¿I sujm ba chaʼan baqui jach an Dios?
Muʼ bʌ i yʌl jiñi Biblia
Dios miʼ mejlel i qʼuel pejtelel chuqui tac an yicʼot miʼ mejlel i cʼʌn i pʼʌtʌlel baqui jach yom (Proverbios 15:3; Hebreos 4:13). Pero jiñi Biblia maʼañic miʼ yʌl chaʼan Dios baqui jach an come miʼ yʌl chaʼan juntiquilʌch espíritu am bʌ i chumlib.
¿Bajcheʼ yilal Dios? Juntiquil espíritu (Juan 4:24). Jin chaʼan maʼañic majqui miʼ mejlel i qʼuel (Juan 1:18). Ti jiñi ñajal tac muʼ bʌ i yʌl jiñi Biblia, Dios junsujm jach baqui tsiʼ pʌsʌ i bʌ. Maʼañic miʼ wis al chaʼan baqui jach an (Isaías 6:1, 2; Apocalipsis 4:2, 3, 8).
¿Baqui chumul? Jiñi Biblia miʼ yʌl chaʼan Dios chumul ti panchan (1 Reyes 8:30). Ili yom i yʌl chaʼan mach chumulic ila ti Lum o ti jiñi universo, chumul ti panchan. Jiñi Biblia miʼ taj ti tʼan chaʼan ti jumpʼejl bʌ qʼuin jiñi ángelob «tsaʼ waʼleyob tiʼ tojlel Dios [Jehová, TNM]»,a ili miʼ pʌs chaʼan junsujm jach baqui chumul (Job 1:6).
Mi Dios mach baqui jach an, ¿mejl ba i cʌntañon?
Mucʼʌch. Anquese Dios chumul ti panchan, miʼ wen pensarin jiñi chumuloʼ bʌ wʌʼ ti Lum. Miʼ qʼuelonla cheʼ mi lac chaʼlen wersa lac jacʼben i tʼan yicʼot miʼ coltañonla (1 Reyes 8:39; 2 Crónicas 16:9). ¿Bajcheʼ miʼ pʌs chaʼan mucʼʌch i pensaliñonla yicʼot miʼ cʌntañonla?
Cheʼ mi lac mel oración: Cheʼ bʌ woli lac mel oración, Jehová miʼ ñʌchʼtañonla (2 Crónicas 18:31).
Cheʼ bʌ chʼijyemonla: «Lʌcʼʌl an lac Yum baʼan chʼijiyemoʼ bʌ i pusicʼal. Miʼ coltan jini woli bʌ i melob i pusicʼal» (Salmo 34:18).
Cheʼ i cʼʌjñibal lac chaʼan jumpʼejl ticʼojel: Jehová miʼ cʼʌn jiñi Biblia chaʼan miʼ yʌqʼueñonla lac ñaʼtʌbal yicʼot chaʼan miʼ pʌsbeñonla jiñi wem bʌ bij (Salmo 32:8).
Muʼ bʌ i ñaʼtʌntel tiʼ tojlel Dios
An muʼ bʌ i yʌlob: Dios yaʼan ti jiñi melbil tac bʌ i chaʼan.
Jiñi i sujmlel: Dios mach chumulic ila ti Lum mi yaʼicto ti universo (1 Reyes 8:27). I sujmʌch chaʼan jiñi Biblia miʼ yʌl chaʼan jiñi ecʼ tac yicʼot yan tac bʌ tsaʼ bʌ i mele miʼ yʌqʼuen «i ñuclel Dios» (Salmo 19:1). Pero jiñi mach yomic i yʌl chaʼan Dios chumul ti jiñi tsaʼ tac bʌ i mele lajal bajcheʼ juntiquil xbon cuadro mach chumulic tiʼ cuadro. Anquese jumpʼejl cuadro mucʼʌch mejlel i pʌsbeñonla bajcheʼ yilal jiñi tsaʼ bʌ i mele. Cheʼ jaʼel, jiñi tsaʼ tac bʌ i mele Dios miʼ pʌsbeñonla «jiñi melbal tac am bʌ i chaʼan mach bʌ añic miʼ mejlel ti qʼuejlel», bajcheʼ jiñi i pʼʌtʌlel, i ñaʼtʌbal yicʼot i cʼuxbiya (Romanos 1:20).
An muʼ bʌ i yʌlob: Mi Dios mach baqui jach an mach pʼʌtʌlic yicʼot mach luʼ yujilic chuqui miʼ yujtel.
Jiñi i sujmlel: Jiñi chʼujul bʌ espíritu jiñʌch i pʼʌtʌlel Dios. Jin chaʼan, Dios miʼ mejlel i ñaʼtan pejtelel chuqui miʼ yujtel yicʼot miʼ mejlel i mel chuqui yom bajcheʼ jach ora yicʼot ti baqui jach, i mach cʼʌñʌlic yaʼañi (Salmo 139:7).
An muʼ bʌ i yʌlob: Salmo 139:8 miʼ yʌl chaʼan Dios baqui jach an come miʼ yʌl: «Mi com letsel majlel ti panchan, yaʼ añet. Mi com wʌyel tiʼ yajñib chʌmenoʼ bʌ, yaʼ añet jaʼel».
Jiñi i sujmlel: Ili texto maʼañic miʼ yʌl chaʼan Dios baqui jach an, woli jach i subeñonla utsʼatax bʌ tʼan tac, chaʼan Dios miʼ mejlel i coltañonla mach yʌlʌyic baqui añonla.
a Jiñi Biblia miʼ yʌl chaʼan i cʼabaʼ Dios jiñʌch Jehová.