¿Chuqui jiñi Junmojt muʼ bʌ i pʌsob bij i chaʼan i testigojob Jehová?

Jiñi Junmojt muʼ bʌ i pʌsob bij jiñobʌch junmojt xñoptʼañob tsaʼix bʌ i tajayob i colel i jiñobʌch muʼ bʌ i pʌsbeñob bij jiñi i testigojob Jehová añoʼ bʌ tiʼ petol pañimil. An chaʼchajp chuqui miʼ melob:

• Miʼ qʼuelob cheʼ bʌ miʼ chajpʌntel jiñi jun tac loqʼuem bʌ ti Biblia, tempa bʌ tac yicʼot jiñi cʌntesʌntel loqʼuem bʌ ti Biblia i chaʼan i testigojob Jehová (Lucas 12:42).

• Miʼ chajpañob jiñi ñuc bʌ subtʼan chaʼan jiñi i testigojob Jehová cheʼ bʌ miʼ qʼuelob jiñi eʼtel muʼ bʌ lon c mel, miʼ tsajiñob bajcheʼ miʼ cʼʌjñel jiñi taqʼuin yicʼot miʼ yajcañob chaʼan yan tac bʌ wiñicob miʼ tajob i yeʼtel yaʼ ti congregación.

Jiñi Junmojt muʼ bʌ i pʌsob bij miʼ chʌn melob cheʼ bajcheʼ tsiʼ meleyob «jiñi apóstolob yicʼot jiñi ancianojob» añoʼ bʌ yaʼ ti Jerusalén cheʼ ti ñaxam bʌ siglo, tsaʼ bʌ cʼoti i ñaʼtañob ti wen chuqui miʼ mejlel i coltan jiñi congregación (Hechos 15:2). Lajal bajcheʼ jiñi xucʼul bʌ wiñicob ti wajali, jiñi Junmojt muʼ bʌ i pʌsob bij mach jiñobic añoʼ bʌ ti wenta jiñi lon c organización. Miʼ jacʼob cheʼ bajcheʼ miʼ yʌl jiñi Biblia, i miʼ qʼuelob Jesús bajcheʼ jiñi i yum congregación waʼchocobil bʌ ti Jehová (1 Corintios 11:3; Efesios 5:​23).

¿Majquiyob jiñi Junmojt muʼ bʌ i pʌsob bij?

Jiñi Junmojt muʼ bʌ i pʌsob bij jiñobʌch Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane yicʼot Jeffrey Winder. Yaʼ mucʼob ti eʼtel yaʼ ti Central Mundial am bʌ yaʼ ti Warwick, Nueva York, Estados Unidos.

¿Bajcheʼ mucʼob ti tem eʼtel jiñi Junmojt muʼ bʌ i pʌsob bij?

Jiñi Junmojt muʼ bʌ i pʌsob bij waʼchocobil i chaʼan 6 comité chaʼan miʼ qʼuel jiñi eʼtel chaʼan bʌ lon c subtʼan, i jujuntiquil muʼ bʌ ti eʼtel ti jiñi Junmojt miʼ chaʼleñob eʼtel ti jumpʼejl o chaʼpʼejl comité.

• Comité i chaʼan Coordinador: Miʼ qʼuel jiñi meloñel yom tac bʌ melol tiʼ tojlel yumʌlob, cheʼ bʌ miʼ ñumel tsʌts tac bʌ icʼ jaʼal, cheʼ bʌ an majqui an ti wocol chaʼan jiñi lon c ñopoñel i yan tac bʌ muʼ bʌ i yʌcʼ ti wocol jiñi i testigojob Jehová.

• Comité am bʌ tiʼ wenta xʼEʼtelob: Miʼ qʼuel jiñi anto bʌ yom tiʼ tojlelob jiñi xʼeʼtelob yaʼ ti sucursal tac, cʌmbil bʌ bajcheʼ jiñi familia Betel.

• Comité am bʌ tiʼ wenta Jun tac: Miʼ qʼuel chaʼan miʼ mejlel jiñi jun tac loqʼuem bʌ ti Biblia, bajcheʼ miʼ chojquel majlel, bajcheʼ miʼ mejlel i Yotlel Tempa bʌ, oficina chaʼan traducción yicʼot yom to bʌ miʼ mejlel ti sucursal tac.

• Comité am bʌ tiʼ wenta Subtʼan: Miʼ qʼuel jiñi eʼtel chaʼan bʌ «jiñi wen tʼan» (Mateo 24:14).

• Comité am bʌ tiʼ wenta Cʌntesa: Mi qʼuel cheʼ miʼ chajpʌntel jiñi bʌlñʌcʼʌl tac muʼ bʌ i yʌjqʼuel ti tempa bʌ, ti cʌntesʌntel yicʼot ti programa tac chaʼan audio yicʼot video.

• Comité am bʌ tiʼ wenta i Tsʼijbuntel jun tac: Miʼ qʼuel jiñi chʼujul tac bʌ bʌlñʌcʼʌl muʼ bʌ i chaʼlentel ti imprimir, jiñi an tac bʌ yaʼ ti página chaʼan Internet yicʼot cheʼ miʼ chaʼlentel ti traducir jiñi jun tac loqʼuem bʌ ti Biblia.

Anquese añob i yeʼtel ti ili comité tac, jiñi Junmojt muʼ bʌ i pʌsob bij miʼ tempañob i bʌ ti jujumpʼejl semana chaʼan miʼ qʼuelob chuqui to yom miʼ mejlel ti jiñi organización. Ti ili tempa bʌ miʼ qʼuejlel chuqui miʼ yʌl jiñi Tsʼijbujel chaʼan tac iliyi. Cheʼ bajcheʼ iliyi, jiñi Junmojt muʼ bʌ i pʌsob bij miʼ cʌyob chaʼan jiñi chʼujul bʌ i yespíritu Dios miʼ coltan, i cheʼ jiñi muqʼuix i temob i tʼan (Hechos 15:25).

¿Majqui jiñi muʼ bʌ i coltañob jiñi Junmojt muʼ bʌ i pʌsob bij?

Jiñobʌch wiñicob muʼ bʌ i bʌcʼñañob Dios yicʼot muʼ bʌ i coltañob jiñi comité tac i chaʼan jiñi Junmojt muʼ bʌ i pʌsob bij (1 Corintios 4:2). Tsaʼ aqʼuentiyob jiñi eʼtel ti ili comité come añob i yutslel yicʼot wen añob i ñaʼtʌbal ti jiñi eʼtel. I miʼ tempañob i bʌ ti jujumpʼejl semana ti jiñi i tempa bʌ am bʌ i chaʼan ili comité. Anquese mach jiñobic miʼ yʌlob chuqui mi caj i mejlel, miʼ yʌcʼob i tʼan wen ñuc bʌ i cʼʌjñibal. Cheʼ jaʼel, miʼ melob cheʼ bajcheʼ miʼ ñaʼtañob jiñi comité i wen yʌxʌlob i yoj chaʼan bajcheʼ woliʼ tsʼʌctiyel jiñi tsaʼ bʌ i ñaʼtayob i mel. Jiñi Junmojt muʼ bʌ i pʌsob bij miʼ suben jaʼel chaʼan miʼ julaʼtañob yambʌ hermanojob añoʼ bʌ ti yan tac bʌ país o chaʼan miʼ yʌcʼob discurso tac ti jiñi Tempa bʌ muʼ bʌ i mejlel ti jujumpʼejl jab yaʼ ti Central Mundial o chaʼan jiñi graduación chaʼan Galaad.