¿Chucoch Dios maʼañic chuqui tsiʼ mele cheʼ bʌ cabʌl judíojob ti tsʌnsʌntiyob?
Cabʌl lac piʼʌlob miʼ sʌclʌbeñob i jacʼbal ili cʼajtiya, tajol come an majqui tsaʼ chʌmiyob i chaʼan i yomob chaʼan miʼ ñuqʼuesʌbentelob i pusicʼal. An muʼ bʌ i ñaʼtañob chaʼan jiñi Holocausto, yom bʌ i yʌl, cheʼ tsaʼ tsʌnsʌnti cabʌl judíojob, jiñʌch jiñi ñumen tsʌts bʌ jontolil i chaʼan Dios mach yomic i yʌcʼ ti ujtel bajcheʼ jiñi.
Muʼ bʌ i yʌjlel tiʼ tojlel Dios yicʼot jiñi Holocausto
Mach i sujmic: Mulil mi tsaʼ laj cʼajti chucoch Dios tsiʼ yʌcʼʌ ti ujtel jiñi Holocausto.
I sujmʌch: Ti wajali an wiñicob xʼixicob tsaʼ bʌ i cʼajtibeyob i bʌ chucoch Dios miʼ yʌcʼ ti ujtel jiñi wocol tac. Juntiquil jiñʌch jiñi xʼaltʼan Habacuc tsaʼ bʌ i cʼajtibe Dios: «¿Chucoch maʼ wʌqʼueñon j qʼuel ili jontolil, yicʼot i maña winicob?» (Habacuc 1:3). ¿Tsaʼ ba aʼlenti Habacuc cheʼ tsiʼ mele ili cʼajtiya? Maʼañic, Dios tsiʼ yʌcʼʌ ti tsʼijbuntel ti Biblia chaʼan miʼ mejlel lac pejcan.
Mach i sujmic: Dios mach i wentajoñicla cheʼ woli lac ñusan wocol.
I sujmʌch: Dios tsʼaʼ miʼ qʼuel jiñi jontolil yicʼot pejtelel jiñi wocol muʼ bʌ lac ñusan (Proverbios 6:16-19). Jiñi Biblia miʼ yʌl chaʼan cheʼ ti yorajlel Noé, Dios «tsiʼ mele i pusicʼal», yom i yʌl, chʼijyem i pusicʼal cheʼ tsiʼ qʼuele chaʼan cabʌl jax jontolil ila ti Pañimil (Génesis 6:5, 6). Jin chaʼan, miʼ mejlel lac ñop chaʼan Dios wen chʼijiyemʌch tsiʼ yubi i bʌ cheʼ tsaʼ tsʌnsʌnti cabʌl judíojob (Malaquías 3:6).
Mach i sujmic: Dios tsiʼ yʌcʼʌ ti ujtel jiñi Holocausto chaʼan miʼ toj i mul jiñi judíojob.
I sujmʌch: Cheʼ ti jabil 70, Dios tsiʼ yʌcʼʌ chaʼan jiñi romanojob miʼ jisañob Jerusalén (Mateo 23:37–24:2). Cʼʌlʌl ti jimbʌ ora, Dios maʼañic an i colta junmojt lac piʼʌlob mi añic i contrajiyob. Dios «mach yʌñʌlic [miʼ qʼuel] jiñi judío yicʼot jiñi griego» (Romanos 10:12).
Mach i sujmic: Mi Dios mucʼʌch i wen cʼuxbiñonla yicʼot wen pʼʌtʌl, ¿chucoch maʼañic tsiʼ colta jiñi judíojob tsaʼ bʌ wen ticʼlʌntiyob?
I sujmʌch: Dios mach jiñic woliʼ yʌqʼueñonla jiñi wocol, pero mucʼʌch i yʌcʼ ti ujtel (Santiago 1:13; 5:11).
¿Chucoch Dios tsiʼ yʌcʼʌ ti ujtel jiñi Holocausto?
Come yom i yʌcʼ ti cʌjñel miʼ sujmʌch o mach i sujmic jumpʼejl tʼan tsaʼ bʌ ajli ti wajali, jin chaʼan an i yʌcʼʌ ti ujtel cabʌl wocol. Jiñi Biblia jamʌ tsiquil miʼ yʌl chaʼan jiñi Diablo jiñʌch woli bʌ i yuman ili pañimil, i mach jiñic Dios (Lucas 4:1, 2, 6; Juan 12:31). Yaʼ ti Biblia an chaʼpʼejl muʼ bʌ i coltañonla lac chʼʌmben i sujm chucoch maʼañic chuqui tsiʼ mele Dios cheʼ bʌ tsaʼ wen tsʌnsʌntiyob jiñi judíojob.
Dios libre tsiʼ mele jiñi wiñic chaʼan miʼ ñaʼtan chuqui yom i mel. Dios tsiʼ pijta chaʼan Adán yicʼot Eva miʼ jacʼbeñob i tʼan, pero maʼañic tsiʼ wersa xiqʼuiyob. Jiñobʌch tsiʼ bajñel ñaʼtayob chuqui jiñi wem bʌ yicʼot mach bʌ weñic, i jiñi tsaʼ bʌ i meleyob tsiʼ tajbeyob cabʌl i wocolel (Génesis 2:17; 3:6; Romanos 5:12). Cʼʌlʌl ili ora mi lac taj wocol chaʼan tiʼ caj mach wen taquic chuqui mi lac ñaʼtan lac mel. Jumpʼejl libro muʼ bʌ i taj ti tʼan i cʌntesa jiñi judíojob miʼ yʌl: «An cabʌl wocol ti pañimil come mach weñic chuqui tac mi lac bajñel yajcan lac mel» (Statement of Principles of Conservative Judaism). Pero Dios miʼ bej aqʼueñonla i yorajlel chaʼan mi lac ñop lac tojʼesan jiñi wocol tac cheʼ bajcheʼ wen mi laj qʼuel.
Dios yom i tojʼesan pejtelel jiñi wocol am bʌ i yʌcʼʌ jiñi Holocausto, i mucʼʌch i mejlel i mel. Miʼ yʌcʼ i tʼan chaʼan mi caj i chaʼ cuxtesan yonlel lac piʼʌlob tsaʼix bʌ chʌmiyob, yicʼot jaʼel jiñi judíojob tsaʼ bʌ tsʌnsʌntiyob. Cheʼ jaʼel, jiñi tsaʼ bʌ i ñusayob wocol ti jiñi Holocausto i cuxul tsaʼ cʌyleyob maʼañix mi caj i chʌn cʼajtesañob jiñi tsaʼ bʌ ujti (Isaías 65:17; Hechos 24:15). Come Dios miʼ wen cʼuxbiñonla, jin chaʼan mi caj i tsʼʌctesan i tʼan (Juan 3:16).
Cabʌl lac piʼʌlob tsaʼ bʌ i wen ubiyob wocol tiʼ caj jiñi Holocausto tsaʼ cʼoti i tajbeñob i sujmlel i cuxtʌlel yicʼotob i ñopoñel. ¿Chuqui tsiʼ coltayob? Tsaʼ cʼoti i chʼʌmbeñob i sujm chucoch Dios miʼ yʌcʼ ti ujtel jiñi wocol i chuqui mi caj i mel chaʼan miʼ jisan jiñi wocol.