¿Majqui mi caj i cʌntan lac piʼʌlob? | ¿Chuqui miʼ yʌl jiñi Biblia?

Jiñi Naciones Unidas miʼ yʌl iliyi:

• Ti 7 cʼʌlʌl 23 de octubre, 2023, tsaʼix chʌmiyob ñumen ti 6 mil 400 lac piʼʌlob yicʼot an 15 mil 200 tsaʼ bʌ lojwiyob. Cheʼ jaʼel, yonlel lac piʼʌlob tsaʼix bʌ i cʌyʌyob i yotot.

• Cʼʌlʌl ti 24 de septiembre, 2023, chʌmeñobix 9 mil 701 lac piʼʌlob yicʼot an 17 mil 748 lojweñoʼ bʌ tiʼ caj jiñi guerra am bʌ i chaʼan Rusia yicʼot Ucrania.

¿Am ba chuqui miʼ yʌl jiñi Biblia muʼ bʌ i yʌqʼuen i pijtaya jiñi woli bʌ i ñusañob wocol tiʼ caj jiñi guerra?

Junchajp muʼ bʌ i yʌqʼueñonla lac pijtaya

Jiñi Biblia miʼ yʌl chaʼan Dios mi caj i jisan jiñi guerra tac tiʼ petol pañimil (Salmo 46:9). Chaʼan miʼ mejlel i mel, mi caj i cʼʌn jiñi i Yumʌntel am bʌ ti panchan chaʼan miʼ jisan jiñi yumʌlob ti pañimil (Daniel 2:44). Jiñi i Yumʌntel mi caj i yʌcʼ chaʼan tijicña miʼ yajñel lac piʼʌlob.

Qʼuelela chuqui mi caj i mel Jesucristo, jiñi Rey yaʼ tiʼ Yumʌntel Dios:

• «Miʼ locʼsan ti wocol jini pʼumpʼun bʌ cheʼ miʼ cʼajtiben, yicʼot jini ticʼlʌbil bʌ mach bʌ anic majqui miʼ coltan. Miʼ pʼuntan jini cʼun bʌ yicʼot jini pʼumpʼun bʌ. Miʼ coltan jini pʼumpʼuñoʼ bʌ. Mi caj i mʌn jini ticʼlʌbiloʼ bʌ yicʼot jini chuculoʼ bʌ ti jontolil chaʼan miʼ yʌcʼob ti colel» (Salmo 72:12-14).

Dios mi caj i cʼʌn jiñi Yumʌntel chaʼan miʼ junyajl jisan jiñi wocol tac yicʼot jiñi chʼijyemlel am bʌ i yʌcʼʌ jiñi guerra yicʼot jiñi jontolil.

• «Mi caj i sujcubeñob i yaʼlel i wut, maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel. Jiñi an tac bʌ ti ñaxan tsaʼix jili» (Apocalipsis 21:4).

Tsʼitaʼ jachix yom chaʼan jiñi i Yumʌntel Dios miʼ qʼuextan bajcheʼ yilal an ili pañimil. ¿Bajcheʼ la cujil? Come jiñi Biblia tsiʼ wʌn alʌ chaʼan miʼ cajel «guerra tac ti cabʌl tejclum» (Mateo 24:6). Pejtelel woli bʌ ti ujtel miʼ pʌs chaʼan chumuloñixla tiʼ «cojix tac bʌ qʼuin» jiñi yumʌlob (2 Timoteo 3:1).