Miʼ coltʌntel jiñi hermanojob yaʼ baqui woliʼ yujtel guerra tac

Maʼañic miʼ toj sajtel lac pusicʼal cheʼ mi la cubin chaʼan ti ili cojix bʌ qʼuin an «guerra tac ti cabʌl tejclum» (Mateo 24:6). Cabʌl hermanojob miʼ ñusañob wocol ti caj jiñi guerra tac, pero mucʼʌch i coltʌntelob ti chuqui i cʼʌjñibalob i chaʼan. Tijicña tsaʼ la cubi cheʼ ti jiñi Informe 3 chaʼan jiñi Junmojt muʼ bʌ i pʌsob bij 2022, tsaʼ ajli chaʼan jiñi hermanojob ti Europa woliʼ coltañob jiñi hermanojob woli bʌ i ñusañob wocol tiʼ caj guerra tac yaʼ ti Ucrania. ¿Bajcheʼ woliʼ mejlel iliyi cheʼ bʌ wolito jiñi guerra? ¿Bajcheʼ miʼ coltan jiñi hermanojob ti Ucrania chaʼan ili woli bʌ i mejlel?

¿Chuqui i cʼʌjñibal i chaʼañob? ¿Bajcheʼ woliʼ cʼotel jiñi coltaya?

Ti 24 chaʼan febrero, 2022, cheʼ bʌ tsaʼ tejchi jiñi guerra, jiñi Comité chaʼan coordinadorob tsiʼ yʌcʼʌ i tʼan chaʼan miʼ cʼʌjñel taqʼuin chaʼan miʼ coltʌntel jiñi hermanojob. Cheʼ jaʼel, jiñi sucursal ti Ucrania tsaʼ caji i mʌn chuqui i cʼʌjñibal tac bʌ, i jiñi 27 comité chaʼan socorro tsaʼ bʌ waʼchoconti tsaʼ caji i pucob.

Cheʼ jaʼel, jiñi hermanojob añoʼ bʌ yaʼ ti central mundial chaʼan jiñi i testigojob Jehová, ti ora tsaʼ caji i ñaʼtañob bajcheʼ miʼ mejlel i coltañob jiñi sucursal am bʌ ti Ucrania. Jiñi comité chaʼan Coordinadorob yicʼot chaʼan Publicación am bʌ tiʼ wenta jiñi Junmojt muʼ bʌ i pʌsob bij, tsiʼ yʌqʼue tiʼ wenta jiñi Departamento chaʼan mʌñoñel tiʼ petol pañimil chaʼan temel miʼ chaʼleñob eʼtel yicʼot jiñi hermanojob añoʼ bʌ ti jiñi sucursal ti Ucrania yicʼot ti Polonia chaʼan miʼ ñaʼtañob chuqui mi caj i melob. Ti jujumpʼejl qʼuin, jiñi hermanojob añoʼ bʌ ti jiñi Departamento chaʼan mʌñoñel, chaʼan envios, asuntos legales yaʼ ti sucursal tac yicʼot juntiquil am bʌ ti jiñi Comité chaʼan jiñi sucursal ti Ucrania yicʼot chaʼtiqui uxtiquil hermanojob añoʼ bʌ ti jiñi Departamento chaʼan mʌñoñel tiʼ petol pañimil, miʼ tempañob i bʌ chaʼan miʼ qʼuelob bajcheʼ yom miʼ mejlel jiñi eʼtel.

Jay Swinney, am bʌ ti jiñi Departamento chaʼan mʌñoñel tiʼ petol pañimil, miʼ yʌl: «Yom mi lon c ñaxan ñaʼtan chuqui i cʼʌjñibal i chaʼan jiñi hermanojob. Com cʌqʼueñob lon chuqui ñʌmʌlʌch bʌ i cʼʌñob ti jujumpʼejl qʼuin yicʼot chuqui miʼ cʼuxob. Mach cojach yom mi lon ñaʼtan chuqui i cʼʌjñibalob i chaʼan, yom mi lon c ñaʼtan jaʼel bajcheʼ miʼ chocbentelob majlel ti ora yicʼot bajcheʼ miʼ mejlel ti otsʌntel yaʼ ti Ucrania».

