¿Jaytiquil i testigojob Jehová an tiʼ petol pañimil?

¿Bajcheʼ miʼ tsijquel jiñi i testigojob Jehová?

Cojach miʼ tsijquel bajcheʼ i testigojob Jehová jiñi muʼ bʌ i chʌn chaʼleñob subtʼan ti jujumpʼejl uw (Mateo 24:14). Yaʼ ochemob jiñi tsaʼix bʌ i chʼʌmʌyob jaʼ o maxto bʌ añic pero tsaʼix bʌ subenti chaʼan muqʼuix i mejlel i loqʼuelob ti subtʼan.

¿Yom ba mi la cʌcʼ taqʼuin loqʼuem bʌ ti lac pusicʼal chaʼan mi la cochel bajcheʼ i testigo Jehová?

Maʼañic. Cheʼ an majqui miʼ yʌcʼ taqʼuin loqʼuem bʌ ti i pusicʼal mach yomic i yʌl chaʼan mi caj i tsijquel bajcheʼ Testigo, chaʼan an chuqui mi caj i yʌqʼuentel i mel o mi caj i yʌqʼuentel ñuc bʌ i yeʼtel yaʼ ti organización (Hechos 8:​18-​20). An taqʼuin muʼ bʌ i yʌjqʼuel maʼañic bʌ miʼ ñaʼtʌntel majqui tsiʼ yʌcʼʌ. Jujuntiquil Testigo miʼ yʌcʼ i yorajlel, i pʼʌtʌlel yicʼot i taqʼuin cheʼ bajcheʼ miʼ loqʼuel tiʼ pusicʼal yicʼot cheʼ bajcheʼ miʼ mejlel chaʼan miʼ coltan jiñi eʼtel chaʼan bʌ subtʼan muʼ bʌ i mejlel tiʼ petol pañimil (2 Corintios 9:7).

¿Bajcheʼ miʼ ñaʼtañob jaytiquilob woliʼ chʌn chaʼleñob subtʼan?

Cheʼ bʌ miʼ yujtel jumpʼejl uw, jujuntiquil testigo miʼ yʌcʼ jumpʼejl informe chaʼan subtʼan yaʼ ti congregación baqui an. Mach xicʼbilic chaʼan miʼ yʌcʼob ili informe.

Jiñi congregación tac miʼ chaʼlen ti sumar jiñi informe i jiñʌch jaypʼejl tsaʼ loqʼui miʼ chojquel majlel ti jiñi sucursal am bʌ tiʼ wenta jiñi congregación. Jiñi sucursal miʼ choc majlel jumpʼejl informe chaʼan bʌ subtʼan yaʼ ti central mundial chaʼan jiñi país yicʼot territorio am bʌ tiʼ wenta.

Cheʼ bʌ miʼ yujtel jumpʼejl jab chaʼan bʌ subtʼana miʼ tsijquel jaytiquil i testigojob Jehová an ti jujumpʼejl país. Miʼ chaʼlentel ti sumar chaʼan miʼ ñaʼtʌntel jaytiquil Testigojob an tiʼ petol pañimil. Yaʼ ti jiñi sección «I testigojob Jehová tiʼ petol Pañimil» i chaʼan jiñi página jw.org miʼ tilel jumpʼejl informe chaʼan jujumpʼejl país yicʼot ujtem tac bʌ ti subtʼan. Ili informe miʼ wen coltañonla cheʼ bajcheʼ tsiʼ colta jiñi ñaxan bʌ xñoptʼañob (Hechos 2:​41; 4:4; 15:3).

¿Muʼ ba i tsicob jiñi muʼ bʌ i tempañob i bʌ pero maʼañic bʌ miʼ chaʼleñob subtʼan?

Maʼañic miʼ tsijquel bajcheʼ i testigojob Jehová, pero wen tijicña mi lon cubin cheʼ mi tilelob ti tempa bʌ. An cabʌlob muʼ bʌ i yajñelob tiʼ Cʼajtesʌntel i chʌmel Jesús muʼ bʌ i mejlel ti jujumpʼejl jab. Miʼ mejlel ti ñaʼtʌntel jaytiquil jiñi mucʼ jach bʌ i tempañob i bʌ cheʼ miʼ tsijquel jaytiquil i testigojob Jehová i jaytiquil miʼ yajñelob ti ili tempa bʌ. Cheʼ ti 2024, tsajñiyob 21,119,442 quixtañujob tiʼ Cʼajtesʌntel i chʌmel Jesús.

An maʼañic bʌ miʼ majlelob ti tempa bʌ tac pero miʼ chʼʌmob estudio loqʼuem bʌ ti Biblia mach bʌ tojbilic tiʼ yotot. Cheʼ ti 2024, tsaʼ lon c pʌsʌ lʌcʼʌl cheʼ bʌ 7,480,146 estudio ti jujumpʼejl uw, i an estudio tac tsaʼ bʌ aqʼuentiyob ti chaʼtiquil o uxtiquil pero mucʼ jach i tsijquel bajcheʼ jumpʼejl estudio.

¿Chucoch ñumen on i testigojob Jehová cheʼ jin miʼ tsic jiñi yumʌl?

Jiñi yumʌlob miʼ ñaʼtañob baqui bʌ i ñopbal juntiquil quixtañu cheʼ miʼ cʼajtibeñob baqui jiñi ñopbalʌl ñumen lʌcʼʌl tiʼ tojlelob miʼ yubiñob. Jumpʼejl ejemplo, jumpʼejl oficina ti Estados Unidos muʼ bʌ i tsic quixtañujob tsiʼ yʌlʌ chaʼan «tsiʼ ñopoyob i ñaʼtan mi jiñi quixtañujob tiʼ sujm añobʌch i ñopbal», i tsiʼ yʌlʌ chaʼan tsiʼ jacʼʌyob chaʼan «mucʼ jach i yʌlob, maʼañic ochemob tiʼ sujm». Pero joñon lojon, cojach mi lon c tsic bajcheʼ i testigojob Jehová jiñi muʼ bʌ i chaʼleñob subtʼan yicʼot miʼ yʌcʼob informe chaʼan subtʼan, i maʼañic mi lon c tsic jiñi mucʼ jach bʌ i yʌlob chaʼan Testigojob.