¿Chucoch maʼañic miʼ yotsañob i bʌ ti política jiñi i testigojob Jehová?
Jiñi i testigojob Jehová maʼañic miʼ yotsañob i bʌ ti política chaʼan tiʼ caj jiñi ñopoloʼ bʌ i chaʼan loqʼuem bʌ ti Biblia. Maʼañic mic tempan lon c bʌ chaʼan mi lon chaʼlen tʼan chaʼan chuqui yom miʼ mejlel tiʼ chaʼan bʌ política, maʼañic majqui mi lon c chaʼlen ti votar, maʼañic mic majlel lojon yaʼ baqui miʼ yajcʌntel jiñi yumʌlob yicʼot maʼañic mi cʌcʼ lojon c tʼan chaʼan miʼ qʼuextʌntel jiñi yumʌlob. Tsaʼ taja lojon yaʼ ti Biblia baqui mi yʌl chaʼan mach weñic cheʼ mi cotsan lojon c bʌ ti política. Jiñʌch tac iliyi:
Yom mi lac lajin jiñi ejemplo i chaʼan Jesús, mach bʌ añic tsiʼ jacʼʌ jumpʼejl eʼtel tiʼ chaʼan bʌ política (Juan 6:15). Jesús tsiʼ sube jiñi xcʌntʼañob i chaʼan ti wajali chaʼan mach yomic cheʼ miʼ ‹yotsañob i bʌ tiʼ chaʼan bʌ pañimil›, jin chaʼan, ti jiñi bʌ ora maʼañic tsiʼ wis coltayob jiñi política (Juan 17:14, 16; 18:36; Marcos 12:13-17).
Yom mi lac pʌs lac xucʼtilel ti i Yumʌntel Dios, jiñi yumʌntel tsaʼ bʌ i taja ti tʼan Jesús cheʼ bʌ tsiʼ yʌlʌ: «Jiñi wen tʼan chaʼan i yumʌntel Dios mi caj i sujbel tiʼ pejtelel pañimil» (Mateo 24:14). Come an ti lon c wenta chaʼan mi lon c sub chaʼan mi caj i tilel jiñi i Yumʌntel Dios, maʼañic mi cotsan lon c bʌ ti política am bʌ tiʼ pejtelel país, mi jiñic to ti jiñi país yaʼ baqui chumulon lojon (2 Corintios 5:20; Efesios 6:20).
Cheʼ maʼañic mi cotsan lojon c bʌ ti política miʼ mejlel lon c suben jiñi i Yumʌntel Dios majqui jach bʌ quixtañujob. Mic chaʼlen lojon wersa chaʼan mi lon c pʌs ti lon c tʼan yicʼot ti chuqui tac mi lon c mel chaʼan mucʼʌch lon c ñop jiñi i Yumʌntel Dios, jiñi yumʌl muʼ bʌ caj i tojʼesan jiñi wocol tac am bʌ wʌʼ ti pañimil (Salmo 56:11).
Cheʼ muqʼuic cotsan lojon c bʌ ti política, maʼañix chʌn temel mij cajel lojon ti ajñel cheʼ bajcheʼ hermanojob tiʼ pejtelel pañimil (Colosenses 3:14; 1 Pedro 2:17). Pero jiñi ñopbalʌl tac muʼ bʌ i yotsañob i bʌ ti política miʼ tʼoxob i bʌ (1 Corintios 1:10).
Mi lon j qʼuel ti ñuc jiñi yumʌlob. Anquese maʼañic mi cotsan lojon c bʌ ti política, pero mucʼʌch lon j qʼuel ti ñuc i yeʼtel jiñi yumʌlob. Mi lon c jacʼ cheʼ bajcheʼ mi yʌl jiñi mandar loqʼuem bʌ ti Biblia am bʌ yaʼ ti Romanos 13:1: «[Tiʼ laʼ pejtelel] jacʼbenla i tʼan jiñi añoʼ bʌ i yeʼtel ti pañimil». Mic chʼujbin lojon jiñi mandar tac am bʌ i chaʼan jiñi yumʌlob, mic toj lojon jiñi impuesto tac yicʼot mij coltan lojon jiñi yumʌlob cheʼ bʌ mic jacʼben lojon i tʼan chaʼan wen miʼ yajñelob tiʼ pejtelel jiñi quixtañujob. Maʼañic mi lon c sʌclan bajcheʼ yom miʼ jisʌntel i yeʼtel jiñi yumʌlob, mi lon c chʼujbin jiñi ticʼojel loqʼuem bʌ Biblia muʼ bʌ i yʌl chaʼan yom mi lon taj ti oración jiñi «yumʌlob yicʼot pejtel añoʼ bʌ i yeʼtel», ñumento cheʼ bʌ an chuqui woliʼ ñaʼtañob i mel muʼ bʌ i mejlel i mʌctan chaʼan miʼ chʼujutesʌntel Dios (1 Timoteo 2:1, 2).
