴ Jiñi xñoptʼañonbʌla la cujil chaʼan cheʼ maʼañoñicla yaʼ ti congregación miʼ mejlel la cubin wocol. Pero miʼ mejlel ti asiyel jiñi lac ñopoñel cheʼ mi lac ñaʼtan chaʼan tsaʼ mejli mach bʌ tojic ti lac tojlel o tiʼ tojlel yambʌ yaʼ ti congregación. Mi cheʼ mi la cujtel, ¿bajcheʼ mi caj lac jacʼ? ¿Muʼ ba caj laj cʌy lac melben i yeʼtel Jehová tiʼ caj jiñi?

5. ¿Chucoch mach yomic miʼ toj sajtel lac pusicʼal cheʼ mi laj qʼuel o mi lac melbentel mach bʌ tojic yaʼ ti congregación?

⁵ Ti lac pejtelel xmulilonla yicʼot mi lac taj lac sajtemal. Jin chaʼan, yaʼ ti congregación mucʼʌch i mejlel ti ujtel cheʼ an majqui miʼ mel mach bʌ tojic ti lac tojlel o joñonla mi lac mel tiʼ tojlel yambʌ hermano (1 Juan 1:8). Iliyi maʼañic miʼ wen ujtel. Pero cheʼ xucʼuloñʌchla maʼañic miʼ toj sajtel lac pusicʼal o mi laj cʼunʼan cheʼ miʼ yujtel jiñi. Jehová miʼ yʌqʼueñonla wen tac bʌ ticʼojel yaʼ ti Biblia muʼ bʌ i coltañonla chaʼan xucʼul mi la cajñel cheʼ juntiquil hermano mach tojic miʼ mel ti lac tojlel (Salmo 55:12-14).

6, 7. a) ¿Chuqui mach bʌ tojic tsiʼ cuchu juntiquil hermano yaʼ ti congregación? b) ¿Chuqui ti melbal tac tsiʼ pʌsʌ chaʼan miʼ coltan?

⁶ Laʼ laj qʼuel tsaʼ bʌ ujti tiʼ tojlel jiñi hermano Willi Diehl. Tsaʼ caji ti eʼtel yaʼ ti Betel am bʌ ti Berna (Suiza) cheʼ ti 1931. Cheʼ ti 1946, tsajñi ti jiñi clase número 8 chaʼan i Cʌntesʌntel i chaʼan Galaad yaʼ ti Nueva York (Estados Unidos). Ti wiʼil, tsaʼ caji ti eʼtel bajcheʼ superintendente i chaʼan circuito ti Suiza. Cheʼ bʌ tsaʼ tsʼijbunti chuqui ujtem bʌ tiʼ tojlel, jiñi hermano Diehl tsiʼ yʌlʌ chaʼan cheʼ ti mayo ti 1949 tiʼ sube jiñi hermanojob yaʼ ti sucursal am bʌ ti Suiza chaʼan miʼ caj ti ñujpuñel. Jiñi hermanojob tsiʼ jacʼʌyob chaʼan mi caj i luʼ chilbeñob i yeʼtel am bʌ tiʼ wenta. Cojach mi caj i yajñel bajcheʼ precursor. Jiñi hermano Diehl tsiʼ yʌlʌ: «Tsaʼ subentiyon chaʼan maʼañic miʼ mejlel cʌcʼ discurso tac». I tsiʼ yʌlʌ jaʼel: «Cabʌl hermanojob maʼañix bʌ miʼ chʌn pejcañoñob lojob, cheʼ bajcheʼ juntiquil expulsado tsaʼ caji i qʼueloñob lojon».

