Cʌntesʌntel 90
Jesús yicʼot jini xʼixic yaʼ ti pozo
JESÚS tsiʼ cʼaja i yo tiʼ tʼejl jumpʼejl pozo yaʼ ti Samaria. Jini xcʌntʼañob i chaʼan tsaʼ majliyob ti tejclum ti mʌn bʌlñʌcʼʌl. Jini xʼixic yaʼ bʌ an ti tʼan yicʼot Jesús tsaʼ cʼoti ti lʌtʼ jaʼ. Jesús tsiʼ sube: ‹Aqʼueñon jaʼ chaʼan mic jap›.
Toj sajtel i pusicʼal jini xʼixic. ¿Awujil ba chucoch? Come Jesús tilem ti Judea i jini xʼixic chʼoyol ti Samaria. Cabʌl judíojob mach yomic i qʼuelob yaʼ bʌ chʼoyolob ti Samaria. ¡Mi muqʼuic to i pejcañob i bʌ! Pero Jesús miʼ wen cʼuxbin ti pejtelel winicob xʼixicob. Jesús tsiʼ sube: ‹A wujilic majqui miʼ cʼajtibeñet jaʼ, maʼ cʼajtiben jaʼel, pero jini mi caj i yʌqʼueñet jaʼ muʼ bʌ i yʌqʼueñonla laj cuxtʌlel›.
‹C Yum›, cheʼen jini xʼixic, ‹jini pozo wen tam, pero jatet mi anic to bajcheʼ maʼ luch. ¿Baqui ma taj ili jaʼ muʼ bʌ yʌcʼ cuxtʌlel?›.
‹Mi mucʼʌch a jap ili jaʼ muʼ bʌ a locʼ ila ti pozo mi caj i chaʼ aqʼueñet tiquin tiʼ›, cheʼ ti yʌlʌ Jesús. ‹Pero jini jaʼ muʼ bʌ j cʌcʼ joñon miʼ yʌcʼ cuxtʌlel mach bʌ anic miʼ jilel.›
‹C Yum›, cheʼen jini xʼixic, ‹¡aqʼueñon jini jaʼ! Cheʼ jini maʼanix baqui ora mi caj i yʌqʼueñon tiquin tiʼ. Maʼanix baqui ora mi cac tilel ti locʼ jaʼ wʌʼi›.
Jini xʼixic tsiʼ ñaʼta chaʼan Jesús woli yʌl chaʼan jiñʌch jaʼ muʼ bʌ lac jap. Pero Jesús woliʼ chaʼlen tʼan chaʼan jini i sujmlel bʌ tiʼ tojlel Dios yicʼot i yumʌntel, cheʼ bʌ bajcheʼ jaʼ muʼ bʌ i yʌcʼ cuxtʌlel mach bʌ anic miʼ jilel.
Jesús tsiʼ chaʼ sube jini xʼixic: ‹Cucu, pʌyʌ tilel a ñoxiʼal›.
Jini xʼixic tsiʼ yʌlʌ: ‹Maʼanic c ñoxiʼal›.
Jesús tsiʼ yʌlʌ, weñʌch bajcheʼ tsaʼ jacʼʌ, ‹pero tsaʼix ajñiyob a wicʼot joʼtiquil a ñoxiʼal, jini chumul bʌ a wicʼot waʼli mach a ñoxiʼalic›.
Toj sajtel i pusicʼal jini xʼixic cheʼ tsaʼ subenti jini. ¿Bajcheʼ tsiʼ ñaʼta Jesús iliyi? Come jiñʌch yajcʌbil bʌ yicʼot chocbil bʌ tilel i chaʼan Dios jin chaʼan tsiʼ yʌqʼue i ñaʼtan iliyi. Jini xcʌntʼañob i chaʼan tsaʼix chaʼ cʼotiyob, toj sajtelob i pusicʼal cheʼ bʌ tsiʼ qʼueleyob chaʼan woliʼ pejcan juntiquil xʼixic chʼoyol bʌ ti Samaria.
¿Chuqui miʼ cʌntesañonla iliyi? Mi lac ñop chaʼan Jesús miʼ pʌs i yutslel tiʼ tojlel winicob xʼixicob. Cheʼ yom mi lac mel jaʼel, mach yomic mi lac ñaʼtan, chaʼan jini winicob xʼixicob jontolob, chaʼan jach tilemob ti yambʌ tejclum. Yom bʌ Jesús jiñʌch chaʼan tiʼ pejtelel jini winicob xʼixicob miʼ cʌñob jini i sujmlel bʌ, muʼ bʌ i yʌqʼueñob i taj i cuxtʌlel mach bʌ anic miʼ jilel. Joñonla jaʼel yom mi laj coltan jini winicob xʼixicob chaʼan miʼ cʌñob jaʼel.