¿Muʼ ba mejlel i coltañon jiñi Biblia mi mach comix chumtʌl i añix c ñaʼta c tsʌnsan c bʌ?

I jacʼbal muʼ bʌ i yʌcʼ jiñi Biblia

Mucʼʌch i mejlel i coltañet, come jiñʌch i Tʼan Dios i Dios yomʌch i coltan jiñi chʼijyemoʼ bʌ (2 Corintios 7:6). Anquese jiñi Biblia mach jumpʼejlic libro muʼ bʌ i tsictesan chaʼan am bʌ i ñaʼtayob i tsʌnsañob i bʌ, pero añʌch i colta cabʌl lac piʼʌlob. Jiñi ticʼojel muʼ bʌ i chʼʌm tilel mucʼʌch i mejlel i coltañet jaʼel.

• ¿Chuqui wen tac bʌ ticʼojel miʼ yʌqʼueñonla jiñi Biblia?

• ¿Muʼ ba i yʌl jiñi Biblia chaʼan an majqui tsiʼ ñaʼtayob chʌmel?

• ¿Chuqui ti texto tac miʼ mejlel i coltañet chaʼan maʼ cʌy a ñaʼtan a tsʌnsan a bʌ?

• ¿Chuqui yom mi lac mel mi juntiquil la camigo miʼ subeñonla chaʼan yom i tsʌnsan i bʌ?

• ¿Ixcu mi tsaʼix c ñopo c tsʌnsan c bʌ?

¿Chuqui wen tac bʌ ticʼojel miʼ yʌqʼueñonla jiñi Biblia?

• ● Alʌ bajcheʼ yubil maʼ wubin a bʌ.

  Muʼ bʌ i yʌl jiñi Biblia: «Mi isujm miʼ cʼuxbiñonla laj cʌñʌ bʌ maʼanic miʼ cʌy i cʼuxbiñonla ti pejtelel ora. Junlajalʌch bajcheʼ lac piʼʌl baʼ ora woli la cubin wocol» (Proverbios 17:17).

  Yom bʌ i yʌl: Cheʼ woliyonla ti cʌlʌx pensar i cʼʌjñibal lac chaʼan cheʼ mi laj coltʌntel.

  Mi maʼañic majqui maʼ suben bajcheʼ yubil maʼ wubin a bʌ mach a cuchuyic. Pero mi mucʼʌch a wʌl, tajol ñumen weñix mi caj a wubin a bʌ i qʼuexelix bajcheʼ mi caj a qʼuel jiñi a wocol.

  

  Mele iliyi: Pejcan juntiquil a familia o a wamigo wʌle jach.a Cheʼ jaʼel, miʼ mejlel a tsʼijbun bajcheʼ yubil maʼ wubin a bʌ.

• ● Cucu ti doctor.

  Muʼ bʌ i yʌl jiñi Biblia: «Jiñi cʼocʼoʼ bʌ mach i cʼʌjñibalic i chaʼañob doctor, pero jiñi cʼamoʼ bʌ i cʼʌjñibalʌch i chaʼañob» (Mateo 9:12).

  Yom bʌ i yʌl: Cheʼ bʌ cʼamonla yomʌch mi lac majlel ti doctor.

  Cheʼ mi lac ñaʼtan lac tsʌnsan lac bʌ tiʼ cajʌch bajcheʼ yubil mi la cubin lac bʌ o chaʼan mach cʼocʼoʼñicla ti lac jol. Cheʼ bajcheʼ maʼañic mi laj quisñin la cʌl chaʼan cʼamonla o an chuqui cʼux lac chaʼan, mach yomic mi laj quisñin la cʌl jaʼel chaʼan mach cʼocoʼñicla ti lac jol. Jiñi cʼamʌjel añʌch i tsʼʌcal.

  Mele iliyi: Sʌclan juntiquil doctor muʼ bʌ i mejlel i coltañet ti jiñi a wocol.

• ● Ñaʼtan chaʼan Dios miʼ qʼuelet ti ñuc.

  Muʼ bʌ i yʌl jiñi Biblia: «Miʼ chojñel joʼcojt xpuruwoc ti chaʼpʼejl taqʼuin mach bʌ wen letsic, ¿mach ba cheʼiqui? Pero Dios maʼañic miʼ ñajʌyel i chaʼan mi juncojtic. [...] Mach laʼ chaʼlen bʌqʼuen. Jatetla ñumen an laʼ cʼʌjñibal bajcheʼ cabʌl xpuruwoc» (Lucas 12:6, 7).

  Yom bʌ i yʌl: Dios miʼ wen qʼuelet ti ñuc.

  Tajol a bajñel jach maʼ wubin a bʌ, pero mach cheʼiqui. Dios miʼ qʼuelet ti ñuc i yujil chuqui woli a ñusan. Ti Salmo 34:18 miʼ yʌl: «Lʌcʼʌl an lac Yum baʼan chʼijiyemoʼ bʌ i pusicʼal. Miʼ coltan jini woli bʌ i melob i pusicʼal». Dios mucʼʌch i cʼuxbiñet i mach yomic chaʼan maʼ tsʌnsan a bʌ.