Cheʼ ti 9 chaʼan Marzo, 2022, ñaʼtʌbilix chuqui mi caj i chojquel majlel. Tsaʼ otsʌnti ti caja tac bajcheʼ weʼel, chʌy am bʌ ti lata, cereal, arroz, buʼul, xapom yicʼot papel higiénico. I tsaʼ ñaʼtʌnti chaʼan i tojol jiñi tsaʼ bʌ chocbentiyob majlel jujuntiquil jiñʌch 65 dolares, i chaʼañʌch miʼ jalʼan chʌmpʼejl semana. Tajol cabʌlʌch hermanojob yomoʼ bʌ jiñi coltʌntel, jin chaʼan jiñi Comité chaʼan coordinadorob tsiʼ yʌcʼʌ i tʼan chaʼan mucʼʌch i cʼʌjñel cabʌl taqʼuin chaʼan miʼ mʌjñel chuqui tac ñuc bʌ i cʼʌjñibal. Pero, ¿bajcheʼ mi caj i melob chaʼan miʼ chocob majlel i maʼañic mi tajob wocol jiñi hermanojob?

Cheʼ ti 13 chaʼan Marzo, chaʼtiquil hermanojob ti Polonia tsiʼ meleyob jumpʼejl prueba. Tsiʼ chʼʌmʌyob majlel jiñi caja tac am bʌ yaʼ ti sucursal ti Polonia cʼʌlʌl ti jumpʼejl almacén yaʼ ti Ucrania, am bʌ tiʼ tʼejl jiñi tejclum Leópolis (Lviv). Cheʼ bʌ anto yom chaʼpʼej uxpʼejl qʼuin, jiñi hermanojob yaʼ ti sucursal ti Ucrania yicʼot ti Polonia tsiʼ chaʼleyob coltayob chaʼan miʼ mejlel jiñi viaje. Tsaʼ mejli jiñi tramite tac chaʼan jiñi hermanojob miʼ cʌjñelob chaʼan xcoltayajob i miʼ mejlelob ti cʼaxel yaʼ ti frontera. Cheʼ jaʼel, tsiʼ yʌcʼʌyob ti cʌjñel chaʼan jiñi carro woli bʌ i cʼʌñob yilo i chaʼan jach coltaya. I jiñi hermanojob ti Ucrania tsiʼ qʼueleyob baqui bʌ jiñi bij ñumen ora bʌ miʼ cʼotel yaʼ ti almacén. Pejtelel jiñi caja tac tsaʼ cʼoti ti Leópolis. I cheʼ jiñi, mach i taja jumpʼejl qʼuin tsaʼ laj aqʼuentiyob jiñi Comité chaʼan socorro. Jiñi chaʼtiquil hermanojob wen jach tsaʼ chaʼ cʼotiyob ti Polonia. Ili weñʌch tsaʼ mejli come Jehová tsiʼ coltayob yicʼot wen jach bajcheʼ tsiʼ chajpayob jiñi hermanojob.

Weñʌch tsaʼ loqʼui jiñi ñaxam bʌ viaje, pero tsajñi bʌ i yʌcʼob jiñi chaʼtiquil hermanojob mach i tajayic jumpʼejl tonelada. Yomto miʼ yʌjqʼuel 200 tonelada. ¿Bajcheʼ mi caj i chʼʌjmel majlel yicʼot chaʼan ora miʼ pujquel?

«A winicob xʼixicob mi caj i yʌcʼob i bʌ ti jumpʼejl i pusicʼal»

Cabʌl lac piʼʌlob tiʼ petol pañimil tsiʼ mulayob i chaʼleñob coltaya cheʼ bʌ tsiʼ pejcayob yaʼ ti jw.org chaʼan bajcheʼ woliʼ ñusañob wocol jiñi hermanojob tiʼ caj jiñi guerra. Jiñi ñajt bʌ chumulob yaʼ ti Ucrania tsiʼ yʌcʼʌyob i donación tac chaʼan miʼ coltañob jiñi eʼtel muʼ bʌ i melob jiñi i testigojob Jehová come yujilob chaʼan weñʌch bajcheʼ miʼ caj i cʼʌñob. I jiñi país tac lʌcʼʌl bʌ yaʼ ti Ucrania tsiʼ yʌqʼueyob i yorajlel chaʼan miʼ chaʼleñob coltaya. Ili jiñʌch chaʼpʼej uxpʼejl ejemplo.

