Cʌntesʌntel 50

Chaʼtiquil chʼejloʼ bʌ xʼixicob

CHEʼ bʌ tsaʼ ochiyob ti wocol jini israelob, tsiʼ cʼajtiyob i coltʌntel ti Jioba. Jioba tsiʼ jacʼʌ cheʼ bʌ tsiʼ waʼchoco añoʼ bʌ i yeʼtel chʼejloʼ bʌ chaʼan miʼ coltañob. Jini Biblia miʼ suben juezob. Josué jiñʌch ñaxam bʌ juez: Otniel, Aod yicʼot Samgar jiñʌch yambʌ juezob. Pero cheʼ ti pejtelelob an chaʼtiquil tsaʼ bʌ i coltayob jini Israel jiñobʌch xʼixicob, i cʼabaʼob iliyi jiñʌch Débora yicʼot Jael.

Débora jiñʌch xʼaltʼan bʌ xʼixic. Jioba tsiʼ sube chuqui mi caj i yujtel, cheʼ jini tsaʼ caji i suben jini winicob xʼixicob jini tsaʼ bʌ i yʌlʌ Jioba. Débora jiñʌch jaʼel juez. Miʼ buchtʌl ti yebal palma yaʼ bʌ an ti wits, jini winicob xʼixicob miʼ tilelob baʼan Débora chaʼan miʼ tojʼesañob tiʼ wocol.

Cheʼ bʌ ora jini, Jabín jiñʌch rey bʌ yaʼ ti Canaán. An joʼcʼal i yuxbajcʼ (900) i carreta tac chaʼan bʌ guerra. Wen chʼejlob jini i soldadojob, jini chaʼan yonlelob jini israelob tsaʼ bʌ ochiyob tiʼ winic Jabín. I cʼabaʼ i yum i soldadojob jini Jabín jiñʌch Sísara.

Jumpʼejl bʌ qʼuin Débora tsiʼ choco ti pʌyol jini juez Barac, tsiʼ sube: ‹Jioba tsiʼ yʌlʌ: «Tempan lujumpʼejl (10,000) mil winicob yicʼot pʌyʌ majlel yaʼ ti wits i cʼabaʼ Tabor. Yaʼi joñon mi caj c pʌybeñet tilel Sísara. Joñon mi caj cʌqʼueñet ti a wenta chaʼan maʼ mʌlben jini Sísara yicʼot i soldadojob».›

Barac tsiʼ sube Débora: ‹Mi mucʼʌch a majlel quicʼot, muʼ cu c majlel›. Débora miʼ majlel, pero tsiʼ sube Barac: ‹Yambʌ mi caj i qʼuejlel ti ñuc cheʼ miʼ mʌjlel lac chaʼan, come Jioba mi caj yʌcʼ Sísara tiʼ cʼʌb juntiquil xʼixic›. Cheʼʌch tsaʼ ujti.

Barac tsaʼ jubi yaʼ ti wits Tabor chaʼan miʼ cʼotel i tajob i bʌ yicʼot i soldadojob Sísara. Ti ora jach, Jioba tsiʼ bʌcʼ choco tilel butʼjaʼ, yonlel i contrajob tsaʼ bʌ chʌmiyob. Sísara tsaʼ jubi tiʼ carreta i tsaʼ putsʼi.

Ti wiʼil Sísara tsaʼ cʼoti ti pisil bʌ i yotot Jael. Tsiʼ pʌyʌ ochel ti mal, yicʼot tsiʼ yʌqʼue i jap tsʼitaʼ leche. Tsaʼ caji ti wʌyel. Cheʼ jini Jael tsiʼ chʼʌmʌ jay bʌ i niʼ teʼ i tsiʼ sʌl jecʼbe tiʼ pam i jol. ¡Ti wiʼil, cheʼ bʌ tsaʼ tili Barac, Jael tsiʼ pʌsbe jini Sísara chʌmenix! Jini tsaʼ bʌ i yʌlʌ Débora tsaʼ tsʼʌctiyi.

Ti wiʼil tsaʼ tsʌnsʌnti jini rey Jabín; jini israelob tsaʼ jumucʼ ajñiyob tiʼ ñʌchʼtʌlel.

Jueces 2:14-22; 4:1-24; 5:1-31.