¿Mejl ba i coltañonla jiñi Biblia cheʼ an lac chaʼan jumpʼejl cʼamʌjel?

Muʼ bʌ i yʌl jiñi Biblia

Mucʼʌch. Dios miʼ pensarin jiñi xucʼuloʼ bʌ i wiñicob cʼamoʼ bʌ. Jiñi Biblia miʼ yʌl tiʼ tojlelob: «Lac Yum mi caj i cʌntan cheʼ [cʼamob]» (Salmo 41:3). An uxchajp mejl bʌ lac mel cheʼ an lac chaʼan jumpʼejl tsʌts bʌ cʼamʌjel:

1. Laʼ laj cʼajtiben Dios lac pʼʌtʌlel chaʼan mi laj cuch. «Jiñi i ñʌchʼtʌlel Dios, maʼañic bʌ miʼ mejlel i chʼʌmben i sujm mi juntiquilic lac piʼʌl», mi caj i coltañonla chaʼan maʼañic mi laj cʌlʌx chaʼlen pensar yicʼot mi caj i yʌqʼueñonla lac pʼʌtʌlel chaʼan mi lac bej chaʼlen wersa (Filipenses 4:6, 7).

2. Yom wen jach chuqui mi lac ñaʼtan. Jiñi Biblia miʼ yʌl: «I tijicñʌyel lac pusicʼal i wentajʌch wen bʌ tsʼac. I chʼijiyemlel lac pusicʼal miʼ tiquesan lac bʌcʼtal» (Proverbios 17:22). Cheʼ chʌn tijicñayonla miʼ coltañonla jaʼel chaʼan laj cʼocʼlel.

3. Yom mi lac pʼʌtʼesan lac pijtaya. Jiñi pijtaya miʼ coltañonla chaʼan tijicñayonla anquese cʼamonla (Romanos 12:12). Jiñi Biblia miʼ yʌl chaʼan maʼañix mi juntiquilic muʼ bʌ caj i yʌl: «Cʼamon» (Isaías 33:24). Dios mi caj i jisan pejtelel jiñi cʼamʌjel tac maʼañic bʌ miʼ mejlel i jisan jiñi ciencia. Cheʼ jaʼel, xucʼu xucʼul mi caj i jisan majlel jiñi ñoxlel, come jiñi Biblia miʼ yʌl chaʼan jiñi wiñicob xʼixicob lajal mi caj i sujtelob i bʌcʼtal bajcheʼ chʼiton, wen chʼejl bʌ (Job 33:25).

Nota: Jiñi i testigojonbʌlon Jehová mi lon c ñop chaʼan Dios miʼ coltañon lojon, pero cheʼ jaʼel mi lon c majlel ti doctor cheʼ bʌ mi lon j cʼamʼan (Marcos 2:17). Pero maʼañic mi lon cʌl chuqui ti tsʼac ñumen wen, come jujuntiquil an tiʼ wenta i ñaʼtan chuqui ti tratamiento mi caj i chʼʌm.