Cheʼ jaʼel, mi lon j qʼuel ti ñuc jiñi añoʼ bʌ tiʼ wenta ti jujuntiquil chaʼan miʼ melob bajcheʼ miʼ ñaʼtañob chaʼan jiñi política. Jumpʼejl ejemplo, maʼañic mi lon c mʌctan mi juntiquilic to quixtañu chaʼan mi chaʼlen votar.
¿Tsaʼ jaxto ba c poj ñaʼta lojon chaʼan mach weñic cheʼ mi cotsan lojon c bʌ ti política? Maʼañic. Jiñi apóstolob yicʼot yambʌ xñoptʼañob cheʼ ti ñaxam bʌ siglo maʼañic tsiʼ yotsayob i bʌ ti política jaʼel. Jumpʼejl libro muʼ bʌ i taj ti tʼan ili temaj mi yʌl: «Anquese tsiʼ ñopoyob chaʼan yom miʼ jacʼbeñob i tʼan jiñi yumʌlob, pero jiñi ñaxam bʌ xñoptʼañob maʼañic tsiʼ ñopoyob chaʼan yom miʼ yotsañob i bʌ ti política» (Beyond Good Intentions—A Biblical View of Politics [Jiñi yom bʌ melol ti isujm: Mu’ bʌ i yʌl jiñi Biblia cha’an jiñi política]). Cheʼ jaʼel, juntiquil teólogo i cʼabaʼ Orígenes tsaʼ bʌ chumle ti jabil 101 cʼʌlʌl ti jabil 300, tiʼ tsʼijbu ili tʼan: «Jiñi xñoptʼañob maʼañic tsiʼ jacʼʌ i chʼʌmob i yeʼtel tiʼ chaʼan bʌ política».
¿Muʼ ba mejlel i taj wocol jiñi país cheʼ maʼañic mi cotsan lon c bʌ ti política? Maʼañic. Jiñi yumʌlob mach yomic miʼ bʌcʼñañob jiñi, come utson lojon. Laʼ laj qʼuel jumpʼejl ejemplo chaʼan jiñi informe tsaʼ bʌ i yʌlʌ jiñi Academia Nacional de Ciencias de Ucrania cheʼ ti 2001 chaʼan jiñi muʼ bʌ lon c mel tiʼ tojlel jiñi política, mi yʌl cheʼi: «Ti ili ora tajol cabʌlob mach bʌ weñic miʼ qʼuelob cheʼ maʼañic miʼ yotsañob i bʌ ti política jiñi i testigojob Jehová. Jiñʌch tiʼ caj jaʼel iliyi cheʼ bʌ tsaʼ jopʼbentiyob i mul ti’ tojlel jiñi nazi yicʼot tiʼ tojlel jiñi regímen comunista ti wajali». Jiñi informe miʼ bej al chaʼan jiñi Testigojob «tiʼ pejtelel ora tsiʼ qʼueleyob ti ñuc jiñi mandar tac, maʼañic tsiʼ chaʼleyob lotiya cheʼ bʌ tsiʼ chaʼleyob eʼtel yaʼ baqui mi cosʌntel añimal tac, ti fábrica tac yicʼot maʼañic tsiʼ contrajiyob jiñi régimen comunista» anquese añob ti tsʌts bʌ wocol ti jiñi bʌ ora tiʼ tojlel jiñi yumʌl soviético. Jiñi informe tsiʼ yʌlʌ tiʼ yujtibal chaʼan jiñi ñopoloʼ bʌ i chaʼan yicʼot jiñi muʼ bʌ i melob jiñi i testigojob Jehová ti ili ora «mach chaʼañic miʼ yotsañob ti wocol mi jumpʼejlic to país mi jiñic to chaʼan miʼ tʼoxob».