⁷ ¿Bajcheʼ tsiʼ jacʼʌ? Come jiñi hermano Diehl yicʼot i yijñam yujilob chaʼan mach wolic i ñusañob jumpʼejl mandar am bʌ ti Biblia cheʼ an majqui ñujpuñel, tsiʼ coltayob i bʌ ti oración yicʼot tsiʼ ñopoyob Jehová. Anquese an hermanojob mach bʌ muqʼuic i wen chʼʌmbeñob isujm bajcheʼ miʼ qʼuel Jehová jiñi ñujpuñel, tsaʼʌch cʼoti i ñaʼtañob ti wiʼil, i jiñi hermano Diehl tsaʼ cʼoti i chaʼ taj jiñi i yeʼtel tac. Jehová tsiʼ yʌqʼue bendición chaʼan i xucʼtʌlela (qʼuele jiñi nota). Jin chaʼan, ¿chuqui mi caj lac mel miʼ cheʼ mi lac tumbentel jaʼel? ¿Muʼ ba caj lac pʌs chaʼan la cujilʌch pijt yicʼot chaʼan Jehová mi caj i tojʼesan jiñi wocol? ¿O muʼ ba caj lac bajñel ñaʼtan lac bʌ i mi lac ñop lac bajñel tojʼesan? (Proverbios 11:2; pejcan Miqueas 7:7).

8. Mi tsaʼ lac ñaʼta chaʼan an chuqui mach bʌ tojic tsaʼ ujti ti lac tojlel o tiʼ tojlel yambʌ, ¿chucoch yom mi laj cʼajtesan chaʼan tajol mach weñic bajcheʼ mi lac ñaʼtan?

⁸ Mi woli lac poj ñaʼtan chaʼan an chuqui mach utsʼatic tsaʼ mejli yaʼ ti congregación, yom mi laj cʼajtesan chaʼan tajol mach weñic bajcheʼ mi lac ñaʼtan. Come xmulilonla, tajol lecoj tsaʼ lac ñaʼta tsaʼ bʌ ujti. Cheʼ jaʼel, tajol mach la cujilic ti tsʼʌcʌl tsaʼ bʌ ujti. Mi isujmʌch woli bʌ lac ñaʼtan o maʼañic, yom mi lac melben oración Jehová. Yom mi lac ñop jaʼel yicʼot xucʼul mi la cajñel tiʼ tojlel. Mi cheʼ mi lac mel, maʼañic mi caj laj contrajin Jehová (pejcan Proverbios 19:3).

9. ¿Chuqui mi caj laj qʼuel ti ili temaj yicʼot ti yambʌ?

⁹ Laʼ laj qʼuel uxpʼejl ejemplo chuqui mach bʌ tojic tsaʼ ujti tiʼ tejclum Dios ti wajali. Ti ili temaj, mi caj laj qʼuel tiʼ tojlel José, i yalobil i buts Abraham. Mi caj laj qʼuel chuqui ti wocol ti ñusa tiʼ mul i yerañob. Ti yambʌ temaj mi caj laj qʼuel chuqui tsiʼ mele Jehová tiʼ tojlel jiñi rey Acab, yicʼot tsaʼ bʌ i mele jiñi apóstol Pedro cheʼ yaʼan ti Antioquía de Siria. Cheʼ mi lac chajpan majlel iliyi, laʼ lac ñaʼtan bajcheʼ miʼ mejlel laj qʼuel cheʼ bajcheʼ miʼ qʼuel Jehová jiñi muʼ bʌ i yujtel yicʼot bajcheʼ mi lac mejlel lac chʌn ajñel tiʼ tojlel. Ili temaj mi caj i coltañonla ñumento cheʼ miʼ melbeñoñobla mach tojic mi la cubin.

TSAʼ MEJLI MACH BɅ TOJIC TIʼ TOJLEL JOSÉ

10, 11. a) ¿Chuqui tac tsiʼ lʌtʼʌ José? b) ¿Chuqui tsaʼ mejli i mel José cheʼ yaʼan ti cárcel?