Ti Polonia, yonlel tsiʼ chaʼleyob coltaya chaʼan miʼ butʼob bʌlñʌcʼʌl o yan tac bʌ yaʼ ti caja tac, i cabʌl alobob tsiʼ meleyob alʌ tarjeta tac. Bartosz Kościelniak, am bʌ ti jiñi Departamento chaʼan mʌñoñel yaʼ ti sucursal am bʌ ti Polonia tsiʼ yʌlʌ: «Jiñi Salmo 110:3 miʼ yʌl chaʼan jiñi i wiñicob Jehová ti jumpʼejl i pusicʼal mi caj i yʌcʼob i bʌ chaʼan miʼ chaʼleñob coltaya. Añʌch c wen pejca jiñi, pero maʼañic baqui ora chumtʌbil c chaʼan jinto tsaʼ j qʼuele bajcheʼqui yonlel lac piʼʌlob miʼ yʌcʼob i bʌ chaʼan miʼ chaʼleñob coltaya».

Juntiquil hermano am bʌ i yempresa tsiʼ yʌcʼʌ ti majan jiñi i tráiler tac yicʼot tsiʼ tojo jiñi gasolina muʼ bʌ caj i cʼʌjñel. Tsiʼ yʌlʌ: «Iliyi jiñʌch bajcheʼ miʼ mejlel c pʌs chaʼan mic wen cʼuxbin jiñi quermañujob yicʼot Jehová. Wen tijicña mi cubin cheʼ tsaʼʌch mejli j coltañob». Chaʼan miʼ pujquel iliyi, ñumen ti 7,700 litro gasolina tsaʼ chaʼlenti ti donar, i jiñi hermanojob lʌcʼʌ cheʼ bʌ 48,000 kilómetro tsiʼ ñijcayob jiñi carro chaʼan miʼ cʼotelob.

Ti 28 chaʼan marzo cʼotemix ti Ucrania cheʼ bʌ 100 tonelada bʌlñʌcʼʌl, tsʼac tac yicʼot yan tac bʌ. Pejtelel iliyi an mejlem wocolix i yʌlʌ i yeʼtel jiñi xcoltayajob yicʼot i cʼuxbiya. Ili tsaʼ mejli cheʼ bʌ an jaxto 15 día i mejlel jiñi prueba. Come cabʌl hermanojob yicʼot xchoñoñelob tsiʼ yʌcʼʌyob chuqui i cʼʌjñibal tac bʌ, mach cabʌlix taqʼuin tsaʼ cʼʌjñi chaʼan miʼ chajpʌntel jiñi coltaya. Cʼʌlʌl ili ora, jiñi i testigojonbʌlon Jehová an lon c choco majlel ñumen ti 190 tonelada chuqui i cʼʌjñibal i chaʼan yaʼ ti Ucrania. ¿Bajcheʼ yubil tsiʼ yubiyob i bʌ jiñi hermanojob ti Ucrania?

«Alʌ majtañʌl tac melbil bʌ yicʼot cʼuxbiya»

Cheʼ bʌ tsaʼ cʼoti ti Leópolis jiñi caja tac, pejtelel Comité chaʼan socorro añoʼ bʌ ti Ucrania tsiʼ pucbeyob majqui i cʼʌjñibal bʌ i chaʼañob. Cabʌl caja tac tsaʼ chʼʌjmi majlel ti yan tac bʌ tejclum ñumen bʌ ti 1,300 kilómetro i ñajtlel yaʼ ti Leópolis. Anquese weñʌch bajcheʼ tsaʼ chajpʌnti, tsaʼʌch i tsʼitaʼ chʼʌmbe i yorajlel chaʼan miʼ yʌjqʼuel tac.a

