Tiʼ yorajlel jiñi COVID-19 tsaʼ j qʼuele lon chuqui tac yom miʼ mejlel tiʼ Yotlel tempa bʌ chaʼan mi laj cʌntan lac bʌ

Cheʼ tiʼ tejchibal marzo 2022, tsaʼ ajqʼui ili anuncio yaʼ ti jw.org: «Tijicña mi lon cubin cheʼ mic sub lojon chaʼan jiñi Junmojt muʼ bʌ i pʌsob bij tsaʼix i ñaʼtan chaʼan, mi jiñi yumʌlob yaʼ ti laʼ lumal maʼañix chuqui mʌctʌbil i chaʼañob, muqʼuix caj i mejlel i chaʼ tempan i bʌ pejtelel jiñi congregación cheʼ ti semana 1 chaʼan abril». ¡I testigojonbʌlon Jehová wen tijicña tsaʼ lon cubi cheʼ bʌ tsaʼ c pejca lojon ili noticia! Pero jiñi pandemia maxto añic jilem.a Chaʼan maʼañic miʼ cʼamʼañob jiñi muʼ bʌ caj i cʼotelob ti tempa bʌ, cabʌl chuqui yom miʼ mejlel yicʼot yom miʼ cʼʌjñel yaʼ tiʼ Yotlel tempa bʌ. ¿Bajcheʼ mi caj i mejlel chaʼan tsʼʌcʌl chuqui an yaʼ tiʼ yotlel tempa bʌ come añix chaʼpʼejl jab maʼañic miʼ cʼʌjñel?

Tiʼ sujm, jiñi hermanojob añix cabʌl uw caj i chajpañob i bʌ chaʼan cheʼ bʌ miʼ cʼotel i yorajlel mi lac chaʼ tempan lac bʌ.

Mach junlajalic chuqui tsaʼ mejlel ti jujumpʼejl congregación

Cheʼ bʌ an jaxto jumpʼejl uw tsaʼ laj cʌyʌ majlel yaʼ tiʼ Yotlel tempa bʌ cheʼ ti 2020, jiñi Departamento Mundial chaʼan Diseño yicʼot Construcción ti Warwick (Nueva York) tsaʼ caji i qʼuel bajcheʼ jiñi COVID-19 mi caj i yʌcʼ ti wocol jiñi i Yotlel tempa bʌ yicʼot chuqui yom miʼ mejlel chaʼan mi laj cʌntan lac bʌ cheʼ mi lac chaʼ tempan lac bʌ.

Mach junlajalic chuqui yom miʼ mejlel ti jujumpʼejl tejclum. Mathew De Sanctis muʼ bʌ ti coltaya ti jiñi Departamento Mundial chaʼan Diseño yicʼot Construcción, miʼ yʌl: «An tejclum tac baqui wocol miʼ tajtʌl baqui miʼ mejlel lac poc laj cʼʌb. Mi ti jumpʼejl i Yotlel tempa bʌ maʼañic agua potable, yom miʼ mʌjñel jiñi jaʼ o miʼ chʼʌjmel tilel ti jumpʼejl río o ti jumpʼejl pozo». Ti yan tac bʌ tejclum, jiñi añoʼ bʌ i yeʼtel tsiʼ yʌlʌyob chaʼan bajcheʼ yom miʼ cʼʌjñel jiñi clima o chaʼan yom wen miʼ yochel jiñi icʼ yaʼ baqui miʼ yujtel tempa bʌ yicʼot chaʼan miʼ yʌjqʼuel letrero tac muʼ bʌ i yʌl bajcheʼ miʼ mejlel laj cʌntan lac bʌ.

¿Chuqui tsiʼ meleyob jiñi hermanojob? Mathew miʼ yʌl chaʼan ti cabʌl i Yotlel tempa bʌ tiʼ sʌclayob «chuqui tac miʼ mejlel i cʼʌñob i mach bʌ wen letsic i tojol miʼ loqʼuel». Jumpʼejl ejemplo, jiñi hermanojob ti Papúa Nueva Guinea tsiʼ cʼʌñʌyob jumpʼejl bux de 20 litro bʌ i tsiʼ yotsʌbeyob jumpʼejl alʌ llave chaʼan miʼ mejlel i pocob i cʼʌb. Iliyi mach wen letsic i tojol tsaʼ loqʼui, cojach tsaʼ cʼʌjñi 40 dólares. Cheʼ jaʼel, tsaʼ mʌjñi ñumen ti 6 mil baqui miʼ pocob i cʼʌb chaʼan miʼ chojquel majlel ti jiñi Yotlel tempa bʌ tac am bʌ ti África.

Chaʼan ñumen wen miʼ yochel jiñi icʼ yaʼ tiʼ Yotlel tempa bʌ tac tsaʼ chaʼlenti ti instalar o tsaʼ qʼuextʌnti jiñi ventilador o jiñi clima tac. I cabʌl congregación tsiʼ mʌmbeyob i teʼel tac jiñi micrófono chaʼan maʼañic miʼ chucob jiñi hermanojob cheʼ bʌ miʼ yʌcʼob i comentario. Cheʼ jaʼel, tsiʼ chaʼleyob wersa chaʼan miʼ chaʼleñob ti desinfectar yaʼ baqui miʼ ñumen tʌjlel tac cheʼ bajcheʼ jiñi puerta yicʼot baqui miʼ pocob i cʼʌb. I an congregación tac tsaʼ bʌ i chaʼleyob ti instalar jumpʼejl sensor chaʼan miʼ bajñel loqʼuel jaʼ yaʼ ti baño cheʼ bʌ miʼ pocob i cʼʌb. Ti Chile tsaʼ cʼʌjñi cheʼ bʌ 1.400 dólares chaʼan tsʼʌcʌl chuqui an yaʼ tiʼ Yotlel tempa bʌ.