  Mele iliyi: Pejcan jiñi Biblia chaʼan maʼ qʼuel chaʼan Dios mucʼʌch i cʼuxbiñet. Yaʼ ti capítulo 24 ti jiñi libro Acerquémonos a Jehová mi caj a qʼuel chuqui tac miʼ pʌs chaʼan Dios mucʼʌch i cʼuxbiñet.

• ● Mele oración.

  Muʼ bʌ i yʌl jiñi Biblia: «I mi laʼ wʌcʼ pejtelel chuqui mi laʼ cʼojoʼtan tiʼ tojlel, come Dios mucʼʌch i ñaʼtañetla» (1 Pedro 5:7).

  Yom bʌ i yʌl: Dios yom chaʼan maʼ laj suben chuqui muʼ bʌ a cʼojoʼtan.

  Dios yom i yʌqʼueñet a ñʌchʼtʌlel yicʼot a pʼʌtʌlel chaʼan maʼ chaʼlen wersa (Filipenses 4:6, 7, 13). Dios miʼ coltan jiñi muʼ bʌ i lʌcʼtesan i bʌ tiʼ tojlel (Salmo 55:22).

  

  Mele iliyi: Chaʼlen oración. Cʼʌmben i cʼabaʼ, Jehová, suben bajcheʼ yubil maʼ wubin (Salmo 83:18). Cʼajtiben i coltaya chaʼan miʼ coltañet.

• ● Ñaʼtan jiñi pijtaya muʼ bʌ i yʌl jiñi Biblia ti talto bʌ qʼuin.

  Muʼ bʌ i yʌl jiñi Biblia: «Ili pijtaya i sujm bʌ yicʼot xucʼul bʌ am bʌ lac chaʼan lajal bajcheʼ jumpʼejl ancla chaʼan laj cuxtʌlel» (Hebreos 6:19).

  Yom bʌ i yʌl: Jiñi lac chʼijyemlel miʼ yʌqʼueñonla lac mel mach tac bʌ weñic, lajal bajcheʼ jiñi barco miʼ ñijcan jiñi icʼ baqui jach yom. Jiñi lac pijtaya muʼ bʌ i yʌl jiñi Biblia lajalʌch bajcheʼ jumpʼejl ancla muʼ bʌ i xucʼchocon lac pensar.

  Ili pijtaya mach toʼo tʼañic jach, loqʼuemʌch ti Biblia chaʼan Dios mi caj i jisan tiʼ pejtelel jiñi wocol tac (Apocalipsis 21:4).

  Mele iliyi: Pejcan chaʼan jiñi pijtaya ti jiñi tema «Jumpʼejl i sujm bʌ pijtaya chaʼan miʼ tojʼan ili pañimil».

• ● Mele muʼ bʌ a mulan a mel.

  Muʼ bʌ i yʌl jiñi Biblia: «I tijicñʌyel lac pusicʼal i wentajʌch wen bʌ tsʼac» (Proverbios 17:22).

  Yom bʌ i yʌl: Cheʼ mi lac mel muʼ bʌ lac mulan miʼ coltañonla chaʼan cʼocʼ mi la cajñel.

  

  Mele iliyi: Mele jiñi muʼ bʌ a mulan. Jumpʼejl ejemplo, ñʌchʼtan música muʼ bʌ i yʌqʼueñet a tijicñʌyel, pejcan jumpʼejl jun muʼ bʌ i coltañet o sʌclan jumpʼejl wem bʌ ñusaqʼuin. Cheʼ jaʼel, ñumen tijicña mi caj a wubin a bʌ cheʼ maʼ coltan yambʌlob ti chuqui jach (Hechos 20:35).

• ● Chaʼan cʼocʼ maʼ wajñel cʌntan a bʌ.

  Muʼ bʌ i yʌl jiñi Biblia: «Jiñi ejercicio mucʼʌch i tsʼitaʼ aqʼueñonla lac wenlel» (1 Timoteo 4:8).

  Yom bʌ i yʌl: Mele ejercicio, wʌyen ti wen, i wen jach chuqui yom maʼ cʼux, ili mi caj i coltañet.

  Mele iliyi: Loqʼuen ti xʌmbal, anquese quince minuto jach.

• ● Cʼajtesan chaʼan jiñi muʼ bʌ a ñaʼtan miʼ mejlel ti qʼuextʌyel.

  Muʼ bʌ i yʌl jiñi Biblia: «Jatetla mach laʼ wujilic chuqui mi caj i yujtel ti laʼ tojlel ijcʼʌl» (Santiago 4:14).

