Cʌntesʌntel 10

Jini ñuc bʌ butʼjaʼ

JINI winicob xʼixicob mach bʌ tsaʼic ochiyob ti arca, tsaʼ caji i chʌn melob cheʼ bajcheʼ ti ñaxan. Maxto anic tsiʼ ñopoyob mi tal jini Butʼjaʼ. Melelʌch tsiʼ wen tseʼtayob cheʼ bajcheʼ maʼanic an chaʼlebilob i chaʼan tseʼñal. Pero mach jalic cheʼ bʌ ora jini tsiʼ cʌyʌyob tseʼñal.

Mach cʌñʌlic tsaʼ bʌcʼ tejchi jini jaʼlel. Tsaʼ yajli tilel ti panchan cheʼ bajcheʼ miʼ bejqʼuel jaʼ ti ucʼum. ¡Isujmʌch tsaʼ bʌ i yʌlʌ Noé! Pero maʼanix majqui tsaʼ mejli ti ochel yaʼ ti arca. Come Jioba Dios tsaʼix i wen mʌcbe i puertajlel.

Mach jalic tsaʼ pajmi ti jaʼ jini lum. Cheʼ yilal bajcheʼ colem jaʼ tac. Tsiʼ buchu ñuqui teʼ tac yicʼot tsiʼ nijca jubel colem xajlel tac i juʼucña miʼ sub i bʌ. Tsaʼ wen bʌcʼñayob jini winicob xʼixicob. Tsaʼ letsiyob ti chan bʌ bujtʌl tac. ¡Ay, tsaʼ to ca i mulayob tsaʼic i jacʼbeyob i tʼan Noé yicʼot chaʼan mi yochelob ti jini arca cheʼ jamʌl to i puertajlel! Pero maʼanix i yorajlel.

Jini jaʼ tsaʼ caji ti bej cʼʌjquel bʌ cʼʌjquel majlel. Tsiʼ chaʼle jaʼal chaʼcʼal (40) qʼuin yicʼot chaʼcʼal (40) acʼʌlel. Tsaʼ cʼʌjqui letsel jaʼ ti wits, cʼʌlʌl tsaʼ ñumi ti pejtelel jini chan tac bʌ wits. Cheʼʌch bajcheʼ tsiʼ yʌlʌ Dios, pejtel winicob xʼixicob yicʼot añimal tac mach bʌ anic tsaʼ ochiyob ti arca tsaʼ chʌmiyob. Pero pejtelel jini am bʌ ti mal, maʼanic tsaʼ chʌmiyob.

Noé yicʼot i yalobilob tsiʼ chaʼleyob wem bʌ eʼtel cheʼ tsiʼ meleyob jini arca. Jini jaʼ tsiʼ chʼuyu letsel jini arca, tsaʼ cʼʌjqui tiʼ pam jaʼ. Cheʼ jini, jumpʼejl bʌ qʼuin, cheʼ tsaʼ ñʌjchʼi jaʼal, tsaʼ tsʼʌjyi Qʼuin. ¡Wen utsʼatax ti qʼuelol! Cojach an jini colem ñajb. Cojach tsiquil jini arca cheʼ cʼʌcʌcña ti pam jaʼ.

Maʼanix colem bʌ winicob. Maʼanix tsaʼ chʌn sujti i ticʼlan winicob xʼixicob. Tsaʼix laj chʌmiyob, temel yicʼot i ñaʼob yicʼot yan tac bʌ jontol bʌ winicob xʼixicob. Pero ¿chuqui tsiʼ chaʼle i tatob?

I tatob jini colem bʌ winicob mach melelic bʌ winicob bajcheʼ joñonla. Jiñobʌch ángelob tsaʼ bʌ jubiyob tilel ila ti Pañimil chaʼan mi chumtʌlob cheʼ bajcheʼ winicob. Jini chaʼan, cheʼ bʌ tsaʼ tili jini Butʼjaʼ, maʼanic tsaʼ chʌmiyob cheʼ bajcheʼ jini yambʌ winicob xʼixicob. Tsiʼ cʌyʌ i cʼʌñob jini i cuctal tsaʼ bʌ i meleyob, i tsaʼ chaʼ letsiyob majlel ti panchan cheʼ bajcheʼ ángelob. Pero maʼanix tsaʼ chʌn ajqʼuiyob ti ochel bajcheʼ i yángelob Dios. Tsaʼ sujtiyob ti yángel Satanás. Ti Biblia miʼ suben ili ángelob xibajob.

Dios tsiʼ choco tilel icʼ, i tsaʼ caji ti sajpʼel jini jaʼ. Cheʼ bʌ tsaʼ ñumi joʼpʼejl uw tsaʼ cʼʌcle jini arca ti pam wits. Tsaʼ ñumi cabʌl qʼuin, jini añoʼ bʌ tiʼ mal arca tsaʼ mejli i qʼuelob jumpat yicʼot tsiʼ qʼueleyob jini chan tac bʌ wits. Jini jaʼ tsaʼ caji ti bej sajpʼel bʌ sajpʼel majlel.

Cheʼ jini Noé tsiʼ yʌcʼʌ ti loqʼuel yaʼ ti arca juncojt iʼicʼ mut i cʼabaʼ xʼacʼxiʼ. Tsaʼ jumucʼ wejli loqʼuel, cheʼ jini tsaʼ chaʼ cʼoti come maʼanic tsiʼ taja baʼ miʼ tʼuchtʌl. Tsiʼ bej mele bajcheʼ jini, i jajayajl miʼ sujtel miʼ tʼuchtʌl tiʼ pam jini arca.

Noé yom i qʼuel jini jaʼ mi tsaʼix sajpʼij ti lum, jini chaʼan ti wiʼil tsiʼ choco loqʼuel juncojt xʼujcuts yaʼ ti arca. Ili tsaʼ chaʼ sujti jaʼel, come maʼanic tsiʼ taja baʼ miʼ tʼuchtʌl. Noé tsiʼ chaʼ choco loqʼuel tiʼ chaʼyajlel, tsaʼ chaʼ sujti yicʼot i yopol olivoteʼ tiʼ ñiʼ tsaʼ bʌ i ñip chʼʌmʌ cʼotel. Tsaʼix sajpʼij jini jaʼ. Noé tsiʼ chaʼ choco loqʼuel ti yuxyajlel jini xʼujcuts, i tsiʼ cʼun taja baʼ mi tʼuchtʌl.

Wʌle Dios tsiʼ pejca Noé. Tsiʼ sube: ‹Loqʼuen ti arca, pʌyʌ loqʼuel pejtel a familia yicʼot jini añimal tac›. Tsaʼ ajñiyob ñumen ti jumpʼejl jab yaʼ tiʼ mal jini arca. ¡Ñaʼtancu bajcheʼ yubil i tijicñʌyelob cheʼ chaʼ loqʼuemobix ti pañimil i cuxulob!

Génesis 7:10-24; 8:1-17; 1 Pedro 3:19, 20.