¹⁰ José xucʼul tsaʼ ajñi tiʼ tojlel Jehová anquese cabʌl mach bʌ weñic tsaʼ mejli tiʼ tojlel. Pero ñumen cʼux bʌ tsiʼ yubi jiñʌch tsaʼ bʌ melbenti tiʼ tojlel i yerañob. Cheʼ an 17 i jabilel, jiñi i yerañob tsiʼ choñoyob bajcheʼ mozo i tsaʼ pʌjyi majlel ti Egipto (Génesis 37:23-28; 42:21). Ti jiñi tejclum, José tsaʼ otsʌnti ti cárcel come tsaʼ jopʼbenti i mul chaʼan tsiʼ ñopo i piʼlen juntiquil xʼixic (Génesis 39:17-20). José tsaʼ ajñi bajcheʼ mozo yicʼot tsaʼ ñujpʼi cheʼ bʌ 13 jab. ¿Bajcheʼ miʼ coltañonla ili ejemplo mi jiñi la quermañojob miʼ melob mach bʌ tojic ti lac tojlel?

¹¹ Cheʼ bʌ José yaʼto an ti cárcel, jiñi i yum xñusa vino i chaʼan jiñi rey tsaʼ ñujpʼi jaʼel. Ti jumpʼejl bʌ acʼʌlel, tsiʼ chaʼle ñajal, i José tsiʼ tsictesʌbe yicʼot i coltaya Jehová. Tsiʼ sube chaʼan mi caj i locʼsʌntel yaʼ ti cárcel i mi chaʼ cajel ti eʼtel chaʼan jiñi faraón. Cheʼ jaʼel, ti jin bʌ ora José tsiʼ sube jiñi xñusa vino jiñi i wocol. Cabʌl chuqui miʼ mejlel lac ñop chaʼan jiñi tsaʼ bʌ i yʌlʌ yicʼot jiñi mach bʌ añic tsiʼ yʌlʌ (Génesis 40:5-13).

12, 13. a) ¿Muʼ ba i mejlel la cʌl chaʼan José maʼañic chuqui tsiʼ mele chaʼan miʼ tojʼesan jiñi i wocol? b) ¿Chuqui mach bʌ añic tsiʼ sube José jiñi xñusa vino?

¹² (Pejcan Génesis 40:14, 15). José tsiʼ yʌlʌ chaʼan ‹mucul jach tsaʼ pʌjyi loqʼuel›. Tiʼ sujm, José tsaʼ melbenti mach bʌ tojic. Tsiquil tsiʼ yʌlʌ chaʼan maʼañic i mul. Jin chaʼan, tsiʼ cʼajtibe jiñi xñusa vino chaʼan miʼ chaʼlen tʼan tiʼ tojlel jiñi faraón chaʼan miʼ locʼsan yaʼ ti cárcel.

¹³ ¿Muʼ ba i mejlel la cʌl chaʼan José maʼañic chuqui tsiʼ mele chaʼan miʼ tojʼesan jiñi i wocol? Maʼañic. Yujil chaʼan mach tojic tsaʼ bʌ i melbeyob. Jin chaʼan, tsiʼ sube jiñi xñusa vino come tsiʼ ñaʼta chaʼan mi caj i coltan. Pero jiñi Biblia maʼañic miʼ yʌl chaʼan José tsiʼ sube yambʌ quixtañujob chaʼan jiñi i yerañob jiñʌch tsaʼ bʌ i choñoyob. Mi jiñic to tsiʼ sube jiñi faraón. Cheʼ bʌ jiñi i yerañob tsaʼ cʼotiyob yaʼ ti Egipto tsiʼ yutsʼesayob i bʌ yicʼot José, jiñi faraón tijicña tsiʼ yubi i bʌ. Tsaʼto i subeyob cʌytʌl ti jiñi tejclum yicʼot miʼ ñusañob i bʌ ti «jini cʼax wen bʌ» (Génesis 45:16-20).

14. Cheʼ miʼ melob mach bʌ tojic ti lac tojlel yaʼ ti congregación, ¿chuqui mi caj i coltañonla chaʼan maʼañic mi la cʌl muʼ bʌ i mejlel i low yambʌlob?