  Yom bʌ i yʌl: Jiñi wocol muʼ bʌ la cubin, tajol mi lac ñaʼtan chaʼan maʼañix miʼ caj ti jilel majlel, pero cʼunteʼ mi caj i tojʼan majlel.

  Anquese wen wocolʌch bajcheʼ woli a ñusan mucʼʌch i mejlel ti qʼuextʌyel. Jin chaʼan mach lujbʼaquet (2 Corintios 4:8). Jiñi wocol mucʼʌch i mejlel ti tojʼan, mi tsaʼ tsʌnsa a bʌ maʼañix chuqui miʼ mejlel a mel.

  Mele iliyi: Pejcan jiñi relato am bʌ ti Biblia tsaʼ bʌ i yubiyob i chʼijyemlel i tsiʼ ñaʼtayob chʌmel. Qʼuele chuqui tsaʼ bʌ i qʼuextʌbeyob i pensar. Laʼ laj qʼuel chaʼpʼej uxpʼejl ejemplo.

¿Muʼ ba i yʌl jiñi Biblia chaʼan an majqui tsiʼ ñaʼtayob chʌmel?

Mucʼʌch. Jiñi Biblia miʼ yʌl chaʼan añʌch tsaʼ bʌ i ñaʼtayob chʌmel. Dios maʼañic tsaʼ michʼa yicʼotob, tsiʼ coltayob. I mucʼʌch i mejlel i coltañet jaʼel.

Elías

• ● ¿Majqui jiñi Elías? Jiñʌch juntiquil xʼaltʼan wen chʼejl bʌ i tsaʼʌch i yubi i chʼijyemlel jaʼel. Santiago 5:17 miʼ yʌl: «Elías juntiquilʌch wiñic cheʼ bʌ tsiʼ yubi i bʌ bajcheʼ joñonla».

• ● ¿Chucoch tsiʼ ñaʼta chʌmel? Elías i bajñel tsiʼ yubi i bʌ i an cabʌl i bʌqʼuen, maʼañix i cʼʌjñibal tsiʼ yubi i bʌ. Jin chaʼan tiʼ sube Jehová: «C Yum, tsʌnsañonix» (1 Reyes 19:4).

• ● ¿Chuqui tsiʼ colta? Elías tsiʼ laj sube Jehová chuqui an tiʼ ñaʼtʌbal i bajcheʼ yubil miʼ yubin i bʌ. ¿Bajcheʼ tsiʼ colta Jehová? Tsiʼ pʌsbe chaʼan mucʼʌch i qʼuel ti ñuc i tsiʼ pʌsbe i pʼʌtʌlel. Tiʼ sube chaʼan ñucʌch i cʼʌjñibal i tsiʼ yʌqʼue i yaj coltaya.

• ▸ Pejcan 1 Reyes 19:2-18.

Job

• ● ¿Majqui jiñi Job? Jiñʌch juntiquil wiñic wen am bʌ i chubʌʼan, colem bʌ i familia i tsaʼ bʌ i chʼujutesa i sujm bʌ Dios.

• ● ¿Chucoch tsiʼ ñaʼta chʌmel? Tsiʼ taja tsʌts bʌ wocol, tsiʼ laj sʌtʌ i chubʌʼan yicʼot tsaʼ laj chʌmi i yalobilob, i tsiʼ taja tsʌts bʌ cʼamʌjel. I tsaʼto i subeyob chaʼan i mulʌch jiñi woli bʌ i ñusan. Jin chaʼan tsiʼ yʌlʌ Job: «Cʼojyemonix. Mach comic jalijel» (Job 7:16).

• ● ¿Chuqui tsiʼ colta? Job tsiʼ melbe oración Jehová yicʼot tsiʼ pejca yañoʼ bʌ (Job 10:1-3). Tsiʼ taja i coltʌntel ti juntiquil i yamigo i cʼabaʼ Elihú, tsaʼ bʌ i colta i qʼuel ti wen jach jiñi wocol. Jiñi wen ñuc bʌ i cʼʌjñibal jiñʌch cheʼ Job tsiʼ jacʼʌ i coltʌntel ti Jehová.

• ▸ Pejcan Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moisés

• ● ¿Majqui jiñi Moisés? Juntiquilʌch wiñic wen ñuc bʌ i yeʼtel ti wajali ti Israel i juntiquil xʼaltʼan.

• ● ¿Chucoch tsiʼ ñaʼta chʌmel? Moisés an cabʌl i yeʼtel, tsiʼ wen wajleyob i tsaʼ lujbʼa. Jin chaʼan tsiʼ yʌlʌ: «A wocolic [Dios] tsʌnsañon ti ora» (Números 11:11, 15).

• ● ¿Chuqui tsiʼ colta? Moisés tsiʼ laj sube Dios bajcheʼ yubil miʼ yubin i bʌ. Dios tsiʼ colta chaʼan mach i bajñelix miʼ mel jiñi eʼtel.

• ▸ Pejcan Números 11:4-6, 10-17.