¿Muʼ ba mejlel i tajob i coltʌntel ti Biblia jiñi ñusʌbiloʼ bʌ i chaʼañob wocol tiʼ caj jiñi clima?

Jiñi huracán tac, jiñi tifón, jiñi ciclón yicʼot jiñi sutujt icʼ tac miʼ tejchel cabʌl wocol bajcheʼ butʼjaʼlel. Cheʼ cʌlʌxix miʼ ñumel jaʼal miʼ jem tac jubel jiñi lum i cheʼ bʌ cʌlʌxix chajc miʼ wen pul majlel mateʼel. I mach jiñic jach jiñi, jiñi jajmeñal, jiñi ticwal yicʼot cheʼ miʼ yajlel tac hielo miʼ wen acʼ ti ujtel wocol tac jaʼel. Yonlel lac piʼʌlob an i ñusayob ili wocol tac. ¿Ñusʌbil ba a chaʼan jaʼel?

Tiʼ petol pañimil cabʌl wocol an i yʌcʼʌ jiñi butʼ jaʼlel o yan tac bʌ come cʌlʌxix woliʼ yujtel yicʼot wen tsʌtsix. Jumpʼejl informe chaʼan jiñi Federación Internacional de Sociedades de la Cruz Roja yicʼot chaʼan Media Luna Roja, miʼ yʌl: «Cabʌlix lac piʼʌlob an i ñusayob ili wocol tiʼ caj woliʼ wen ñumel butʼjaʼ yicʼot jajmeñal. An i yʌcʼʌ chaʼan yonlel lac piʼʌlob maʼañix miʼ tajob baqui yom miʼ chumtʌlob yicʼot chaʼan maʼañic miʼ tajob chuqui i cʼʌjñibal i chaʼañob».

Jiñi muʼ bʌ i ñusañob jiñi wocol, mach weñix miʼ cʌytʌlob yicʼot miʼ wen ubiñob i chʼijyemlel. Cabʌlob miʼ sʌtob i yotot, chuqui tac añob i chaʼan i an i tajol an majqui miʼ chʌmelob i chaʼan.

¿Am baʼ ñusa jaʼel bajcheʼ jiñi? Jiñi Biblia miʼ mejlel i coltañet. Añix i colta cabʌl lac piʼʌlob, ¿bajcheʼ? Jiñʌch cheʼ bʌ miʼ ñuqʼuesʌbeñob i pusicʼal, miʼ yʌqʼueñob i pijtaya yicʼot wen tac bʌ ticʼojel (Romanos 15:4). Cheʼ jaʼel, jiñi Biblia miʼ jacʼ ili cʼajtiya tac ñʌmʌl bʌ i melbeñob i bʌ jiñi lac piʼʌlob: ¿Chucoch Dios miʼ yʌcʼ ti ujtel ili wocol tac? ¿Woli ba i yʌqʼueñonla lac toj lac mul?

Dios maʼañic woliʼ cʼʌn chaʼan miʼ yʌqʼueñonla lac toj lac mul

Dios mach jiñic i mul chaʼan jiñi lac piʼʌlob miʼ ñusañob wocol. Jiñi Biblia miʼ yʌl chaʼan «Dios maʼañic miʼ cʼʌn jiñi wocol tac chaʼan miʼ qʼuel lac pusicʼal i maʼañic miʼ mejlel laj qʼuelben i pusicʼal jaʼel» (Santiago 1:13). Jin chaʼan Dios mach jiñic woliʼ yʌcʼ jiñi wocol tac woli bʌ i yujtel tiʼ caj wen qʼuexelix jiñi clima.

I sujmʌch chaʼan jiñi Biblia miʼ yʌl chaʼan ti wajali, Dios tsiʼ cʼʌñʌ jiñi wocol tac chaʼan miʼ yʌqʼuen i toj i mul jiñi jontol bʌ lac piʼʌlob. Pero ili ora qʼuexelix come mach la cujilic bajcheʼ ora miʼ waʼ tilel jiñi wocol tac i miʼ ticʼlan jiñi jontoloʼ bʌ yicʼot mach bʌ jontolobic. Pero ti wajali, Dios miʼ ñaxan sub chuqui mi caj i yujtel, miʼ tsictesan chucoch mi caj i choc tilel yicʼot miʼ cʌntan jiñi mach bʌ añobic i mul. Laʼcu lac ñaʼtan cheʼ bʌ Dios tsiʼ yʌlʌ chaʼan mi caj i choc tilel jiñi butʼjaʼ cheʼ tiʼ yorajlel Noé, an chuqui uxchajp tsaʼ bʌ mele. Cheʼ bʌ anto yom cabʌl jab chaʼan miʼ tilel tsiʼ yʌlʌ chucoch mi caj mel i tsiʼ cʌnta Noé yicʼot i familia (Génesis 6:13; 2 Pedro 2:5).