Markus Reinhardt, Comité bʌ yaʼ ti sucursal ti Ucrania, tsiʼ yʌlʌ: «Cabʌl hermanojob an i qʼuelbeyob i cʼuxbiya yicʼot i coltaya Jehová chaʼan ili woli bʌ i yujtel, yicʼot jiñi wenlel am bʌ i tajayob cheʼ miʼ jacʼob muʼ bʌ i yʌl jiñi organización cheʼ bʌ maxto ujt jumpʼejl wocol. Jumpʼejl ejemplo, ti lac pejtelel an subentiyonla chaʼan mi lac wʌn tempan bʌlñʌcʼʌl yicʼot jaʼ muʼ bʌ mejlel i jalʼan cabʌl semana. Juntiquil anciano i cʼabaʼ Anton yaʼ bʌ an ti congregación ti Kiev tsiʼ yʌlʌ: ‹Mic wen aqʼuen lojon wocolix i yʌlʌ jiñi organización chaʼan an i wʌn subeyon lon chuqui yom mi lon c mel cheʼ bʌ maxto ujt jiñi wocol. Cheʼ bʌ wʌn tempʌbil lon c chaʼan tsʼitaʼ bʌlñʌcʼʌl yicʼot jaʼ i an jumpʼejl lon c radio, tiʼ sujm an i coltayon lon chaʼan chʌn cuxul mi lon cajñel›. Weñʌch cheʼ jiñi hermanojob miʼ jacʼob muʼ bʌ i yʌl jiñi organización, ili an i colta jiñi sucursal tac chaʼan miʼ chajpan bajcheʼ mi caj i coltañob».

¿Bajcheʼ yubil tsiʼ yubiyob jiñi hermanojob cheʼ tsaʼ cʼoti jiñi coltaya? Míkola yicʼot Zinaida, chumuloʼ bʌ ti Járkov, tsiʼ yʌlʌyob: «Tsiʼ wen ñijca lon c pusicʼal cheʼ bʌ mucʼʌch i pensariñoñob lojon. Wen wocolix laʼ wʌlʌ chaʼan jiñi bʌlñʌcʼʌl yicʼot tsʼac tac. Tsiquil chaʼan Jehová jiñʌch woli bʌ i mel iliyi». Valentina, chumul bʌ jeʼel ti jiñi tejclum, tsiʼ yʌlʌ: «Cheʼ bʌ tsaʼ caji jiñi guerra, yomʌch mic tsol lon c bʌ chaʼan mi lon c mʌn jiñi bʌlñʌcʼʌl, pero an i tajol maʼañic mi lon c taj jiñi com bʌ lojon. Pero Jehová wolʌch i qʼuel jiñi lon c wocol. Jin chaʼan, jiñi hermanojob tsiʼ chʼʌmbeyon lon tilel jiñi caja tac yaʼʌch an jiñi com bʌ lojon. Cheʼ bʌ wocolʌch woli lac ñusan i maʼañic lac loqʼuib mi laj qʼuel, yaʼʌch baqui ora mi laj qʼuel chaʼan Jehová yicʼot jiñi i yorganización weñʌch bajcheʼ woliʼ cʌntañonla. Tijicña mi la cubin cheʼ mi laj coltʌntel cheʼ bʌ i cʼʌjñibal lac chaʼan».

Evguen yicʼot Irina, tsaʼ bʌ putsʼiyob majlel ti Mariúpol, tsiʼ yʌlʌyob: «Wen wocolix laʼ wʌlʌ cheʼ tsaʼ laʼ cʌntayon lojon yicʼot jiñi laʼ cʼuxbiya. Tiʼ sujm, jiñi laʼ coltaya tsaʼ juli cheʼ bʌ i cʼʌjñibal lon c chaʼan. Ti ñaxan, tsaʼ lon c ñaʼtan chaʼan jiñi caja tac mucʼ jach i chʼʌm tilel bʌlñʌcʼʌl yicʼot yan tac bʌ, pero cheʼ bʌ tsaʼ lon c jamʌ, tsaʼ lon taja alʌ majtañʌl tac melbil bʌ yicʼot cʼuxbiya».

