¿Majqui a wom chaʼan miʼ chaʼlen yumʌntel? | ¿Chuqui miʼ yʌl jiñi Biblia?

Ti chaʼpʼej uxpʼejl semana miʼ cajel votación tac ti cabʌl país, i jiñi lac piʼʌlob mi caj i yajcañob majqui yomob chaʼan miʼ chaʼlen yumʌntel.

¿Chuqui miʼ yʌl jiñi Biblia chaʼan jiñi?

Jiñi yumʌlob an jach baqui jaxʌl miʼ chaʼleñob yumʌntel

Jiñi Biblia miʼ taj ti tʼan chaʼan an jach baqui jaxʌl miʼ chaʼleñob yumʌntel jiñi yumʌlob.

«Mach mi laʼ wʌcʼ laʼ pusicʼal yicʼot jini yumʌlob ti pañimil, come winicob jach. Mach muqʼuic i coltañonla. Cheʼ miʼ cʌy i japob icʼ miʼ sujtelob ti lum.Ti jini jach bʌ qʼuin miʼ toʼol jilel chuqui tsiʼ ñaʼtayob i mel» (Salmo 146:3, 4).

Pejtelel jiñi yumʌlob miʼ chʌmelob, mach yʌlʌyic mi wen miʼ melob i yeʼtel. I anquese mucʼʌch i melob chuqui tac wem bʌ, maʼañic chuqui miʼ mejlel i melob chaʼan jiñi muʼ bʌ caj i yochelob tiʼ qʼuexol weñʌch miʼ chaʼleñob yumʌntel jaʼel (Eclesiastés 2:18, 19).

Jiñi Biblia miʼ yʌl chaʼan jiñi wiñicob maʼañic tsaʼ mejliyob chaʼan miʼ bajñel yumañob i bʌ.

Jiñi wiñic «mach mejlic i bajñel yajcan i bijlel» (Jeremías 10:23).

¿Am ba juntiquil mejl bʌ i sujtel ti wem bʌ yumʌl ili ora?

Jiñi yumʌl yajcʌbil bʌ i chaʼan Dios

Jiñi Biblia miʼ yʌl chaʼan Dios tsiʼ yajca juntiquil yumʌl wen chajpʌbil bʌ yicʼot muʼ bʌ i tsʼʌctesan i tʼan: Jiñʌch Jesucristo (Salmo 2:6). Jesús jiñʌch jiñi Rey tiʼ Yumʌntel Dios, jumpʼejl yumʌntel am bʌ ti panchan i woli bʌ ti yumʌntel yaʼi (Mateo 6:10).

¿Muʼ ba caj a yajcan Jesús chaʼan miʼ chaʼlen yumʌntel? Jiñi Biblia miʼ yʌl chucoch ñuc i cʼʌjñibal iliyi:

«Tsʼujtsʼunla [Jesucristo] i Yalobil lac Yum ame michʼac, ame jiliquetla ti laʼ bijlel cheʼ miʼ bʌcʼ michʼan Dios. Tijicñayob pejtel muʼ bʌ i sʌclañob i coltʌntel ti lac Yum» (Salmo 2:12).

Ili ora yomix mi lac ñaʼtan chuqui mi caj lac mel. Cheʼ bajcheʼ miʼ yʌl jiñi profecía tac am bʌ ti Biblia, Jesús tsiʼ techeʼ yumʌntel ti 1914. Jiñi profecía tac miʼ yʌl jaʼel chaʼan jiñi i Yumʌntel Dios lʌcʼʌlix mi caj i jisan pejtelel jiñi yumʌlob añoʼ bʌ ila ti Pañimil (Daniel 2:44).

Mi a wom a ñaʼtan bajcheʼ miʼ mejlel a coltan i yumʌntel Jesús, pejcan jiñi tema «Laʼ laj coltan jiñi i Yumʌntel Dios ili ora».