Mi a womto a ñumen cʌn, pejcan jiñi tema «¿Qué dice la Biblia sobre los desastres naturales?».

Dios mucʼʌch i ñaʼtan jiñi woli bʌ i ñusañob jiñi wocol

Jiñi Biblia miʼ yʌl chaʼan Dios miʼ cʼuxbiñonlaa yicʼot cʼux miʼ yubin cheʼ bʌ mi lac ñusan wocol. Qʼuele ili chaʼpʼejl ejemplo.

• Isaías 63:9: «Tiʼ pejtelel i wocol c tat lojon [Dios] tsaʼ wubi wocol».

  Yom bʌ i yʌl: Jehová cʼux miʼ yubin cheʼ bʌ mi lac ñusan wocol.

• 1 Pedro 5:7: «Dios mucʼʌch i ñaʼtañetla».

  Yom bʌ i yʌl: Jehová yom chaʼan wen mi la cajñel.

Jehová miʼ wen cʼuxbin jiñi lac piʼʌlob, jin chaʼan yom i coltañob. ¿I baqui an jiñi coltʌntel? Yaʼan ti Biblia. Yaʼi mi lac taj wen tac bʌ ticʼojel yicʼot jumpʼejl lac pijtaya chaʼan jiñi talto bʌ qʼuin baqui maʼañix miʼ cajel wocol (2 Corintios 1:3, 4).

Maʼañix miʼ cajel jiñi wocol tiʼ caj qʼuexelix jiñi clima

Yaʼ ti Biblia, Jehová miʼ yʌcʼ i tʼan: «Com cʌqʼueñetla chuqui utsʼat woli bʌ laʼ pijtan» (Jeremías 29:11). Dios mach yomic chaʼan mi lac ñusan wocol tiʼ caj jiñi clima. Yom chaʼan tijicña mi la cajñel ti jumpʼejl paraíso ila ti Lum (Génesis 1:28; 2:15; Isaías 32:18).

Mi caj i mel jiñi cheʼ bʌ miʼ cʼʌn jiñi i Yumʌntel, ¿i chuqui jiñi i Yumʌntel? Jumpʼejlʌch Yumʌntel am bʌ ti panchan i Jesús jiñʌch jiñi Rey (Mateo 6:10). Jesús an i ñaʼtʌbal yicʼot i pʼʌtʌlel chaʼan miʼ ticʼ muʼ tac bʌ i yujtel ila ti Lum, jiñi pʼʌtʌlel tsiʼ pʌsʌ cheʼ bʌ tsajñi ila ti Lum (Marcos 4:37-41). I ti talto bʌ qʼuin mi caj i pʌsbeñonla bajcheʼ yom mi laj cʌntan jiñi Lum yicʼot chaʼan wen mi la cajñel yicʼot jiñi melbil tac bʌ, cheʼ bajcheʼ jiñi mi caj i pʌs chaʼan wen an i ñaʼtʌbal (Isaías 11:2). Come Jesús mi caj i yuman ili pañimil mi caj i chʼʌm tiʼ wenta chaʼan maʼañic majqui miʼ ñusan wocol tiʼ caj jiñi clima.

Tajol maʼ cʼajtiben a bʌ jalaqui mi caj i tsʼʌctiyel pejtelel iliyi. Mi a wom a tajben i jacʼbal, pejcan jiñi tema «¿Jala mi caj i chʼʌm tiʼ wenta ili Pañimil jiñi i Yumʌntel Dios?».

¿Chuqui miʼ mejlel a mel ili ora?

