¿Cheʼ ba maʼ wubin a bʌ jaʼel bajcheʼ jiñi uxtiquilob? Tajol a womʌch a pejcan jiñi Biblia, pero an chuqui tsiʼ mʌctayet. Cabʌl lac piʼʌlob miʼ bʌcʼñañob i pejcan jiñi Biblia come wocol jax miʼ yubiñob. Pero ixcu cheʼ a wujilic chaʼan miʼ mejlel i yʌqʼueñet a tijicñʌyel yicʼot i sujmlel a cuxtʌlel, ¿mach ba añic mi caj a pejcan? ¿Ixcu cheʼ muqʼuic a subentel chaʼan añʌch chuqui miʼ mejlel a mel chaʼan maʼ ñusan a bʌ cheʼ maʼ pejcan jiñi Biblia? ¿Mucʼʌch ba caj a pejcan?

Qʼuele chuqui tsiʼ yʌlʌyob chaʼtiqui uxtiquilob tsaʼ bʌ i techeyob i pejcan jiñi Biblia i tsiʼ qʼueleyob chaʼan cabʌlʌch i wenlel.

Ezekiel, ñumeñix bʌ ti 20 i jabilel, miʼ yʌl: «Ti ñaxan, lajalon bajcheʼ jiñi tile ñumeloʼ bʌ ti carretera i mach yujilobic baqui miʼ majlelob, pero cheʼ tsaʼ caji c pejcan jiñi Biblia tsiʼ coltayon c ñaʼtan chuqui yom mic mel tij cuxtʌlel. Miʼ chʼʌm tilel cabʌl wem bʌ ticʼojel chaʼan jujumpʼejl qʼuin».

Frieda, ñumeñix bʌ ti 20 i jabilel jaʼel, miʼ yʌl: «Chuqui jach miʼ michʼesañon, pero cʼʌlʌl cheʼ bʌ tsaʼ caji c pejcan jiñi Biblia, mach ti orajix mic michʼan. Wʌle ñumen utsoñix i cabʌlix camigojob».

Eunice, juntiquil xʼixic ñumeñix bʌ ti 50 i jabilel, miʼ yʌl: «Woliʼ coltañon chaʼan mic ñumen weñʼesan c melbal».

Cheʼ mi lac pejcan jiñi Biblia miʼ coltañonla chaʼan ñumen tijicña mi lac chumtʌl, cheʼ bajcheʼ tsaʼ ujti tiʼ tojlel jiñi tsaʼ bʌ ujti laj cʌlob yicʼot yonlel lac piʼʌlob (Isaías 48:17, 18). Miʼ mejlel i coltañet chaʼan wen muʼ bʌ a yajcan a mel, chaʼan maʼ taj wem bʌ a wamigojob, chaʼan maʼañic maʼ cʌlʌx chaʼlen pensar, i ñumen ñuc bʌ i cʼʌjñibal, chaʼan maʼ cʌn jiñi i sujmlel tiʼ tojlel Dios, jiñi tsaʼ bʌ i meleyonla. Jiñi ticʼojel tac am bʌ ti Biblia tilem ti Dios, jin chaʼan mi mucʼʌch lac jacʼ maʼañic baʼ ora mi caj lac taj wocol. Dios maʼañic miʼ yʌcʼ jumpʼejl ticʼojel mach bʌ weñic.

Yom jach maʼ tech a pejcan. Ti jiñi yan tac bʌ tema mi caj a taj wen tac bʌ ticʼojel chaʼan chuqui yom maʼ mel chaʼan maʼ tech a pejcan jiñi Biblia yicʼot maʼ ñusan a bʌ.

¿Chuqui miʼ mejlel a mel chaʼan maʼ ñusan a bʌ cheʼ woli a pejcan a Biblia yicʼot maʼ locʼsʌben i wenlel? Laʼ laj qʼuel joʼchajp am bʌ i coltayob jiñi yambʌlob.

Sʌclan baqui mi caj a wajñel. Yom ñʌchʼʌl baqui maʼ wajñel, maʼañic chuqui yom miʼ sub i bʌ, yom wen tsiquil maʼ taj a qʼuel jiñi letra yicʼot baqui tsʌwan tsʌwan, cheʼ bajcheʼ jiñi mi caj a xucʼchocon a pensar ti jiñi woli bʌ a pejcan.

