¿Bajcheʼ yilal miʼ qʼuelob i testigojob Jehová jiñi divorcio?
Joñon lojon yaʼ ti principio tac am bʌ ti Biblia mi lon j cʌn chaʼan bajcheʼ yilal yom mi lon j qʼuel jiñi ñujpuñel yicʼot jiñi divorcio. Dios jiñʌch tsaʼ bʌ i yʌqʼue i tejchibal jiñi ñujpuñel i yom tsaʼ yʌlʌ chaʼan jiñi ñujpuñemoʼ bʌ temel miʼ yajñelob tiʼ pejtelel ora. Jiñi Biblia miʼ yʌl chaʼan miʼ mejlel i chaʼleñob i bʌ ti divorciar jiñi wiñic o jiñi xʼixic mi jiñi juntiquil miʼ piʼlen yambʌ mach bʌ piʼʌlic (Mateo 19:5, 6, 9).
¿Muʼ ba i coltañob i testigojob Jehová jiñi xñujpuñelob añoʼ bʌ i wocol?
Mucʼʌch. Muʼ bʌ i cʼʌjñel ti coltaya jiñʌch tac iliyi:
Jun tac. Yaʼi miʼ chʼʌm tilel temaj tac muʼ bʌ i mejlel i coltan jiñi xñujpuñelob chaʼan pʼʌtʌl miʼ yajñelob, cheʼ jaʼel miʼ coltan jiñi choncolix bʌ i ñaʼtan i cʌyob i bʌ. Qʼuele jiñi temaj tac «Cómo fortalecer el sentido del compromiso en el matrimonio», «Cómo perdonar» yicʼot «Cómo recuperar la confianza perdida».
Tempa bʌ tac. Ti jiñi lon c tempa bʌ muʼ bʌ i mejlel ti jujumpʼejl semana miʼ tsictesʌntel ticʼojel tac muʼ bʌ yʌcʼ jiñi Biblia chaʼan jiñi xñujpuñelob, cheʼ miʼ mejlel jaʼel yaʼ ti lon j colem tempa bʌ.
Ancianojob. Jiñi ancianojob o jiñi añoʼ bʌ tiʼ wenta jiñi congregación miʼ coltañob jiñi xñujpuñelob, miʼ tem qʼuelob ticʼojel tac loqʼuem bʌ ti Biblia cheʼ bajcheʼ miʼ yʌl yaʼ ti Efesios 5:22-25.
Mi juntiquil i testigo Jehová yom i chaʼlen i bʌ ti divorciar, ¿yom ba miʼ cʼajtiben jiñi ancianojob chaʼan mi weñʌch cheʼ miʼ mel?
Maʼañic. Jiñi ancianojob miʼ mejlel i coltan jiñi xñujpuñelob chaʼan miʼ tojʼesañob i wocol, pero mach chaʼañic miʼ chʼʌmob tiʼ wenta chaʼan mi caj i yʌlob chuqui yom bʌ miʼ melob (Gálatas 6:5). Pero, mi jiñi yom bʌ i chaʼlen i bʌ ti divorciar mach tiʼ cajic tsʼiʼlel cheʼ bajcheʼ miʼ yʌl jiñi Biblia, jiñi hermano maʼañic mi caj i mejlel i taj jumpʼejl i yeʼtel yaʼ ti congregación (1 Timoteo 3:1, 5, 12). Cheʼ jaʼel, maʼañic mi caj i mejlel ti chaʼ ñujpuñel.
¿Bajcheʼ yilal miʼ qʼuelob jiñi i testigojob Jehová muʼ bʌ i cʌyob i bʌ?
Jiñi Biblia miʼ yʌl chaʼan jiñi ñujpuñemoʼ bʌ mach yomic cheʼ miʼ cʌyob i bʌ anquese añob i wocol (1 Corintios 7:10-16). Jiñi wocol tac miʼ mejlel ti tojʼesʌntel cheʼ mi laj cʼajtiben i coltaya Dios ti oración, i cheʼ mi lac jacʼ jiñi ticʼojel tac am bʌ ti Biblia yicʼot cheʼ mi lac pʌs laj cʼuxbiya tiʼ tojlel jiñi lac piʼʌl (1 Corintios 13:4-8; Gálatas 5:22).
Pero an xñoptʼañob am bʌ i cʌyʌyob i bʌ chaʼan tsiʼ caj wocol tac bajcheʼ iliyi:
Mach yomic i mʌcʼlan i familia (1 Timoteo 5:8).
Miʼ wen ticʼlʌntel tiʼ cuxtʌlel (Salmo 11:5).
Miʼ yʌcʼ ti wocol jaʼel tiʼ chaʼan bʌ Dios. Jumpʼejl ejemplo, tajol jiñi wiñic o jiñi xʼixic miʼ ñop i wersa xicʼ i piʼʌl chaʼan maʼañic miʼ jacʼben i mandar Dios. Jiñi xñoptʼan woli bʌ i ticʼlʌntel tajol miʼ cʼotel i ñaʼtan chaʼan yom cheʼ muqʼuix i cʌy i bʌ yicʼot i piʼʌl, chaʼan miʼ mejlel i ‹jacʼben i mandar Dios anquese miʼ ñusan i mandar wiñicob› (Hechos 5:29).