¿Mucʼʌch ba i mejlel i tem lac piʼʌlob jiñi Juegos Olímpicos? | ¿Chuqui miʼ yʌl jiñi Biblia?

Ti 2024, cheʼ bʌ 5 mil millón lac piʼʌlob mi caj i qʼuelob jiñi Juegos Olímpicos, mi caj i cʼotel xʼalasob tilemoʼ bʌ ti 206 país yicʼot territorio. Jiñi presidente chaʼan Comité Olímpico Internacional, Thomas Bach, tsiʼ yʌlʌ: «Woli lac mel jumpʼejl evento muʼ bʌ i coltan chaʼan temel lac piʼʌlob». I tsiʼ bej alʌ: «Laʼ laj qʼuel ti ñuc cheʼ jiñi Juegos Olímpicos miʼ cʼajtesʌbeñonla chaʼan yomʌch an ñʌchʼtʌlel yicʼot chaʼan temelonla, anquese mach junlajaloñicla».

¿Muʼ ba caj i chaʼlen coltaya jiñi Juegos Olímpicos chaʼan an ñʌchʼtʌlel yicʼot chaʼan temelonla? ¿Chuqui mi caj i coltañonla chaʼan an ñʌchʼtʌlel yicʼot chaʼan temelonla?

¿Muʼ ba i chaʼlen coltaya chaʼan an ñʌchʼtʌlel yicʼot chaʼan temelonla?

Jiñi Juegos Olímpicos ti ili jabil an i yʌcʼʌ ti ñaʼtʌntel chaʼan mach cojach mi caj i qʼuejlel chaʼan tac bʌ alas. An i yotsa i bʌ tiʼ chaʼan tac bʌ política yicʼot ti chuqui tac miʼ yʌlob lac piʼʌlob muʼ bʌ i yʌcʼ tʼox bʌ, yaʼ ochem bajcheʼ muʼ tac bʌ i cʼajtiñob bajcheʼ i derecho, wocol tac tiʼ caj baqui tilemob, tiʼ caj i ñopbalob yicʼot tiʼ caj mach junlajalic bajcheʼ miʼ ñaʼtañob.

Jiñi evento tac chaʼan deporte cheʼ bajcheʼ jiñi Juegos Olímpicos mucʼʌch i tijicñesan lac piʼʌlob. Pero miʼ pʌs jaʼel chaʼan machʌch junlajalic i ñaʼtʌbalob yicʼot i melbalob, maʼañic miʼ yʌcʼ ñʌchʼtʌlel come mucʼ jach i yʌcʼ chaʼan jiñi lac piʼʌlob cheʼ jach miʼ bej melob bajcheʼ iliyi.

Jiñi Biblia tsaʼix i wʌn alʌ chaʼan jiñi lac piʼʌlob ili ora wocol mi caj i yubiñob chaʼan temel miʼ yajñelob (2 Timoteo 3:1-5). Chaʼan maʼ bej cʌn chaʼan ili profecía, pejcan jiñi tema «¿Predijo la Biblia cómo sería la gente en nuestros días?».

¿Majqui mi caj i coltañonla chaʼan temelonla yicʼot chaʼan an ñʌchʼtʌlel?

Jiñi Biblia miʼ yʌl chaʼan mucʼʌch i mejlel lac taj ñʌchʼtʌlel yicʼot chaʼan mucʼʌch caj lac mejlel ti tem ajñel. MIʼ yʌl chaʼan jiñi lac piʼʌlob ila ti lum temel mi caj i chumtʌlob tiʼ coltaya jiñi «i Yumʌntel Dios» (Lucas 4:43; Mateo 6:10).

I Rey jiñi i Yumʌntel Dios jiñʌch Jesucristo, jiñʌch mi caj i chʼʌm tiʼ wenta chaʼan an ñʌchʼtʌlel ila ti pañimil. Jiñi Biblia miʼ yʌl:

•  «Mux i tajob i wenlel jini tojoʼ bʌ cheʼ woli ti yumʌl» (Salmo 72:7).

•  «Miʼ locʼsan ti wocol jini pʼumpʼun bʌ cheʼ miʼ cʼajtiben [...]. Mi caj i mʌn jini ticʼlʌbiloʼ bʌ yicʼot jini chuculoʼ bʌ ti jontolil chaʼan miʼ yʌcʼob ti colel» (Salmo 72:12, 14).

Ili ora jiñi i cʌntesa tac Jesús an i colta yonlel lac piʼʌlob añoʼ bʌ ti 239 país yicʼot territorio chaʼan temel miʼ yajñelob. Jiñi i testigojob Jehová tiʼ petol pañimil miʼ lajiñob Cristo jin chaʼan an i cʌñʌyob i sʌclañob ñʌchʼtʌlel. Mi a wom a ñaʼtan bajcheʼ an i meleyob, pejcan jiñi revista Lac Tsictesʌbentel am bʌ i temajlel «Miʼ mejlel ti jisʌntel jiñi tsʼaʼleya».