Anquese jiñi ñuc bʌ i cʼʌjñibal jiñʌch chaʼan tsʼʌcʌl chuqui an yaʼ tiʼ Yotlel tempa bʌ chaʼan miʼ cʌntañob i bʌ tiʼ caj jiñi cʼamʌjel, jiñi hermanojob tsiʼ chaʼleyob wersa chaʼan wen miʼ cʼʌjñel jiñi donación tac. Jumpʼejl ejemplo, an país tac baqui jiñi yumʌlob tsiʼ chaʼleyob ti donar jiñi pojqui cʼʌbʌl yicʼot i teʼel tac jiñi micrófono, jiñi hermanojob tsaʼʌch i chʼʌmʌyob. Cheʼ jaʼel, jiñi sucursal tac tsiʼ tem chaʼleyob eʼtel chaʼan miʼ mʌñob ti on chuqui muʼ bʌ caj i cʼʌjñel ti jiñi i Yotlel tempa bʌ tac i cheʼ bajcheʼ jiñi maʼañic miʼ cʌlʌx cʼʌjñel taqʼuin. Jiñi sucursal tac yicʼot jiñi Departamento Mundial chaʼan Compras tsiʼ chaʼleyob tʼan yicʼot i yumob jiñi fábrica tac i cheʼ bajcheʼ jiñi mach wen letsic i tojol chuqui miʼ chonbentelob i ora miʼ cʼotelob ti cʌybentel.

«Pejtelel tsaʼ bʌ mejli tsiʼ yʌqʼueyon cubin c tijicñʌyel»

Pejtelel tsaʼ bʌ mejli tiʼ Yotlel tempa bʌ tsiʼ yʌqʼueyob i yubin i tijicñʌyel jiñi muʼ bʌ i cʼotelob ti tempa bʌ tac i maʼañic chuqui miʼ bʌcʼñañob. Juntiquil hermana ti Perú i cʼabaʼ Dulcine tsiʼ yʌlʌ chaʼan tsiʼ bʌcʼña cheʼ bʌ tsiʼ yubi chaʼan muqʼuix caj lac chaʼ majlel tiʼ Yotlel tempa bʌ. Miʼ yʌl: «Tsiʼ tajayon COVID-19 cheʼ bʌ tsaʼ jaxto caji ili pandemia, i tsaʼ caji c wen bʌcʼñan cheʼ bʌ tsaʼ cubi chaʼan muqʼuix caj lac chaʼ majlel tiʼ Yotlel tempa bʌ come mach comix miʼ chaʼ tajon ili cʼamʌjel. Pero cheʼ bʌ tsaʼ ochiyon yaʼ tiʼ Yotlel tempa bʌ tsaʼ j qʼuele chaʼan jiñi ancianojob cabʌl chuqui tsiʼ meleyob chaʼan mi laj cʌntan lac bʌ. Tsiʼ yʌcʼʌyob gel chaʼan laj cʼʌb yicʼot an i teʼel tac jiñi micrófono. Cheʼ jaʼel, miʼ chaʼlentel ti desinfectar jiñi i Yotlel tempa bʌ cheʼ bʌ maxto tejchem jiñi tempa bʌ yicʼot cheʼ miʼ yujtel. Pejtelel tsaʼ bʌ mejli tsiʼ yʌqʼueyon cubin c tijicñʌyel».b

Jiñi hermana Sara, chʼoyol bʌ ti Zambia, yʌñʌlʌch chuqui tsiʼ ñusa. Miʼ yʌl: «Jiñi c ñoxiʼal tsaʼ chʌmi ti COVID-19. Tsaʼ c wen pensari bajcheʼ yubil mi caj cubin cheʼ bʌ mic chaʼ majlel ti tempa bʌ pero mach quicʼotix c ñoxiʼal». ¿Bajcheʼ yubil tsiʼ yubi cheʼ bʌ chaʼ tsajñix ti tempa bʌ? Miʼ yʌl: «Cheʼ bʌ tsaʼ chaʼ majliyon ti tempa bʌ tsiʼ pʌsbeyon chaʼan Jehová maʼañic miʼ bajñel cʌyonla ti ili cojix bʌ qʼuin. Ti jiñi tempa bʌ mij qʼuel bajcheʼ jiñi ancianojob yicʼot jiñi yambʌ hermanojob miʼ ñuqʼuesañob c pusicʼal, miʼ pʌsbeñoñob i cʼuxbiya yicʼot miʼ coltañoñob».

Tiʼ petol pañimil jiñi hermanojob wen tijicñayob cheʼ muqʼuix i chaʼ tempañob i bʌ tiʼ Yotlel tempa bʌ. Wocolix laʼ wʌlʌ chaʼan jiñi laʼ donación tac, i cabʌl tsaʼ bʌ laʼ choco tilel ti donate.jw.org. Jiñi laʼ donación tac an i colta chaʼan jiñi hermanojob miʼ yubiñob i tijicñʌyel i maʼañic chuqui miʼ bʌcʼñañob cheʼ miʼ cʼotelob tiʼ Yotlel tempa bʌ.