¿Chuqui jiñi i Yumʌntel Dios?
I jacʼbal muʼ bʌ i yʌcʼ jiñi Biblia
Jiñi i Yumʌntel Dios jumpʼejlʌch yumʌntel tsaʼ bʌ i waʼchoco Jehová. Come iliyi an ti panchan, jiñi Biblia miʼ suben jaʼel bajcheʼ «i yumʌntel panchan» (Marcos 1:14, 15; Mateo 4:17). Anquese ili yumʌntel añʌch chuqui tac an i chaʼan cheʼ bajcheʼ an i chaʼan jiñi yumʌlob ti pañimil, ñumen wento chuqui an i chaʼan.
Muʼ bʌ caj i chaʼleñob yumʌntel. Dios tsiʼ yajca Jesucristo chaʼan jin miʼ yochel bajcheʼ Rey ti jiñi i Yumʌntel i tsaʼ aqʼuenti ñumen ñuc i yeʼtel i mach cheʼic bajcheʼ jiñi yumʌlob ti pañimil (Mateo 28:18). Jesús wen mi caj i mel i yeʼtel. I añix i pʌsʌ chaʼan jiñʌch ñumen wem bʌ yumʌl yic’ot muʼ bʌ i pʌs i pʼuntaya (Mateo 4:23; Marcos 1:40, 41; 6:31-34; Lucas 7:11-17). Tiʼ coltaya Dios, Jesús an i yajca lac piʼʌlob loqʼuemoʼ bʌ ti yan tac bʌ tejclum chaʼan miʼ majlelob ti panchan i chaʼan miʼ yumañob ili Pañimil (Apocalipsis 5:9, 10).
¿Bajcheʼ jalel mi caj i chaʼleñob yumʌntel? Jiñi yumʌlob ti pañimil mucʼ jach i qʼuextʌyelob, pero jiñi i Yumʌntel Dios «mi caj i yajñel tiʼ pejtelel ora» (Daniel 2:44).
Jiñi i wiñicob. Majqui jach miʼ mel chuqui yom Dios miʼ mejlel ti ochel tiʼ wiñic jiñi i Yumʌntel Dios, mach yʌlʌyic baqui tsiʼ yila pañimil o majqui jiñi i familia (Hechos 10:34, 35).
Jiñi mandar tac. Jiñi mandar tac am bʌ i chaʼan jiñi i Yumʌntel Dios mach cojach miʼ yʌl chaʼan maʼañic miʼ mejlel mach bʌ weñic. Miʼ suben jiñi i wiñicob jaʼel chaʼan yomʌch miʼ pʌsob wem bʌ i melbal. Jumpʼejl ejemplo, jiñi Biblia miʼ yʌl: «‹Cʼuxbin a Dios Jehová tiʼ pejtelel a pusicʼal, tiʼ pejtelel a cuxtʌlel yicʼot tiʼ pejtelel a ñaʼtʌbal›. Ili jiñʌch jiñi ñaxam bʌ yicʼot ñumen ñuc bʌ i cʼʌjñibal tiʼ pejtelel jiñi mandar. Jiñi i chaʼpʼejlel, lʌcʼʌ lajal bʌ, miʼ yʌl: ‹Cʼuxbin a piʼʌl cheʼ bajcheʼ maʼ bajñel cʼuxbin a bʌ›» (Mateo 22:37-39). Jiñi i cʼuxbiyajob ti Dios yicʼot ti lac piʼʌlob jiñʌch muʼ bʌ i ñijcañob jiñi muʼ bʌ i coltʌbeñob i Yumʌntel Dios chaʼan miʼ pʌsbeñob i yutslel yañoʼ bʌ.
Jiñi cʌntesʌntel. Jiñi i Yumʌntel Dios mach cojach miʼ yʌqʼuen mandar tac jiñi i wiñicob chaʼan miʼ pʌsob wem bʌ i melbal, mucʼʌch i cʌntesañob jaʼel chaʼan miʼ tsʼʌctesañob (Isaías 48:17, 18).
Muʼ bʌ i caj i mel. Jiñi i Yumʌntel Dios mach chaʼañic mi caj i yotsan ti rico jiñi muʼ bʌ caj i chaʼleñob yumʌntel. Muʼ bʌ caj i mel jiñʌch chaʼan miʼ tsʼʌctesʌntel chuqui yom bʌ Dios. I mi caj i tsʼʌctiyel jaʼel jiñi wʌn albil bʌ tiʼ tojlel jiñi muʼ bʌ i cʼuxbiñob Dios: Chaʼan miʼ caj i yʌqʼuentelob i cuxtʌlel mach añic miʼ jilel ti jumpʼejl paraíso wʌʼ ti pañimil (Isaías 35:1, 5, 6; Mateo 6:10; Apocalipsis 21:1-4).