¹⁴ Mi tsaʼ melbentiyonla mach bʌ tojic mi lac ñaʼtan yaʼ ti congregación, yom tsajilonla chaʼan maʼañic mi la cʌl yicʼot yambʌlob. Pero mi juntiquil hermano miʼ mel tsʌts bʌ mulil, yomʌch mi lac suben jiñi ancianojob yicʼot mi laj cʼajtiben i coltaya (Levítico 5:1). Pero an cabʌl baqui maʼañic tsʌts bʌ mulil. Mi cheʼ bajcheʼ jiñi, miʼ mejlel lac ñusʌben lac bʌ i maʼañic mi la cʌl yicʼot yambʌlob. Tajol mach wersajix mi lac suben jiñi ancianojob (pejcan Mateo 5:23, 24 yicʼot 18:15). Yom xucʼulonla i mi lac chumtan jiñi principio tac. Tajol maʼañic tsaʼ lac wen chʼʌmbe isujm jiñi tsaʼ bʌ ujti i maʼañic tsaʼ melbentiyonla mach bʌ tojic. Mi cheʼ mi la cujtel bajcheʼ iliyi, utsʼat cheʼ maʼañic mi lac chaʼlen tʼan tiʼ contra yambʌ hermano chaʼan maʼañic mi lac ñuqʼuesan jiñi wocol. Mach yʌlʌlic mi isujmʌch o maʼañic, mach yomic mi lac wis al jiñi tʼan tac muʼ bʌ i low yañoʼ bʌ come maʼañic miʼ tojʼan jiñi wocol. Jiñi lac xucʼtʌlel ti Jehová yicʼot jiñi hermanojob mi caj i coltañonla chaʼan maʼañic mi lac mel bajcheʼ jiñi. Jiñi tsaʼ bʌ i tsʼijbu jiñi salmo tsiʼ yʌlʌ chaʼan jiñi wiñic ‹maʼañic bʌ i sajtemal› maʼañic miʼ cʼʌn i yacʼ chaʼan miʼ chaʼlen lot (Salmo 15:2, 3; Santiago 3:5).

JIÑI BAJCHEʼ AÑONLA LA QUICʼOT JEHOVÁ JIÑɅCH ÑUMEN ÑUC BɅ

15. ¿Bajcheʼ tsiʼ colta José cheʼ lʌcʼʌl an tiʼ tojlel Jehová?

¹⁵ Añʌch yambʌ chuqui wen bʌ miʼ mejlel laj cʌn tiʼ tojlel José. Ti jiñi 13 jab cheʼ tsaʼ melbenti mach bʌ tojic, tsiʼ pʌsʌ chaʼan mucʼʌch i qʼuel jiñi woli bʌ ti ujtel cheʼ bajcheʼ miʼ qʼuel Jehová (Génesis 45:5-8). Maʼañic tsiʼ wis aqʼue tiʼ mul Jehová jiñi tsaʼ bʌ i ñusa. Isujmʌch chaʼan José maʼañic tsiʼ ñajʌtesa jiñi wocol tsaʼ bʌ i taja, pero maʼañic tsiʼ yʌcʼʌ chaʼan mi cʌlʌx aqʼuen i chʼijiyemlel. Jiñi ñumen ñuc bʌ tsiʼ mele jiñʌch cheʼ maʼañic tsiʼ cʌyʌ Jehová anquese tsiʼ qʼuele chaʼan yambʌlob tsiʼ tajayob i sajtemal yicʼot tsiʼ melbeyob mach bʌ weñic. Come xucʼul tsaʼ ajñi, José tsiʼ qʼuele chaʼan Jehová tsaʼʌch i colta i tsiʼ yʌqʼue i bendición yicʼot i familia.

16. ¿Chucoch yom mi lac ñumen lʌcʼtesan lac bʌ ti Jehová cheʼ mi lac melbentel mach bʌ tojic yaʼ ti congregación?