Tsiquil chaʼan jiñi i yespíritu Jehová tsaʼʌch i colta jiñi hermanojob tsaʼ bʌ i chaʼleyob coltaya yaʼ baqui woliʼ yujtel guerra tac. I tsaʼʌch mejli ti ajqʼuel jaʼel jiñi coltaya yicʼot jiñi donación tac tsaʼ bʌ laʼ wʌcʼʌ, tajol an tsaʼ bʌ laʼ mele ti donate.jw.org. ¡Wen wocolix laʼ wʌlʌ chaʼan laʼ coltaya!

Ora mic ñop j cʌcʼ lojon coltaya yicʼot wen jach mi lon c mel

1. 

   24 chaʼan febrero, 2022: Jiñi Comité chaʼan coordinadorob tsiʼ yʌcʼʌ i tʼan chaʼan jiñi sucursal am bʌ ti Ucrania miʼ cʼʌn taqʼuin chaʼan mi coltan jiñi hermanojob.

2. 

   24 chaʼan febrero cʼʌlʌl ti 8 chaʼan marzo, 2022: Jiñi sucursal ti Ucrania miʼ mʌn chuqui tac i cʼʌjñibal i miʼ yʌqʼuen tiʼ wenta jiñi Comité chaʼan Socorro chaʼan miʼ puc. Cheʼ jaʼel, jiñi sucursal miʼ chajpan i bʌ chaʼan miʼ chʼʌm i miʼ puc chuqui tac tilem ti Polonia.

3. 

   9 chaʼan marzo, 2022: Jiñi Comité chaʼan coordinadorob miʼ yʌcʼ i tʼan chaʼan miʼ chojquel majlel i cʼʌjñibal bʌ i chaʼañob ti Ucrania.

4. 

   10 cʼʌlʌl 12 chaʼan marzo, 2022: Ti Polonia miʼ chajpʌntel jumpʼejl viaje chaʼan miʼ chojquel majlel yaʼ ti Leópolis (Ucrania) chuqui tac i cʼʌjñibal bʌ.

5. 

   13 chaʼan marzo, 2022: Tsaʼ mejli jiñi ñaxam bʌ viaje chaʼan miʼ chʼʌjmel majlel chuqui tac i cʼʌjñibal yaʼ ti Leópolis.

6. 

   14 cʼʌlʌl 16 chaʼan marzo, 2022: Ti Polonia, jiñi xcoltayajob añoʼ bʌ ti jiñi Oficina muʼ bʌ i qʼuel i melol i yotlel chʼujutesaya tsiʼ tempayob i bʌ tiʼ yotlel colem tempa bʌ lʌcʼʌl bʌ an ti Poznań chaʼan miʼ butʼob bʌlñʌcʼʌl yicʼot yan tac bʌ.

7. 

   17 chaʼan marzo, 2022: Cheʼ ñumeñix chʌmpʼejl qʼuin i mejlel jiñi ñaxam bʌ viaje, tsaʼ chojqui majlel 13 tonelada bʌlñʌcʼʌl yicʼot yan tac bʌ ti frontera chaʼan Ucrania.

8. 

   21 cʼʌlʌl 27 chaʼan marzo, 2022: Ti Polonia, miʼ ñumen butʼob caja tac chaʼan miʼ chojquel majlel ti Ucrania. I mach i taja jumpʼejl qʼuin, tsaʼ laj pucbentiyob jiñi i cʼʌjñibal bʌ i chaʼañob.

9. 

   28 chaʼan marzo, 2022: Tsaʼix ñumi 20 día cheʼ tsaʼ ajli chaʼan miʼ chocbentelob majlel coltʌntel ti Ucrania, i añix pujquem 100 tonelada bʌlñʌcʼʌl, tsʼac tac yicʼot yan tac bʌ.

Cʼʌlʌl ili ora, jiñi i testigojonbʌlon Jehová an lon c choco majlel yaʼ ti Ucrania ñumen ti 190 tonelada bʌlñʌcʼʌl yicʼot yan tac bʌ.