¿Chuqui yom mic mel mi an majqui miʼ xicʼon ti piʼleya?

¿CHUQUI MAʼ MEL JATETIC?

Ñaʼtancu iliyi: Heather yicʼot Mike an jaxto chaʼpʼejl uw i cajelob ti loqʼuel, pero Heather miʼ yubin chaʼan wajalix i cajelob ti lajal ajñel. Tiʼ pejtelel qʼuin miʼ tsʼijbubeñob i bʌ mensaje yicʼot miʼ pejcañob i bʌ ti teléfono, i cheʼ bʌ maxto ujt ti tsʼijb o ti tʼan yujilix jiñi yambʌ chuqui mi caj i yʌl. Pero Mike añix yambʌ chuqui yom.

Mike yicʼot Heather cojach miʼ chucob i cʼʌb yicʼot an i tsʼitaʼ tsʼujtsʼuyob i bʌ. Mach yom ñumel ti pʼis, pero mi yomic to i cʌy Mike. Heather maʼañic majqui yambʌ miʼ yʌqʼuen i yubin chaʼan wen i lecax yicʼot chaʼan wen ñuc i cʼʌjñibal. «Mike yicʼot joñon mic wen mulan lojon c bʌ, ¿baqui bʌ i wocolel?», cheʼ miʼ yʌl Heather.

Mi añix a jabilel chaʼan maʼ loqʼuel a wicʼot juntiquil alob o xcʼalʌl i cheʼ jatetic Heather, ¿chuqui maʼ mel?

WAʼLEN A ÑAʼTAN

Mi maʼ tijpʼel jubel ti juntejc teʼ i maʼ ñop wejlel bajcheʼ juncojt xmateʼmut, mi caj a taj wocol. Cheʼʌch miʼ yujtel jaʼel mi tsaʼ ñusʌbe i mandar Dios, cheʼ bajcheʼ jiñi mandar chaʼan bʌ tsʼiʼlel, ili yaʼ ochem jiñi muʼ bʌ i piʼleñob i bʌ cheʼ bʌ maxto ñujpuñemob (1 Tesalonicenses 4:3).

¿Chuqui mi caj i yujtel cheʼ bʌ miʼ ñusʌntel ti pʼis ili mandar? Jiñi Biblia miʼ yʌl: «Jini muʼ bʌ i chaʼlen tsʼiʼlel ñumen miʼ ticʼlan i bʌcʼtal» (1 Corintios 6:18). ¿Chuqui yom i yʌl iliyi?

Tsaʼ mejli jumpʼejl estudio baqui miʼ pʌs chaʼan jiñi xcolelob añix bʌ i chaʼleyob piʼleya cheʼ bʌ maxto ñujpuñemob miʼ yubiyob ili wocol tac:

• I CHAʼ ÑAʼTɅNTEL. Jiñi xcolelob am bʌ i chaʼleyob piʼleya cheʼ bʌ maxto ñujpuñemob miʼ yʌlob chaʼan muʼto i chaʼ ñaʼtañob chaʼan mach weñic tsaʼ bʌ i meleyob.

• MAʼAÑIX MIʼ ÑOPBEÑOB I BɅ. Cheʼ bʌ tsaʼix i piʼleyob i bʌ, an muʼ bʌ i cʼajtibeñob i bʌ chaʼan majqui yambʌ an i piʼle.

• CHʼIJIYEMLEL. Tiʼ sujm, cabʌl xcʼalʌlob yomob juntiquil wiñic muʼ bʌ i cʌntañob i mach jin jach yom bʌ totsʼtʌl yicʼotob. An chʼiton maʼañic bʌ miʼ mulañob jiñi xcʼalʌlob ora jach bʌ miʼ yʌcʼob i bʌ ti piʼlentel.

• I yujtibal: Mi tsaʼ chaʼle piʼleya cheʼ bʌ maxto ñujpuñemet: Maʼañic woli a qʼuel a bʌ ti ñuc (Romanos 1:24). A bʌcʼtal wen lets i tojol. ¡Mach a majtan acʼ!

Chaʼlen wersa i mach a chaʼlen piʼleya cheʼ bʌ maxto ñujpuñemet (1 Tesalonicenses 4:3). Cheʼ bʌ maʼ ñujpuñel mi caj a chaʼlen piʼleya. Mi caj a ñusan a bʌ, pero mach cheʼic bajcheʼ jiñi maxto bʌ ñujpuñemob muʼ bʌ i melob yicʼot bʌqʼuen, pensar yicʼot chʼijiyemlel (Proverbios 7:22, 23; 1 Corintios 7:3).

¿CHUQUI MAʼ WɅL?

• Mi an majqui miʼ cʼuxbiñet, ¿mach ba yomic chaʼan wen maʼ wajñel?

• Mi an majqui yom chaʼan wen maʼ wajñel, ¿muʼ ba caj i subeñet a mel maʼañic bʌ miʼ mulan Dios? (Hebreos 13:4).