Acʼʌ a bʌ ti cʌntesʌntel. Jiñi Biblia jumpʼejlʌch lac majtan tsaʼ bʌ i yʌqʼueyonla jiñi lac Tat am bʌ ti panchan. Jin chaʼan, chaʼan maʼ locʼsʌben i wenlel yom lajalet bajcheʼ juntiquil alob yom bʌ i yʌcʼ i bʌ ti cʌntesʌntel. Yom wen jach bajcheʼ maʼ ñaʼtan i acʼʌ chaʼan Dios miʼ cʌntesañet (Salmo 25:4).

Mele oración cheʼ bʌ mi caj a tech. Jiñi am bʌ ti Biblia i ñaʼtʌbalʌch Dios, jin chaʼan i cʼʌjñibalʌch lac chaʼan i coltaya chaʼan mi lac chʼʌmben i sujm. Dios miʼ yʌcʼ i tan chaʼan mi caj i yʌqʼueñonla chʼujul bʌ i yespíritu mi mucʼʌch laj cʼajtiben (Lucas 11:13). Jiñi chʼujul bʌ espíritu miʼ mejlel i coltañet a chʼʌmben i sujm chuqui miʼ ñaʼtan jiñi tsaʼ bʌ i Meleyonla. I ti wiʼil muʼto caj i cʼotel a cʌn «jiñi mucul tac bʌ i ñaʼtʌbal Dios» (1 Corintios 2:10).

Pejcan chaʼan maʼ chʼʌmben i sujm. Mach cheʼ jach yom maʼ toʼol pejcan, ñaʼtan jiñi woli bʌ a pejcan. Cʼajtiben a bʌ: «¿Bajcheʼ yilal i melbal jiñi woli bʌ i yʌjlel ti ili relato? ¿Bajcheʼ mic mejlel c jacʼ jiñi woliʼ bʌ j cʌn?».

Wen ñaʼtan chuqui a wom a taj. Chaʼan maʼ ñusan a bʌ cheʼ maʼ pejcan a Biblia, chaʼlen wersa chaʼan maʼ sʌclan muʼ bʌ i coltañet ti a cuxtʌlel. Maʼ mejlel a chaʼlen wersa chaʼan maʼ ñumen cʌn Dios, chaʼan maʼ ñumen weñʼesan a melbal, ñumen wem bʌ ñoxiʼalet o ijñamʌlet, o yan tac bʌ. Cheʼ jiñi, sʌclan baqui bʌ parte yaʼ ti Biblia miʼ mejlel i coltañet chaʼan maʼ taj jiñi a wom bʌ.a

Ili joʼchajp mi caj i coltañet chaʼan maʼ tech a pejcan a Biblia, pero ¿chuqui yom maʼ mel chaʼan ñumento maʼ ñusan a bʌ cheʼ maʼ pejcan? Jiñi yambʌ tema mi caj i subeñet.

Chaʼan maʼañic miʼ tilel a wʌyel cheʼ bʌ maʼ pejcan a Biblia jatetʌch yom maʼ ñaʼtan chuqui yom maʼ mel. Laʼ laj qʼuel chuqui tac miʼ mejlel a mel chaʼan maʼ ñumen mulan a pejcan.

Yajcan jumpʼejl wem bʌ traducción. Mi jiñi Biblia woli bʌ a pejcan miʼ cʼʌn tʼan tac wocol bʌ ti chʼʌmbentel i sujm o mach bʌ a cʌñʌyic, maʼañic mi caj a ñusan a bʌ. Jin chaʼan, sʌclan jumpʼejl Biblia muʼ bʌ i cʼʌn tʼan tac mach bʌ wocolic ti chʼʌmbentel i sujm muʼ bʌ i cʼotel ti a pusicʼal. Jumpʼejl Biblia toj bʌ chuqui miʼ yʌl.a

Cʼʌñʌ jiñi tecnología tac. Ili ora jiñi Biblia mach cojach miʼ chaʼlentel ti imprimir, muqʼuix i mejlel lac taj jaʼel ti internet. Maʼ mejlel a pejcan ti internet o maʼ chaʼlen ti descargar ti a computadora, tableta o celular. An muʼ bʌ i mejlel lac lajeʼ jumpʼejl versículo yicʼot yambʌ Biblia tac o mi laj qʼuel chuqui miʼ yʌl yambʌ texto chaʼan jiñi versículo. I mi mach a womic a pejcan, miʼ mejlel a ñʌchʼtan jiñi grabación ti audio. Cabʌlob muʼ bʌ i mulañob i ñʌchʼtan cheʼ bʌ majlel mucʼob ti carro, cheʼ woliyob ti wutsʼoñel o cheʼ an chuqui tac yambʌ woliʼ melob. ¿Ixcu jatet a wom baʼ pejcan o a wom a ñʌchʼtan? ¿Ixcu muqʼuic a ñop?

