¿Mejl ba lac pijtan chaʼan miʼ tojʼan jiñi wocol chaʼan bʌ taqʼuin?
Tiʼ pejtol pañimil, cabʌl lac piʼʌlob woliʼ loqʼuelob ti marcha come miʼ ñaʼtañob chaʼan mach weñic bajcheʼ woliʼ cʼʌjñel jiñi taqʼuin. Tiʼ caj jiñi COVID-19 an i ñumen tsʌtsʼesa ili wocol, i jiñi lac piʼʌlob ñumen michʼobix. Cheʼ jaʼel, cheʼ maʼañic miʼ mejlelob ti loqʼuel ti yotot, cheʼ woli i jilel i cʼʌjñibal tac bʌ i chaʼañob yicʼot cheʼ mach junlajalic bajcheʼ miʼ tsʼʌcʌntelob miʼ tsictiyel majqui jiñi ricojoʼ bʌ yicʼot jiñi pobrejoʼ bʌ.
¿Muʼ ba caj i jilel ti jumpʼejl bʌ qʼuin jiñi wocol chaʼan taqʼuin muʼ bʌ i wen ticʼlan jiñi lac piʼʌlob? Mucʼʌch. Jiñi Biblia miʼ tsictesan chaʼan Dios mi caj i tojʼesan ili wocol tac.
Wocol tac chaʼan jiñi taqʼuin muʼ bʌ caj i tojʼesan Dios
Jiñi wocol: Jiñi añoʼ bʌ tiʼ wenta chaʼan miʼ qʼuelob bajcheʼ miʼ cʼʌjñel jiñi taqʼuin maʼañic chuqui an mejlem i melob chaʼan miʼ yʌqʼueñob jiñi lac piʼʌlob chuqui i cʼʌjñibalob i chaʼan.
¿Bajcheʼ mi caj i tojʼan? Dios mi caj i jisan jiñi yumʌlob i mi caj i waʼchocon i chaʼan, cʌmbil bʌ bajcheʼ i Yumʌntel Dios. Ili yumʌntel mi caj i chʼʌm tiʼ wenta pejtelel Pañimil (Daniel 2:44; Mateo 6:10).
Jiñi wenlel muʼ bʌ caj i tajtʌl: Jiñi i Yumʌntel Dios mi caj i mel i yeʼtel tiʼ pejtelel Pañimil, i wen mi caj i mel. Jin chaʼan, jiñi lac piʼʌlob maʼañix mi caj i ñusañob pʼumpʼuñiyel i maʼañix mi caj i pensariñob jiñi wocol tac chaʼan bʌ taqʼuin (Salmo 9:7-9, 18). Mi caj i ñusañob i bʌ tiʼ yeʼtel, mi caj i tajob chuqui yomob i tijicña mi caj i yajñelob yicʼot i familia. Yaʼ ti Biblia mi lac taj ili utsʼatax bʌ tʼan: «Winicob mi caj i waʼchocoñob i yotot. Yaʼi mi caj i chumtʌlob. Maʼanic majch mi caj i chilbeñob. Cheʼ miʼ pʌcʼob tsʼusubil, mi caj i cʼuxbeñob i wut. Maʼanic majch mi caj i xujchʼibeñob» (Isaías 65:21, 22).
Jiñi wocol: Jiñi lac piʼʌlob maʼañic chuqui miʼ mejlel i melob chaʼan maʼañic miʼ tajtʌlob ti wocol, jin chaʼan maʼañic miʼ mejlelob i taj chuqui i cʼʌjñibaloʼ bʌ i chaʼan.
¿Bajcheʼ mi caj i tojʼan? Dios mi caj i cʼʌn i Yumʌntel chaʼan miʼ jisan pejtelel chuqui miʼ bʌcʼñañob jiñi lac piʼʌlob.
Jiñi wenlel muʼ bʌ caj i tajtʌl: Dios maʼañix mi caj i yʌcʼ chaʼan miʼ yujtel pejtelel chuqui muʼ bʌ mejlel i jisʌben i cʼʌjñibal tac bʌ i chaʼan jiñi lac piʼʌlob yicʼot i familiajob. Maʼañix miʼ cajel guerra tac, wiʼñal o cʼamʌjel tac muʼ bʌ i pam pujquel (Salmo 46:9; 72:16; Isaías 33:24). Dios miʼ yʌl: «Xucʼul mi caj i chumtʌlob c chaʼañoʼ bʌ. Xucʼul i yotot. Maʼanic majqui mi caj i contrajiñob» (Isaías 32:18).
Jiñi wocol: Lʌcʼʌ tiʼ pejtelel ora, an lac piʼʌlob muʼ bʌ i ticʼlan yañoʼ bʌ tiʼ cajach miʼ bajñel ñaʼtañob i bʌ.
¿Bajcheʼ mi caj i tojʼan? Jiñi muʼ bʌ caj i chumtʌlob cheʼ wolix i mel i yeʼtel jiñi i Yumʌntel Dios mi caj i cʌñob chaʼan mach jiñob jach yom miʼ bajñel ñaʼtañob i bʌ (Mateo 22:37-39).
Jiñi wenlel muʼ bʌ caj i tajtʌl: Cheʼ baʼ ora jiñi i Yumʌntel Dios miʼ chʼʌm tiʼ wenta ili Pañimil, pejtelel quixtañujob mi caj i pʌsob cʼuxbiya maʼañic bʌ miʼ bajñel sʌclan i wenlel (1 Corintios 13:4, 5). Jiñi Biblia miʼ yʌl: «Yaʼ ti chʼujul bʌ wits c chaʼan maʼanix chuqui miʼ lojwel, maʼanix chuqui miʼ yʌcʼ ti asiyel. Cheʼ bajcheʼ miʼ bujtʼel i chʼeñal lum ti jaʼ lajal mi caj i bujtʼel pañimil ti winicob xʼixicob muʼ bʌ i cʌñob lac Yum [Jehová]a» (Isaías 11:9).
Jiñi Biblia miʼ yʌl chaʼan añoñixla ti jiñi cojix tac bʌ qʼuin, i tsʼitaʼ jax yom chaʼan Dios miʼ jisan pejtelel jiñi wocol chaʼan bʌ jiñi taqʼuin (Salmo 12:5).b Pero ili ora, jiñi principio tac am bʌ ti Biblia miʼ mejlel i coltañonla lac ñusan jiñi wocol tac chaʼan bʌ taqʼuin. Jumpʼejl ejemplo, pejcan jiñi tema «¿Bajcheʼ mi lac mejlel ti chumtʌl mi tsʼitaʼ jach lac taqʼuin?» yicʼot «Una opinión realista del dinero».
a Jiñi Biblia miʼ yʌl chaʼan i cʼabaʼ Dios jiñʌch Jehová (Salmo 83:18, Traducción del Nuevo Mundo).
b Mi a wom cʌn chucoch miʼ mejlel a ñop muʼ bʌ i yʌl jiñi Biblia qʼuele jiñi tema «Jiñi Biblia miʼ yʌl i sujmlel».