JIÑI XCOLELOB MIʼ CʼAJTIÑOB
¿Chucoch ñuc i cʼʌjñibal jiñi oración?
Jumpʼejl encuesta tsaʼ bʌ mejli miʼ yʌl chaʼan jiñi 80% xcolelob yaʼ ti Estados Unidos miʼ melob oración, pero cojach lamital miʼ melob ti jujumpʼejl qʼuin. Ojlil miʼ cʼajtibeñob i bʌ: «¿Mucʼ jach ba c mel oración chaʼan jach wen mi cubin c bʌ?».
¿Chuqui jiñi oración?
Jiñi oración jiñʌch cheʼ mi lac pejcan Jehová, tsaʼ bʌ i mele pejtelel chuqui an. Ñaʼtancu chuqui yom i yʌl jiñi: Anquese jiñʌch ñumen ñuc bʌ tiʼ pejtelel quixtañujob, «mach wen ñajtic an ti jujuntiquilonla» (Hechos 17:27). Jiñi Biblia miʼ subeñonla: «Lʌcʼtesan laʼ bʌ ti Dios i mi caj i lʌcʼtesan i bʌ ti laʼ tojlel» (Santiago 4:8).
¿Chuqui miʼ mejlel a mel chaʼan maʼ lʌcʼtesan a bʌ ti Dios?
Chaʼlen oración. Ili jiñʌch bajcheʼ miʼ mejlel a pejcan.
Pejcan jiñi Biblia. Ili jiñʌch bajcheʼ miʼ «pejcañet» Dios.
Cheʼ maʼ mel oración yicʼot maʼ pejcan jiñi Biblia, mi caj i coltañet chaʼan maʼ ñumen sujtel tiʼ yamigo Dios.
«Cheʼ mi lac pejcan Jehová, woli lac pejcan jiñi ñumen ñuc bʌ, i jumpʼejlʌch ñuc bʌ lac majtan am bʌ lac chaʼan» (Jeremy).
«Cheʼ mic suben Jehová bajcheʼ yubil mi cubin c bʌ, ñumen lʌcʼʌl mi cubin c bʌ tiʼ tojlel» (Miranda).
¿Tiʼ sujm ba mucʼʌch i ñʌchʼtañon Dios?
Anquese maʼ ñop ti Dios o maʼ melben oración, tajol wocol maʼ wubin chaʼan choncolʌch i ñʌchʼtañet. Pero jiñi Biblia miʼ yʌleʼ chaʼan Jehová jiñʌch muʼ bʌ i ñʌchʼtan oración (Salmo 65:2). I cheʼ jaʼel miʼ subeñet chaʼan maʼ luʼ suben muʼ bʌ a cʼojoʼtan. ¿Chucoch? Come Dios mucʼʌch i ñaʼtañet (1 Pedro 5:7).
Ñaʼtancu ili: ¿Muʼ baʼ wen pejcan a wamigojob? Cheʼʌch miʼ mejlel a mel jaʼel yicʼot Dios. Pejcan tiʼ pejtelel ora, i cʼʌmben i cʼabaʼ, Jehová (Salmo 86:5-7; 88:9). I cheʼ jaʼel, jiñi Biblia miʼ subeñet chaʼan maʼ chʌn pejcan (1 Tesalonicenses 5:17).
«Jiñi oración jiñʌch chaʼan mic pejcan jiñi c Tat am bʌ ti panchan, i mic luʼ suben bajcheʼ yubil mi cubin» (Moisés).
«Jehová mic suben jiñi ñuc tac bʌ i cʼʌjñibal c chaʼan, lajal bajcheʼ mic suben jiñi c tatob yicʼot camigojob» (Karen).
¿Chuqui miʼ mejlel cʌl ti oración?
Jiñi Biblia miʼ yʌl: «Mach yʌlʌyic chuqui mi laʼ ñusan, aqʼuenla i ñaʼtan Dios ti oración, pejcanla ti wocol tʼan ti jumpʼejl laʼ pusicʼal yicʼot aqʼuenla wocolix i yʌlʌ» (Filipenses 4:6).
¿Yom ba i yʌl iliyi chaʼan miʼ mejlel a suben a wocol? ¡Cheʼʌchi! Jiñi Biblia miʼ subeñonla chaʼan mi lac mel: «Aqʼuen a cuch lac Yum. Jini mi caj cuchbeñet majlel» (Salmo 55:22).
Pero mach cojach yom maʼ suben a wocol tac. Juntiquil xcʼalʌl i cʼabaʼ Chantelle miʼ yʌl: «Mi cojach mic pejcan ti oración Jehová chaʼan jach mij cʼajtiben i coltaya, mach wem bʌ i yamigajoñic». I miʼ bej al: «Joñon mi cʌl, chaʼan ñaxan yom miʼ cʌqʼuen wocolix i yʌlʌ, tiʼ sujm, cabʌlʌch chucoch yom mi cʌqʼuen wocolix i yʌlʌ».
Ñaʼtancu ili: ¿Chuqui tajbil a chaʼan baqui yom maʼ suben wocolix i yʌlʌ Jehová? Ñaʼtan uxchajp baqui miʼ mejlel a wʌqʼuen wocolix i yʌlʌ.
«Mach cʼʌñʌlic chuqui wen ñuc bʌ chaʼan mi lac mel oración baqui mi la cʌqʼuen wocolix i yʌlʌ Jehová, miʼ mejlel lac mel cheʼ bʌ mi laj qʼuel jumpʼejl ñichteʼ» (Anita).
«Miʼ mejlel a wen ñaʼtan jumpʼejl versículo am bʌ ti Biblia muʼ bʌ a wen mulan o miʼ mejlel a wen ñaʼtan ti jiñi melbil tac bʌ muʼ bʌ a wen mulan. Cheʼ jiñi, miʼ mejlel a wʌqʼuen wocolix i yʌlʌ Jehová» (Brian).