Sʌclan ti yambʌ jun tac. An libro tac muʼ bʌ i tsictesan jiñi Biblia, ili miʼ mejlel i coltañet chaʼan maʼ ñumen locʼsʌben i wenlel cheʼ maʼ pejcan. Jumpʼejl ejemplo, an mapa tac muʼ bʌ i chʼʌm tilel jiñi lum o tejclum tac baqui tsaʼ ujti jiñi muʼ bʌ i yʌjlel. Cheʼ jaʼel, miʼ mejlel a qʼuel yambʌ tema tac locʼsʌbil bʌ ti jiñi revista Lac Tsictesʌbentel yicʼot yaʼ ti sección «Cʌntesa tac» am bʌ yaʼ ti página chaʼan internet jw.org, ili mi caj i coltañet a chʼʌmben i sujm muʼ bʌ a pejcan yaʼ ti Biblia.

Qʼuextan bajcheʼ maʼ pejcan. Mi wocol jax maʼ wubin cheʼ maʼ pejcan jiñi Biblia tiʼ tejchibal cʼʌlʌl tiʼ yujtibal, miʼ mejlel a pejcan baqui maʼ ñumen mulan. Mi cheʼʌch a wom miʼ mejlel a pejcan tiʼ tojlel wiñicob xʼixicob muʼ bʌ i yʌjlelob. Miʼ mejlel a cʼʌn jiñi recuadro «Ñumen cʌñʌ muʼ bʌ i yʌjlelob yaʼ ti Biblia», cheʼ jaʼel, miʼ mejlel a yajcan chuqui ti tema a wom a pejcan o mi quepecña a wom a ñaʼtan bajcheʼ tsaʼ ujti majlel. ¿Ixcu cheʼ muqʼuic a ñop a mel bajcheʼ tac ili?

Jiñi Biblia mach baqui jach bʌ libro. Yaʼi mi lac tajben i ticʼojel tac jiñi tsaʼ bʌ i Meleyonla (2 Timoteo 3:16). Muʼ bʌ i yʌl miʼ mejlel i wen coltañet. Jiñi Biblia miʼ yʌl ili tʼan: «Jiñi i tʼan Dios cuxulʌch i wen pʼʌtʌl» (Hebreos 4:12). Ili libro an i pʼʌtʌlel chaʼan miʼ ñumen weñʼesan bajcheʼ chumulet, miʼ yʌcʼ wem bʌ ticʼojel tac chaʼan bajcheʼ yom maʼ chumtʌl, yicʼot miʼ coltañet a cʌn Dios yicʼot jiñi ñaʼtʌbil bʌ i chaʼan (1 Timoteo 4:8; Santiago 4:8).

Miʼ yʌcʼ ticʼojel tac chaʼan bajcheʼ yom mi lac chumtʌl. Jiñi Biblia miʼ yʌcʼ ticʼojel tac chaʼan jiñi lac wocol tac o yan tac bʌ chuqui mi lac ñusan.

• Bajcheʼ yilal yom mi la cajñel yicʼot yambʌlob (Efesios 4:31, 32; 5:22, 25, 28, 33).

• Chaʼan laj cʼocʼlel yicʼot bajcheʼ yubil mi la cubin lac bʌ (Salmo 37:8; Proverbios 17:22).

• Bajcheʼ yilal yom lac melbal (1 Corintios 6:9, 10).

