Jiñi uxpʼejl bʌ qʼuin colem tempa bʌ tac tsaʼ ñusʌnti ti radio yicʼot ti televisión

Cheʼ bajcheʼ tsaʼ ujti ti jiñi uxpʼejl bʌ qʼuin colem tempa bʌ ti 2020 maʼañic baʼ ujtem. Pejtelel jiñi discurso tsaʼ chaʼlenti ti grabar, tsaʼ letsʌnti ti internet chaʼan majqui jach miʼ mejlel i qʼuel. Pero jiñi la quermañujob ti Malaui yicʼot ti Mozambique maʼañic tsiʼ cʼʌñʌyob internet chaʼan miʼ qʼuelob jiñi tempa bʌ, ¿bajcheʼ tsiʼ meleyob?

Jiñi Comité chaʼan coordinadorob yicʼot jiñi Comité chaʼan bʌ cʌntesʌntel am bʌ ti wenta jiñi Junmojt muʼ bʌ i pʌsob bʌ, tsiʼ yʌcʼʌyob i tʼan chaʼan jiñi uxpʼejl bʌ qʼuin colem tempa bʌ miʼ ñusʌntel ti radio yicʼot ti televisión yaʼ ti Malaui yicʼot ti Mozambique. ¿Chucoch cheʼ tsaʼ mejli bajcheʼ ili? Come Malaui jiñʌch jumpʼejl tejclum baqui wen lets jiñi internet. Jin chaʼan, mach cabʌlic jiñi hermanojob añob i chaʼan tiʼ yotot. William Chumbi, ochem bʌ ti jiñi Comité chaʼan Sucursal ti Malaui, tsiʼ yʌlʌ: «Cojach ti radio yicʼot ti televisión miʼ mejlel ti ñusʌntel jiñi colem tempa bʌ chaʼan jiñi hermanojob miʼ qʼuelob o miʼ ñʌchʼtañob». Luka Sibeko, ochem bʌ jaʼel ti Comité chaʼan Sucursal ti Malaui, tsiʼ yʌlʌ: «Machic an jiñi radio yicʼot televisión, cabʌl hermanojob maʼañic tsaʼ mejli i qʼuelob o i ñʌchʼtañob jiñi colem tempa bʌ». Cheʼʌch miʼ yujtel jaʼel ti Mozambique, mach cabʌlic hermanojob miʼ mejlel i mʌñob wem bʌ i celular o tableta mi jiñicto chaʼan miʼ tojob internet.

¿Bajcheʼ tsaʼ mejli?

Tiʼ caj jiñi pandemia chaʼan COVID-19, an emisora tac chaʼan radio yicʼot televisión wolix bʌ i ñusan jiñi lac tempa bʌ tac muʼ bʌ i mejlel ti jujumpʼejl semana.a Jiñi hermanojob tsiʼ cʼajtibeyob jiñi emisora tac chaʼan miʼ yʌqʼueñob cabʌl hora chaʼan miʼ mejlel i ñusañob jiñi colem tempa bʌ tac.

Pero jiñi hermanojob ti Malaui tsiʼ tajayob jumpʼejl wocol. Jiñi emisora tac chaʼan radio yicʼot televisión cojach miʼ mejlel i yʌqʼuen jumpʼejl hora juntiquil lac piʼʌl mi an chuqui yom i ñusan, come miʼ ñaʼtañob chaʼan mi caj i lujbʼañob jiñi muʼ bʌ i ñʌchʼtañob mi tsaʼ ñumen jalʼa. Pero tsaʼ tsictesʌbentiyob chaʼan jiñi woli bʌ i mejlel chaʼañʌch miʼ coltʌntel lac piʼʌlob. Jumpʼejl ejemplo, anquese jiñi lac piʼʌlob maʼañic miʼ mejlelob ti loqʼuel tiʼ yotot miʼ mejlel i ñʌchʼtañob jiñi wen tʼan tac am bʌ ti Biblia. Iliyi miʼ mejlel i coltañob chaʼan miʼ sujtelob ti ñumen wem bʌ lac piʼʌlob yicʼot chaʼan tijicñayob tiʼ familia. Cheʼ bʌ tsiʼ yubiyob iliyi, jiñi emisora tac tsiʼ jacʼʌ i yʌqʼueñob cabʌl hora jiñi hermanojob.

Ti Malaui, jumpʼejl emisora chaʼan radio yicʼot chaʼan jumpʼejl televisión tsiʼ ñusayob jiñi colem tempa bʌ. Yonlel lac piʼʌlob ti jiñi país tsaʼ mejli i qʼuelob yicʼot i ñʌchʼtañob, i yaʼ ti Mozambique, 85 emisora chaʼan radio yicʼot jumpʼejl chaʼan televisión tsiʼ ñusayob jaʼel.

