¿Chucoch cheʼ miʼ julaʼtañob jiñi añobix bʌ i ñopbal?

An lon j qʼuele chaʼan cabʌl jiñi añoʼ bʌ i ñopbal mi yubiñob i tijicñʌyel cheʼ bʌ mi lon c suben temaj tac loqʼuem bʌ ti Biblia. I sujmʌch, mi lon j qʼuel ti ñuc ti jujuntiquil jiñi quixtañujob cheʼ añob i bajñel ñopbal, jin chaʼan maʼañic majqui mi lon xicʼ chaʼan miʼ wersa jacʼ jiñi tʼan muʼ bʌ ñumel lon c sub.

Cheʼ bʌ mi lon cʌl temaj tac chaʼan bʌ jiñi ñopbalʌl, mi lon c chaʼlen wersa chaʼan mi lon c pʌs jiñi ticʼojel loqʼuem bʌ ti Biblia «ti uts bʌ tʼan» yicʼot «cʼuxbiya» tiʼ tojlel jiñi quixtañujob (1 Pedro 3:15). Cujil lojon chaʼan an maʼañic bʌ mi caj i ñʌchʼtañob jiñi lon c tʼan (Mateo 10:14). Pero yom mi lac ñaxan pejcan jiñi quixtañujob, come mach lac cujil bajcheʼ yilal mi caj i jacʼob jiñi lac tʼan. Cheʼ jaʼel, miʼ mejlel ti qʼuextʌyel bajcheʼ chumul ti jujuntiquil jiñi quixtañujob.

Jumpʼejl ejemplo, tajol an maʼañic bʌ i yorajlel chaʼan miʼ chaʼlen tʼan ti jumpʼejl bʌ qʼuin come an cabʌl i yeʼtel, pero tajol ti yambʌ qʼuin añʌch i yorajlel chaʼan miʼ chaʼlen tʼan. Cheʼ jaʼel, jiñi quixtañujob miʼ mejlel i tajob tsijiʼ tac bʌ wocol, i jiñi miʼ mejlel i ñijcabeñob i pusicʼal chaʼan miʼ sʌclañob i coltʌntel am bʌ yaʼ ti Biblia. Jin chaʼan, mi lon c chaʼlen wersa chaʼan mach junsujtelic jach mi lac chaʼlen tʼan la quicʼot jiñi quixtañujob.