• Chuqui yom mi lac mel chaʼan mi lac taj chuqui la com (Proverbios 10:4; 28:19; Efesios 4:28).a

Jumpʼejl xñujpuñel ti Asia wocolʌch tsiʼ yubiyob chaʼan miʼ techob chumtʌl cheʼ bʌ tsijib xñujpuñelobto yicʼot chaʼan wen miʼ chaʼleñob tʼan. Pero cheʼ bʌ tsaʼ caji i melob cheʼ bajcheʼ woliʼ cʌñob yaʼ ti Biblia tsiʼ qʼueleyob chaʼan wen tacʌch jiñi ticʼojel muʼ bʌ i chʼʌm tilel. ¿Baqui bʌ i wenlel tsiʼ tajayob? Vicent miʼ yʌl: «Tsaʼ bʌ c pejca yaʼ ti Biblia an i coltayon chaʼan mic pʌs cʼuxbiya anquese añʌch wocol tac. Jiñi ticʼojel tac an i coltayon lojon chaʼan ñumen tijicña mi lon c chumtʌl». Cheʼʌch miʼ yʌl jaʼel jiñi i yijñam Annalou: «An i wen coltayon lojon cheʼ mi lon c pejcan ejemplo tac am bʌ ti Biblia. Wʌle tijicñayoñix, jiñi Biblia miʼ coltañonla lac taj jiñi la com bʌ».

Miʼ coltañonla laj cʌn Dios. Vicent miʼ yʌl jaʼel chaʼan mach cojach an i colta tiʼ ñujpuñel, miʼ yʌl: «Ñumen lʌcʼʌlix añon mi cubin c bʌ tiʼ tojlel Jehová wocolix i yʌlʌ jiñi Biblia». Ili tsaʼ bʌ i yʌlʌ an chuqui wen ñuc bʌ i cʼʌjñibal miʼ pʌsbeñonla, jiñi Biblia miʼ mejlel i coltañonla chaʼan mi lac ñumen cʌn Dios. Mi cheʼʌch maʼ mel, mi caj a sujtel jaʼel tiʼ yamigo Dios, mach cojach mi caj i coltañet jiñi i ticʼojel tac. I mi caj a qʼuel jaʼel chaʼan jiñi i Tʼan miʼ yʌl chaʼan ti talto bʌ qʼuin tijicña mi caj lac chumtʌl tiʼ pejtelel ora (1 Timoteo 6:19). Maʼañic yambʌ libro muʼ bʌ i yʌl bajcheʼ iliyi.

Mi jatet maʼ tech a pejcan jiñi Biblia i maʼ ñʌmtesan a bʌ chaʼan cheʼʌch maʼ mel wen mi caj a chumtʌl i mi caj a ñumen cʌn Dios. Pero tajol añʌch chuqui maʼañic bʌ mi caj a ñaʼtan cheʼ bʌ woli a pejcan majlel jiñi Biblia. Mi cheʼ maʼ wujtel bajcheʼ jiñi, yom lajalet bajcheʼ juntiquil wiñic chʼoyol bʌ ti Etiopía tsaʼ bʌ chumle wajali, ñumeñix ti 2 mil jab. Ili wiñic an cabʌl i cʼajtiya chaʼan muʼ bʌ i yʌl jiñi Tsʼijbujel tac. I Felipe, juntiquil xcʌntʼan i chaʼan Jesús, tsiʼ cʼajtibe mi wolʌch i chʼʌmben i sujm woli bʌ i pejcan, jiñi wiñic tsiʼ jacʼʌ: «¿Bajcheʼ mi caj c chʼʌmben i sujm mi maʼañic majqui miʼ cʌntesañon?». Ili wiñic tsiʼ yʌcʼʌ i bʌ ti coltʌntel tiʼ tojlel juntiquil wem bʌ xcʌntesa, Felipe (Hechos 8:30, 31, 34). Mi jatet a wom a ñumen chʼʌmben i sujm jaʼel muʼ bʌ i yʌl jiñi Biblia, mic subeñet lojon chaʼan maʼ butʼ jumpʼejl solicitud am bʌ ti internet yaʼ ti jw.org o tsʼijbun majlel ti jumpʼejl dirección muʼ bʌ i tilel ila ti revista jiñi ñumen lʌcʼʌl bʌ an baqui añet. Yicʼot jaʼel miʼ mejlel a pejcan juntiquil i testigo Jehová yaʼ baqui chumulet o maʼ mejlel ti majlel tiʼ Yotlel Tempa bʌ. Mic subeñet lojon chaʼan maʼ sʌclan jumpʼejl Biblia i acʼʌ chaʼan miʼ coltañet ti a cuxtʌlel.