Tsaʼ cʼʌjñi 28,227 dólaresb chaʼan miʼ ñusʌntel jiñi colem tempa bʌ ti televisión i lʌcʼʌ cheʼ bʌ 20,000 dólares tsaʼ cʼʌjñi chaʼan miʼ ñusʌntel ti radio ti jiñi chaʼpʼejl país. Jiñi radio tac baqui tsaʼ ñusʌnti jiñi colem tempa bʌ, an tsaʼ bʌ tojle 15 dólar yicʼot 2,777 dólares, come mach junlajalic baqui jaxʌl miʼ cʼotel jiñi i señal.

Jiñi hermanojob wen jach bajcheʼ tsiʼ cʼʌñʌyob jiñi donación tac. Jumpʼejl ejemplo, ti Malaui, jiñi emisora tac mach wen letsic bajcheʼ tsaʼ tojle, an baqui tsaʼ aqʼuentiyob 30 % de descuento. Chaʼan jiñi, maʼan tsaʼ cʼʌjñi 1,711 dólares. An emisora tac yaʼ ti Mozambique tsaʼ bʌ i juʼsʌbeyob i tojol come jiñi testigojob cʌmbilob yaʼi chaʼan wem bʌ lac piʼʌlob yicʼot chaʼan mucʼʌch i tojob chuqui miʼ cʼajtiñob.

Jiñi hermanojob tsiʼ qʼueleyob ti ñuc tsaʼ bʌ mejli

Jiñi la quermañujob wen tijicñayob cheʼ tsaʼʌch i ñʌchʼtayob yicʼot i qʼueleyob jiñi colem tempa bʌ. Patrick, juntiquil anciano ti congregación yaʼ ti Malaui, tsiʼ yʌlʌ: «Mi cʌqʼuen lojon wocolix i yʌlʌ jiñi Junmojt muʼ bʌ i pʌsob bij chaʼan tsiʼ meleyob iliyi ti lon c tojlel». Yambʌ hermano ti Malaui, i cʼabaʼ Isaac, tsiʼ yʌlʌ: «Cojach an lon c chaʼan jiñi radio chaʼan miʼ mejlel lon c ñʌchʼtan jiñi colem tempa, wocolix laʼ wʌlʌ. Jumpʼejlʌch ñuc bʌ lon c majtan tilem bʌ tiʼ yorganización Jehová. Cheʼ tsaʼ mejli bajcheʼ ili, pejtelel jiñi c familia tsiʼ tajayob i wenlel chaʼan jiñi programa, tsiquilʌch chaʼan Jehová miʼ wen cʼuxbin jiñi i tejclum».

Juntiquil xsubtʼan ti Mozambique cojaxto bʌ tsiʼ ñusa jiñi colem tempa bʌ ti 2020, tsiʼ yʌlʌ: «Cheʼ tsaʼ j qʼuele ti televisión tsiʼ cʼajtesʌbeyon chaʼan Jehová jiñʌch jiñi Dios ñumen pʼʌtʌl bʌ. Jiñi pandemia maʼañic tsiʼ mʌcta chaʼan miʼ mejlel jiñi colem tempa bʌ i wʌʼto tsaʼ lon j qʼuele ti lon cotot. Tsaʼ j qʼuele chaʼan jiñi i wiñicob Jehová mucʼʌch i cʼuxbiñob i bʌ yicʼot chaʼan iliyi jiñʌch i sujm bʌ ñopbalʌl».

Ti jumpʼejl congregación juntiquil anciano i cʼabaʼ Wyson, tsiʼ yʌlʌ: «Com cʌqʼuen wocolix i yʌlʌ jiñi xucʼul bʌ xyaj eʼtel cheʼ maʼañic tsiʼ cʌyʌyon lojon anquese an ili pandemia. Mach cabʌlic chuqui an lon c chaʼan i chumulon lojon ti jumpʼejl parte baqui wen an pʼumpʼuñiyel. Pero cheʼ bʌ tsaʼʌch mejli ti ñusʌntel jiñi colem tempa bʌ ti radio yicʼot ti televisión tsaʼ mejli c locʼsʌben lon i wenlel».

Jiñi Comité chaʼan coordinadorob yicʼot chaʼan bʌ Cʌntesa tsaʼʌch chaʼ mejli i melob chaʼan jiñi colem tempa bʌ ti 2021 miʼ ñusʌntel ti radio yicʼot ti televisión, pero mach cojachix ti Malaui yicʼot ti Mozambique yicʼotix ti yan tac bʌ parte. ¿Bajcheʼ miʼ tajtʌl jiñi taqʼuin chaʼan miʼ tojtʌl? Ili miʼ mejlel chaʼan jiñi donación tac muʼ bʌ i yʌjqʼuel chaʼan jiñi eʼtel muʼ bʌ i mejlel tiʼ petol pañimil i miʼ mejlel yaʼ ti donate.jw.org. Wocolix laʼ wʌlʌ ti laʼ pejtelel chaʼan jiñi la donación tac.