¿Chuqui miʼ mejlel i coltañet cheʼ maʼañic maʼ mejlel ti loqʼuel ti a wotot?
¿A bajñel ba maʼ wubin a bʌ yicʼot maʼañic baqui maʼ mejlel ti majlel? Tajol cheʼ maʼ wubin bajcheʼ jiñi salmista tsaʼ bʌ i yʌlʌ: «Lajalon bajcheʼ xpuruwoc tʼuchul bʌ tiʼ jol otot tiʼ bajñelil» (Salmo 102:7). Jiñi ticʼojel tac am bʌ ti Biblia miʼ mejlel i coltañet cheʼ maʼañic maʼ mejlel ti loqʼuel.
Mach a cʌy jiñi i chaʼan tac bʌ Dios
Anquese maʼañic maʼ mejlel ti loqʼuel, miʼ mejlel a taj a tijicñʌyel cheʼ mucʼʌch a ñaʼtan chaʼan i cʼʌjñibalʌch a chaʼan i chaʼan tac bʌ Dios yicʼot maʼ mel (Mateo 5:3, 6). Qʼuele chuqui tac muʼ bʌ i mejlel i coltañet.
Jumpʼejl Biblia am bʌ ti internet toj bʌ yicʼot mach bʌ wocolic ti pejcʌntel
Video tac mach bʌ wen tamic muʼ bʌ i pʌs chuqui tac miʼ cʌntesañonla jiñi Biblia
Jiñi sección «Cʼajtiya tac chaʼan bʌ Biblia» miʼ yʌqʼuen i jacʼbal cʼajtiya tac am bʌ i mele lac piʼʌlob
Jiñi sección «¿Am ba majqui tsiʼ mele?» miʼ pʌs chaʼan wen utsʼatax yicʼot chaʼan wen bajcheʼ melbil pejtelel chuqui an ti pañimil
Pejcan texto tac muʼ bʌ i tijicñesan a pusicʼal
Ili texto tac an i colta cabʌl lac piʼʌlob chaʼan miʼ tajob i tijicñʌyel. Cheʼ bʌ maʼ pejcan, aqʼuen i yorajlel chaʼan maʼ wen ñaʼtan jujumpʼejl versículo i chaʼan maʼ mel oración (Marcos 1:35).
Salmo 23:1-6
Salmo 34:1-22
Salmo 46:1-11
Salmo 63:6-8
Salmo 91:1-6
Sʌclan chucoch miʼ yujtel mach tac bʌ weñic ti pañimil
Mach wocolic mi caj a ñusan chuqui mach tac bʌ weñic miʼ yujtel ti pañimil miʼ mucʼʌch a ñaʼtan chucoch miʼ yujtel yicʼot maʼ cʌn bajcheʼ Dios mi caj i tojʼesan (Isaías 65:17).
Mach a cʌlʌx cʼojoʼtan a bʌ
Ñuc i cʼʌjñibal cheʼ maʼ tic a bʌ chaʼan bajcheʼ yubil maʼ wubin cheʼ maʼañic maʼ mejlel ti loqʼuel (Mateo 6:25).
Sʌclan wem bʌ a wamigojob
Jiñi laʼ camigojob mucʼʌch i wen coltañoñobla, ñumento cheʼ maʼañic miʼ lac mejlel ti loqʼuel. Mi maʼañic maʼ mejlel ti loqʼuel ti a wotot, miʼ mejlel a pejcan jiñi a wamigojob ti teléfono o ti videollamda. Cheʼ bajcheʼ jiñi, chʌn lʌcʼʌl mi caj i yajñel a wicʼotob i tajol miʼ mejlel a cʌn yañoʼ bʌ. Ila mi caj a taj tema tac muʼ bʌ caj i mejlel i coltañet chaʼan maʼ taj wem bʌ amigojob yicʼot chaʼan maʼ sujtel ti wem bʌ amigo (Proverbios 17:17).
● ¿Majqui jiñi i sujm bʌ la camigo?
● Mi mejlel a taj a wamigojob baqui mach ñaʼtʌbilic a chaʼan.
Mele ejercicio
Jiñi Biblia miʼ subeñonla chaʼan wen cheʼ mi lac mel ejercicio (1 Timoteo 4:8). Miʼ coltañonla chaʼan wen chuqui mi lac pensarin, ñumento cheʼ maʼañic mi lac mejlel ti loqʼuel. Anquese mach mejletic ti loqʼuel ti a wotot, tajol añʌch chuqui mi caj i mejlel a mel chaʼan mach cheʼ jach añet.