Cʌntesʌntel 57
Dios miʼ yajcan David
¿MUʼ baʼ qʼuel chuqui tsaʼ ujti ila ti dibujo? Jini alʌ chʼiton tsiʼ chilbe alʌ tiñʌmeʼ jini oso. Jini oso tsiʼ chucu majlel jini alʌ tiñʌmeʼ chaʼan miʼ cʼux. Pero chaʼan maʼanic miʼ cʼuxtʌl jini tiñʌmeʼ, tsaʼ majli ti ajñel jini alʌ chʼiton baqui an jini oso chaʼan miʼ chilben. ¡Jini alʌ chʼiton, tsiʼ lowo i tsiʼ tsʌnsa jini oso cheʼ bʌ tsaʼ tejchi! Ti yambʌ ora jini alʌ chʼiton tsiʼ colta jini tiñʌmeʼ chaʼan maʼanic miʼ cʼuxtʌl ti bajlum. ¿Mach ba muqʼuic a qʼuel chaʼan wen añʌch i chʼejlel ili alʌ chʼiton chaʼan jini tsaʼ bʌ i mele? ¿Awujil ba majqui ili alʌ chʼiton?
Jiñʌch jini chʼiton David. Tsaʼ chumle yaʼ ti tejclum i cʼabaʼ Belén. I tatuch jiñʌch Obed, i yalobil bʌ Rut yicʼot Booz. ¿Cʼajal ba a chaʼañob? I tat David jiñʌch Isaí o Jesé. David miʼ cʌntʌben i tiñʌmeʼ i tat. Anix lujumpʼejl jab tsiʼ yajca Jioba Saúl chaʼan mi yochel bajcheʼ rey, pero David tsaʼ jaxto yila pañimil.
Tsaʼ cʼoti i yorajlel cheʼ bʌ Jioba tsiʼ sube Samuel iliyi: ‹Chʼʌmʌ majlel aceite cojach bʌ yicʼot cucu ti yotot Isaí yaʼ ti Belén. Come tsaʼix c yajca juntiquil i yalobil chaʼan mi yochel ti rey›. Cheʼ bʌ Samuel tsiʼ qʼuele Eliab, jini ascuñʌl bʌ i yalobil Isaí, tsiʼ ñaʼta: ‹Melelʌch jiñʌch yajcʌbil bʌ iliyi›. Pero Jioba tsiʼ sube: ‹Mach a lon qʼuelben i chanlel yicʼot chaʼan wen i tʼojol jax. Maʼanic tsaʼ c yajca chaʼan mi yochel ti rey›.
Cheʼ jini, Isaí tsiʼ pʌyʌ tilel Abinadab chaʼan miʼ ñumel tiʼ tojlel Samuel. Pero Samuel tsiʼ yʌlʌ: ‹Maʼanic, Jioba mach yajcʌbilic i chaʼan jaʼel›. Cheʼ jini, Isaí tsiʼ pʌyʌ tilel Sama. ‹Maʼanic, mach yajcʌbilic i chaʼan Jioba jaʼel iliyi›, cheʼen Samuel. Isaí jin jach tsiʼ pʌyʌ tilel wuctiquil i yalobilob baʼan Samuel, pero Jioba maʼanic tsiʼ yajca mi juntiquilic jini. ‹¿Cojix ba a walobilob iliyi?› cheʼ tsiʼ cʼajti Samuel.
‹Jinto cʌylem jini ijtsʼiñʌl bʌ. Pero woli i cʌntan tiñʌmeʼ yaʼ ti jamil›, cheʼen Isaí. Samuel wen i tʼojol jax tsiʼ qʼuele David cheʼ bʌ tsaʼ cʼoti. ‹Jiñʌch iliyi›, cheʼen Jioba. ‹Mulben i jol ti aceite.› Cheʼʌch tsiʼ mele Samuel. Ti wiʼil bʌ qʼuin, mi caj i yochel David ti rey yaʼ ti Israel.
1 Samuel 17:34, 35; 16:1-13.