Jiñi ticʼojel tac am bʌ ti Biblia miʼ mejlel i coltañet cheʼ bʌ maxto tejchi jumpʼejl wocol, cheʼ bʌ tejchemix yicʼot cheʼ bʌ tsaʼix ñumi.

• 

  Cheʼ bʌ maxto tejchi: Wʌn chajpan a bʌ chaʼan maʼ ñaʼtan chuqui mi caj a mel ti ora.

  Muʼ bʌ i yʌl jiñi Biblia: «Jini cʌntesʌbil bʌ miʼ wʌn ñaʼtan chuqui bʌbʌqʼuen miʼ yujtel. Miʼ chajpan i bʌ. Jini tonto bʌ maʼanic miʼ yotsan tiʼ pusicʼal. Muqʼuix i toj» (Proverbios 22:3).

  Yom bʌ i yʌl: Wʌn ñaʼtan chuqui tac ti wocol miʼ mejlel ti ujtel yaʼ baqui chumulet. Cheʼ bajcheʼ jiñi mi caj a wʌn chajpan a bʌ chaʼan chuqui yom maʼ mel ti ora yicʼot chaʼan maʼ cʌntan a familia.

  Tsaʼ bʌ ujti: «Tsaʼ puli yaʼ baqui chumulon lojon i tsaʼ putsʼiyon lon loqʼuel. Jiñi lac piʼʌlob tsiʼ wen chaʼleyob bʌqʼuen, maʼañic majqui yujil chuqui yom miʼ mejlel. Pero joñon lon wʌn chajpʌbiloñix lon. An lon c mochila de emergencia, tsʼac yicʼot lon c pislel. Añʌch i coltayon lojon cheʼ wʌn chajpʌbilon lojon» (Tamara, California, Estados Unidos).

• 

  Cheʼ tsaʼix tejchi: Ñaʼtan jiñi ñumen ñuc bʌ i cʼʌjñibal.

  Muʼ bʌ i yʌl jiñi Biblia: «Anquese juntiquil an cabʌl i chubʌʼan, jiñi i chubʌʼan tac maʼañic miʼ mejlel i yʌqʼuen i cuxtʌlel» (Lucas 12:15).

  Yom bʌ i yʌl: Jiñi laj cuxtʌlel jiñʌch ñumen ñuc bʌ i cʼʌjñibal.

  Tsaʼ bʌ ujti: «Cheʼ bʌ jiñi tifón Lawinb tsiʼ jeme lon cotot, maʼañic tsaʼ c wen ñaʼta chuqui yom mic mel, cabʌl chuqui an tic jol. Pero cheʼ jiñi tsaʼ c melbe oración Jehová i tsaʼ c sube bajcheʼ yubil mi cubin. Tsaʼ j qʼuele chaʼan anquese tsaʼ lon c sʌtʌ lon cotot maʼañic tsaʼ chʌmiyon lojon» (Leslie, Filipinas).

• 

  Cheʼ bʌ tsaʼix ñumi: Ñaʼtan ili qʼuin i mach jiñic muʼ bʌ i yujtel ijcʼʌl.

  Muʼ bʌ i yʌl jiñi Biblia: «Mach laʼ cʼojoʼtan chuqui mi caj i yujtel ijcʼʌl come yambʌyix chuqui mi caj laʼ cʼojoʼtan» (Mateo 6:34).

  Yom bʌ i yʌl: Mach a wen ñaʼtan jiñi muʼ bʌ i mejlel ti ujtel ijcʼʌl.

  Tsaʼ bʌ ujti: «Cheʼ bʌ jiñi cotot tsaʼ bujtʼi ti jaʼ tiʼ caj jiñi huracán Irma, tsaʼ c wen mele c pensar. Cabʌl chuqui yom mic mel i mach cujilic baqui bʌ yom mic mel. Cheʼ jiñi tsaʼ j cʼajtesa chaʼan jiñi Biblia miʼ subeñonla chaʼan mach yomic mi lac wen pensarin chuqui miʼ mejlel ti ujtel ijcʼʌl. Wen utsʼatax bajcheʼ tsiʼ coltayon Jehová chaʼan mic taj c ñʌchʼtʌlel» (Sally, Florida, Estados Unidos).

Mi a wom a cʌn yan tac bʌ ticʼojel, qʼuele jiñi tema «Cuando golpea un desastre. Qué hacer para sobrevivir».