¿Chuqui yom mic mel chaʼan mic sujtel ti i testigo Jehová?
Jesús tsiʼ yʌlʌ yaʼ ti Mateo 28:19, 20 chuqui tac yom mi lac mel chaʼan mi lac sujtel ti i testigo Jehová. Ti ili versículo tac miʼ yʌl chaʼan cheʼ mi la cʌcʼ ti cʌñol Jehová mi lac sujtel ti xcʌntʼan i chaʼan Jesús.
1: Yom maʼ cʌn am bʌ ti Biblia. Jesús tsiʼ sube jiñi xcʌntʼañob chaʼan yom miʼ sujtesañob ti xcʌntʼan jiñi wiñicob xʼixicob yicʼot chaʼan miʼ cʌntesañob cheʼʌch bajcheʼ tsaʼ cʌntesʌntiyob (Mateo 28:19, 20). Yaʼ ti Biblia miʼ mejlel a cʌn chuqui yom maʼ mel chaʼan tijicña maʼ chumtʌl yicʼot chaʼan maʼ tajben i sujmlel a cuxtʌlel, ñumento yaʼ baqui an i cʌntesa tac Jesús (2 Timoteo 3:16, 17). Tijicña mi caj lon cubin cheʼ mi lon c pʌsbeñet muʼ bʌ i yʌl jiñi Biblia ti jumpʼejl estudio loqʼuem bʌ ti Biblia mach bʌ tojbilic (Mateo 10:7, 8; 1 Tesalonicenses 2:13).
2: Yom maʼ mel cheʼ bajcheʼ maʼ cʌn. Jesús tsiʼ sube jiñi xcʌntʼañob chaʼan yom miʼ melob cheʼ bajcheʼ tsiʼ cʌntesayob, chaʼan mach cheʼ jach yom miʼ cʌñob (Mateo 28:20). Ili yom i yʌl chaʼan mach yomic maʼ pejcan a Biblia chaʼan cheʼ jach maʼ mulan a toʼol ñaʼtan, tajol an yom bʌ maʼ qʼuextan ti a pensar o ti a melbal (Hechos 10:42; Efesios 4:22-29; Hebreos 10:24, 25). Jiñi muʼ bʌ i jacʼbeñob i mandar Jesús cheʼʌch yomob i mel cheʼ bajcheʼ tsiʼ mele, jin chaʼan miʼ yʌcʼob i bʌ ti Jehová (Mateo 16:24).
3: Chaʼlen chʼʌmjaʼ (Mateo 28:19). Yaʼ ti Biblia, jiñi chʼʌmjaʼ miʼ lajintel bajcheʼ lac mujquel (lajin yicʼot Romanos 6:2-4). Cheʼ mi lac chʌmel yom i yʌl chaʼan tsaʼix laj cʌyʌ tiʼ pejtelel lac tsucul melbal i muqʼuix lac tsijib tech chumtʌl. Jin chaʼan, cheʼ bʌ maʼ chaʼlen chʼʌmjaʼ woli a pʌs chaʼan tsaʼix a mele jiñi chaʼchajp tsaʼ bʌ i yʌlʌ Jesús yicʼot chaʼan maʼ suben Dios miʼ yʌqʼueñet sʌc bʌ a conciencia (Hebreos 9:14; 1 Pedro 3:21).
¿Bajcheʼ mic ñaʼtan mi chajpʌbiloñix chaʼan mic chaʼlen chʼʌmjaʼ?
Pejcan jiñi ancianojob ti a congregación. Jiñi ancianojob miʼ cajelob ti tʼan yicʼotet chaʼan miʼ qʼuelob mi mucʼʌch a chʼʌmben isujm muʼ bʌ i yʌl jiñi Biblia, mi woliyʌch a mel jiñi woli bʌ a cʌn yicʼot mi tsaʼix a wʌcʼʌ a bʌ ti Dios (Hechos 20:28; 1 Pedro 5:1-3).
¿Cheʼ ba yom miʼ melob jaʼel jiñi Testigojoʼ bʌ i tat i ñaʼ?
Cheʼʌchi. Mij cosan lon j calobilob cheʼʌch bajcheʼ miʼ yʌl jiñi Biblia, mij ‹cʌntesan› lojon cheʼ bajcheʼ miʼ mulan Jehová (Efesios 6:4). Pero cheʼ ñucobix, jiñobʌch miʼ ñaʼtañob mi mucʼʌch caj i bej cʌñob yicʼot i jacʼob muʼ bʌ i yʌl jiñi Biblia chaʼan miʼ mejlelob ti chʼʌmjaʼ (Romanos 12:2). Jin chaʼan, ti jujuntiquil miʼ cʼotel i ñaʼtan mi mucʼʌch caj i chʼujutesan Jehová o maʼañic (Romanos 14:12; Gálatas 6:5).