¿Muʼ ba i ñopob chuqui mi yʌl jiñi Antiguo Testamento jiñi i testigojob Jehová?
Mucʼʌch. Jiñi i testigojob Jehová miʼ ñopob chaʼan ‹chʼoyolʌch ti Dios yicʼot chaʼan i cʼʌjñibalʌch› tiʼ pejtelel muʼ bʌ i yʌl jiñi Biblia (2 Timoteo 3:16). Yaʼ ochem jaʼel jiñi Antiguo yicʼot jiñi Nuevo Testamento. Chaʼan maʼañic mi cʌcʼ lojon ti ñaʼtʌntel chaʼan maʼañix i cʼʌjñibal jiñi Antiguo Testamento, joñon lojon bajcheʼ i testigojob Jehová mi lon c suben bajcheʼ Tsʼijbujel Hebreas. Jiñi Nuevo Testamento mi lon c suben bajcheʼ Tsʼijbujel Griegas Cristianas.
¿Chucoch cheʼ añʌch i cʼʌjñibal jiñi Antiguo Testamento chaʼan jiñi xñoptʼañob?
Dios tsiʼ cʼʌñʌ jiñi apóstol Pablo chaʼan miʼ tsʼijbun ili tʼan: «Jiñi tsʼijbubil bʌ ti wajali tsaʼ tsʼijbunti chaʼan mi laj cʌntesʌntel» (Romanos 15:4) Jin chaʼan, miʼ mejlel la cʌl chaʼan jiñi Tsʼijbujel Hebreas miʼ chʼʌm tilel tʼan tac wen ñuc bʌ i cʼʌjñibal. Cheʼ jaʼel, mi lac taj ticʼojel tac yicʼot chuqui tsaʼ bʌ ujti tac ti wajali wen ñuc bʌ i cʼʌjñibal lac chaʼan ti ili ora.
Tsaʼ bʌ ujti tac ti wajali. Jiñi Tsʼijbujel Hebreas miʼ wen tsictesan bajcheʼ tsiʼ mele Dios jiñi Pañimil yicʼot bajcheʼ tsaʼ ochiyob ti xmulil jiñi wiñicob xʼixicob. Ili tʼan tac miʼ coltañonla chaʼan mi lac ñaʼtan baqui tsaʼ tiliyonla yicʼot chucoch cheʼ mi lac chʌmel (Génesis 2:7, 17). Cheʼ jaʼel, yaʼ ti Tsʼijbujel Hebreas miʼ subeñonla bajcheʼ tsiʼ colta Dios jiñi wiñicob xʼixicob ti wajali tsaʼ bʌ i ñusayob wocol tac lajal bʌ bajcheʼ mi lac ñusan jaʼel ti ili ora (Santiago 5:17).
Ticʼojel tac wen ñuc bʌ i cʼʌjñibal. Yaʼ ti Tsʼijbujel Hebreas mi lac taj jaʼel jiñi libro i chaʼan Proverbios yicʼot Eclesiastés, yaʼi mi lac taj cabʌl ticʼojel tac wen ñuc bʌ i cʼʌjñibal lac chaʼan ti ili ora, miʼ subeñonla bajcheʼ mi lac mejlel ti chumtʌl ti tijicña la quicʼot lac familia (Proverbios 15:17), bajcheʼ miʼ mejlel laj qʼuel ti pʼisbil jach jiñi la queʼtel (Proverbios 10:4; Eclesiastés 4:6) yicʼot bajcheʼ miʼ mejlel laj cʼʌn ti wen jiñi laj cuxtʌlel cheʼ bʌ wolito laj colel (Eclesiastés 11:9–12:1).
Wen ñuc i cʼʌjñibal jaʼel cheʼ bʌ mi lac tsajin jiñi i Mandar Moisés cheʼ bajcheʼ miʼ yʌl yaʼ ti Torá o ti jiñi Pentateuco (jiñi ñaxam bʌ joʼpʼejl libro i chaʼan jiñi Biblia). Anquese jiñi xñoptʼañob ti ili ora maʼañix xicʼbilob chaʼan miʼ chʼujbiñob jiñi i Mandar Moisés, pero mucʼʌch mejlel i coltañonla jiñi principio tac am bʌ yaʼ ti jiñi mandar chaʼan mi lac taj lac tijicñʌyel ti ili ora (Levítico 19:18; Deuteronomio 6:5-7).