Cʌntesʌntel 78
Tsaʼ bʌ i chaʼle tsʼijb yaʼ tiʼ ñʌcʼ i tsʼajquil otot
¿CHUQUI woli ti ujtel wʌʼ ti dibujo? Jini winicob xʼixicob woliyob ti ñuc bʌ qʼuiñijel. Jini rey bʌ ti Babilonia tsiʼ pʌyʌ cabʌl mil winicob xʼixicob ñuctacoʼ bʌ. Woliʼ cʼʌñob jini vaso tac melbil bʌ ti oro yicʼot melbil bʌ ti plata yicʼot jini colem taza tac tsaʼ bʌ i locʼsayob tiʼ templo Jioba yaʼ ti Jerusalén.Ti jimbʌ ora, tsaʼ loqʼui tilel i cʼʌb juntiquil winic tsaʼ bʌ caji ti tsʼijb yaʼ tiʼ ñʌcʼ i tsʼajquil otot. Tiʼ pejtelel jini yaʼ bʌ añob ti qʼuiñijel tsiʼ chaʼleyob bʌqʼuen.
Cheʼ bʌ ora jini, Belsasar jiñʌch rey, i buts Nabucodonosor. Ti cʼam bʌ tʼan tsiʼ pʌyʌ tilel i winicob wen añoʼ bʌ i ñaʼtʌbal. Tsiʼ yʌlʌ, ‹jini muʼ bʌ mejlel i cʌn ili tsʼijbujel yicʼot miʼ tsictesʌbeñon chuqui i sujmlel, mi caj i yʌqʼuentel yonlel majtañʌl, yicʼot jiñʌch muʼ bʌ caj i yochel tiʼ yuxticlel ñuc bʌ yumʌl chaʼan c yumʌntel›. Pero mi juntiquilic jini wen añoʼ bʌ i ñaʼtʌbal tsaʼ mejli i cʌñob jini tsʼijbujel am bʌ tiʼ ñʌcʼ i tsʼajquil otot, mi tsaʼic mejli i tsictesʌbeñob i sujmlel.
I ñaʼ jini rey tsiʼ yubi chuqui woli ti ujtel i tsaʼ ochi yaʼ baqui woliyob ti qʼuiñijel. Tsiʼ sube jini rey, ‹mach a chaʼlen cabʌl bʌqʼuen, a wocolic. Ti a yumʌntel an juntiquil winic, muʼ bʌ i cʌn jini dios tac chʼujuloʼ bʌ. Cheʼ bʌ jin to rey jini a tatuch Nabucodonosor, tsiʼ waʼchoco Daniel ti yeʼtel chaʼan miʼ yuman jini añoʼ bʌ cabʌl i ñaʼtʌbal. Choco ti pʌyol Daniel, jiñʌch muʼ bʌ caj i subeñet chuqui i sujmlel pejtelel iliyi›.
Ti jini jach bʌ ora tsiʼ pʌyʌyob tilel Daniel. Cheʼ maʼanic tsiʼ jacʼʌ i chʼʌm jini majtañʌl tac, Daniel tsaʼ caji i yʌl chucoch Jioba tsiʼ chilbe i yumʌntel i tatuch Belsasar. Daniel tsiʼ yʌlʌ, ‹tsiʼ wen chanʼesan i bʌ. Jioba tsiʼ yʌqʼue i yilan wocol›.
Daniel tsiʼ sube Belsasar, ‹pero jatet a wujilix pejtelel chuqui tsaʼ bʌ ujti, yicʼot muʼto a wen chanʼesan a bʌ jaʼel, cheʼ bajcheʼ tsiʼ mele Nabucodonosor. Tsaʼix a chʼʌmʌ tilel jini vaso tac yicʼot jini colem taza tac yaʼ bʌ tsaʼ locʼo tilel tiʼ templo Jioba yicʼot tsaʼix a cʼʌñʌ ti jap vino. Tsaʼix a chʼujutesa diosteʼ tac melbil bʌ ti teʼ yicʼot ti xajlel, mach jinic woli a ñuqʼuesan jini Cʼax ñuc bʌ tsiʼ Meleyonla. Jini chaʼan Dios tsiʼ choco tilel ili cʼʌbʌl chaʼan miʼ tsʼijbun ili tʼan tac›.
‹I sujmlel jini tʼan tsaʼ bʌ tsʼijbunti jiñʌch iliyi›, cheʼen Daniel: ‹MENE, MENE, TEKEL, yicʼot UPARSIN›.
‹MENE yom i yʌl chaʼan Dios tsaʼix i pʼisi i yorajlel a yumʌntel yicʼot baqui ora miʼ caj ti jilel. TEKEL yom yʌl chaʼan tsaʼix pʼisleyet ti balanza i jontolet tsaʼ tajleyet. UPARSÍN yom yʌl chaʼan jini a yumʌntel mi caj yʌqʼuentel tiʼ wenta jini medojob yicʼot persiajob.›
Cheʼ wolito ti tʼan jini Daniel, jini medojob yicʼot persiajob tsaʼ cajiʼ contrajiñob jini Babilonia. Tsiʼ chʼʌmʌyob jini tejclum yicʼot tsiʼ tsʌnsayob jini Belsasar. ¡Jini tsaʼ bʌ tsʼijbunti yaʼ tiʼ ñʌcʼ i tsʼajquil otot, tsaʼ tsʼʌctiyi ti jini jach bʌ acʼʌlel! Pero, ¿chuqui tsiʼ chaʼleyob jini israelob ti jimbʌ ora? Muʼto caj laj qʼuel, pero wʌle laʼ lac ñaxan qʼuel chuqui tsiʼ chaʼle Daniel.
Daniel 5:1-31.