¹⁶ Cheʼ bajcheʼ tsiʼ mele José, yom mi laj qʼuel ti ñuc yicʼot laj cʌntan bajcheʼ añonla la quicʼot Jehová. Mach yomic mi laj cʌcʼ chaʼan i sajtemal jiñi hermanojob miʼ ñajtʼesañonla ti jiñi Dios muʼ bʌ lac cʼuxbin yicʼot lac chʼujutesan (Romanos 8:38, 39). Mi tsaʼ melbentiyonla mach bʌ tojic yaʼ ti congregación, laʼ lac tsajcʌben i melbal José yicʼot mi lac ñumen lʌcʼtesan lac bʌ ti Jehová. Laʼ laj qʼuel jiñi muʼ bʌ i yujtel cheʼ bajcheʼ miʼ qʼuel Dios. Laʼ lac chaʼlen wersa chaʼan mi lac tojʼesan jiñi wocol cheʼ bajcheʼ miʼ yʌl jiñi principio tac. Ti wiʼil mi laj cʌyben tiʼ wenta Jehová. Yom mi lac ñop chaʼan mucʼʌch caj i tojʼesan jiñi wocol cheʼ i yorajlelix miʼ qʼuel.

YOM MI LAC ÑOP «JINI XMELOÑEL MUʼ BɅ I MEL PEJTEL AÑOʼ BɅ TI PAÑIMIL»

17. ¿Bajcheʼ miʼ mejlel lac pʌs lac ñopoñel ti «jini xmeloñel muʼ bʌ i mel pejtel añoʼ bʌ ti pañimil»?

¹⁷ Cheʼ wʌʼto chumulonla ti ili jontol bʌ pañimil, wersa mi caj laj qʼuel mach bʌ tojic. An i tajol, mi caj i melob mach bʌ tojic ti lac tojlel yilal o tiʼ tojlel yambʌ hermano yaʼ ti congregación. Mach la cʌcʼ chaʼan miʼ yʌsañonla (Salmo 119:165). Yom chʌn xucʼulonla ti Jehová, laʼ laj cʼajtiben i coltaya yicʼot la cʌcʼ lac ñopoñel tiʼ tojlel. Yom mi laj cʼajtesan chaʼan xmulilonla, jin chaʼan, tajol maʼañic tsaʼ lac wen chʼʌmbe isujm tsaʼ bʌ ujti i mach wen la cujilic. Yom mi lac tsajcʌben i melbal José i maʼañic mi la cʌl yañoʼ bʌ, come mucʼ jach i ñumen ñucʼan jiñi wocol. Cojix bʌ, mach yomic mi lac ñop lac bajñel tojʼesan jiñi wocol tac, ti jumpʼejl lac pusicʼal yom chʌn xucʼulonla yicʼot mi lac pijtan chaʼan Jehová miʼ tojʼesan jiñi wocol. Mi mucʼʌch lac mel, Jehová mi caj i qʼuelonla ti utsʼat yicʼot mi caj i yʌqʼueñonla bendición, cheʼ bajcheʼ José. Miʼ mejlel lac ñop chaʼan «jini xmeloñel muʼ bʌ i mel pejtel añoʼ bʌ ti pañimil» mucʼʌch caj i chʌn mel chuqui toj come «tojʌch pejtelel muʼ bʌ i mel» (Génesis 18:25; Deuteronomio 32:4).

18. ¿Chuqui mi caj laj qʼuel yaʼ ti yambʌ temaj?

¹⁸ Ti jiñi yambʌ temaj, mi caj laj qʼuel yambʌ chaʼpʼejl ejemplo chaʼan jiñi mach bʌ tojic tsaʼ ujti wajali yaʼ tiʼ tejclum Jehová. Yaʼi mi caj laj cʌn bajcheʼ miʼ coltañonla jiñi lac pecʼlel yicʼot cheʼ mucʼʌch lac ñusʌben lac bʌ chaʼan lajal mi laj qʼuel cheʼ bajcheʼ miʼ qʼuel Jehová chuqui toj bʌ.