Anquese jiñi i testigojob Jehová mach lecojic miʼ qʼuelob jiñi ceremonia tac chaʼan jumpʼejl país, ¿chucoch maʼañic miʼ yotsañob i bʌ?

Jiñi i testigojonbʌlon Jehová mi lon j qʼuel ti ñuc jiñi yumʌlob i mach lecojic mi lon j qʼuel jiñi bandera, muʼ bʌ i chaʼleñob ti saludar, miʼ yʌlob jiñi juramento o miʼ cʼʌyiñob jiñi himno nacional.

Pero maʼañic mi cotsan lon c bʌ ti jiñi ceremonia tac come maʼañic miʼ taj i bʌ yicʼot muʼ bʌ i yʌl jiñi Biblia. Mi lon j qʼuel ti ñuc cheʼ yambʌlob miʼ qʼuelob ti ñuc muʼ bʌ lon c ñop cheʼ bajcheʼ mi lon j qʼuel ti ñuc chuqui miʼ ñopob.

Ti ili tema, mi caj i jajqʼuel ili cʼajtiya tac:

• ¿Chuqui miʼ yʌl jiñi Biblia chaʼan ili tema?

• ¿Chuqui mi lon c mel mi jiñi yumʌlob miʼ xicʼon lojon chaʼan mi lon cotsan lon c bʌ?

• ¿Yom ba i qʼuextañob chaʼan tac bʌ política o yan tac bʌ wocol jiñi i testigojob Jehová?

¿Chuqui miʼ yʌl jiñi Biblia chaʼan ili tema?

Qʼuele chaʼpʼejl principio loqʼuem bʌ ti Biblia baqui chucul muʼ bʌ lon c ñop:

• Cojach Dios yom mi lac chʼujutesan. Jiñi Biblia miʼ yʌl: «Chʼujutesan jiñi a Dios Jehová i jin jach yom maʼ melben i yeʼtel» (Lucas 4:8). Jiñi juramento a la bandera yicʼot jiñi himno nacional an i tajol miʼ chʼʌm tilel tʼan tac muʼ bʌ i yʌcʼ ti ñaʼtʌntel chaʼan jiñʌch mi caj a ñaxan acʼ jiñi país. Jin chaʼan, jiñi lon j conciencia maʼañic miʼ yʌcʼ chaʼan mi cotsan lon c bʌ ti jiñi ceremonia tac.

  Jiñi i testigojonbʌlon Jehová mi lon c ñaʼtan chaʼan cheʼ miʼ chaʼlentel ti saludar jiñi bandera woliyʌch i chʼujutesʌntel melbil tac jach bʌ dios, ili junchajpʌch muʼ bʌ i yʌl jiñi Biblia chaʼan mach weñic (1 Corintios 10:14). An historiadorob muʼ bʌ i yʌlob chaʼan jiñi bandera miʼ cʼʌjñel chaʼan chʼujutesaya. Jiñi historiador Carlton Hayes tiʼ tsʼijbu: «Jiñi bandera nacional jiñʌch muʼ bʌ i ñumen cʼʌjñel chaʼan chʼujutesaya».a Cheʼ bʌ jiñi escritor Daniel Mannix tsiʼ taja ti tʼan jiñi ñaxam bʌ xñoptʼañob tsiʼ yʌlʌ: «Jiñi xñoptʼañob maʼañic [...] tsiʼ jacʼʌ i yʌqʼueñob sacrificio jiñi emperador [romano], ili ora lajal bajcheʼ maʼañic miʼ chaʼlentel ti saludar jiñi bandera».b

  Jiñi i testigojonbʌlon Jehová maʼañic mi lon c chaʼlen ti saludar jiñi bandera, pero maʼañic mi lon c pul, mach lecojic mi lon j qʼuel yicʼot maʼañic chuqui mi lon c tumben, yaʼ ochem jaʼel yan tac bʌ muʼ bʌ i cʼʌjñel ti jiñi ceremonia tac chaʼan jiñi país.

• Junlajalonla tiʼ wut Dios (Hechos 10:34, 35). Jiñi Biblia miʼ yʌl chaʼan Dios «tiʼ tojlel juntiquil wiñic tsiʼ mele jujunmojt lac piʼʌlob» (Hechos 17:26). Jin chaʼan, jiñi i testigojonbʌlon Jehová mi lon c ñop chaʼan mach weñic cheʼ mi lon c ñumen qʼuel ti ñuc junmojt lac piʼʌlob tiʼ caj baqui tilemob. Mi lon j qʼuel ti ñuc pejtelel lac piʼʌlob, mach yʌlʌyic baqui tilemob o baqui chʼoyolob (1 Pedro 2:17).

¿Chuqui mi lon c mel mi jiñi yumʌlob miʼ xicʼon lojon chaʼan mi lon cotsan lon c bʌ?

Jiñi i testigojonbʌlon Jehová maʼañic mi lon j contrajin jiñi yumʌlob. Mi lon c ñop chaʼan Dios miʼ yʌcʼ chaʼan jiñi yumʌlob miʼ melob i yeʼtel bajcheʼ junchajp waʼchocobil bʌ i chaʼan (Romanos 13:1-7). Mi lon c ñop jaʼel chaʼan jiñi xñoptʼañob yom miʼ jacʼbeñob i tʼan jiñi yumʌlob (Lucas 20:25).

Pero ¿chuqui mi lon c mel mi jiñi mandar tac ti jumpʼejl país miʼ yʌl chaʼan mi lon c mel maʼañic bʌ miʼ mulan Dios? An i tajol miʼ mejlel ti aqʼuentel jumpʼejl solicitud jiñi yumʌlob chaʼan miʼ tsʼitaʼ qʼuextʌyel jiñi mandar tac.c Pero cheʼ bʌ maʼañic chuqui miʼ mejlel ti qʼuextʌyel, jiñi i testigojonbʌlon Jehová mi lon c chʌn qʼuel ti ñuc jiñi yumʌlob, pero mi lon c chaʼlen wersa «lon c ñumen jacʼben i tʼan Dios bajcheʼ yumʌl i mach jiñic jiñi wiñicob» (Hechos 5:29).

¿Yom ba i qʼuextañob chaʼan tac bʌ política o yan tac bʌ wocol jiñi i testigojob Jehová?

Maʼañic. Jiñi i testigojonbʌlon Jehová maʼañic mi cotsan lon c bʌ ti política o yan tac bʌ wocol am bʌ ili ora. Maʼañic mi lon cʌl jiñi juramento, maʼañic mi lon c chaʼlen ti saludar jiñi bandera i maʼañic mi lon j cʼʌyin jiñi himno nacional, pero mach chaʼañic añon lon tiʼ contra jiñi mandar tac am bʌ ti jumpʼejl país. Mi lon c mel iliyi come mi lon c jacʼ muʼ bʌ i yʌl jiñi Biblia chaʼan jiñi ceremonia tac.