Cʌntesʌntel 99

I Cena lac Yum

WɅLE juevesix cheʼ ti acʼʌlel, tsaʼix ñumi chaʼpʼejl qʼuin. Jesús yicʼot jini lajchʌntiquil(12) i apóstolob tsaʼ cʼotiyob ti jumpʼejl cuarto am bʌ ti chaʼlajmlel otot chaʼan miʼ melob jini cena chaʼan bʌ Pascua. Muʼ bʌ a qʼuel yaʼ ti dibujo, woli bʌ i loqʼuel majlel jiñʌch Judas Iscariote. Woliʼ majlel i suben jini motomajob chaʼan bajcheʼ mi caj i chucob Jesús.

Tsaʼix ñumi jumpʼejl qʼuin, cheʼ bʌ Judas tsiʼ subeyob: ‹¿Chuqui mi caj laʼ wʌqʼueñon chaʼan mi cʌcʼ Jesús ti laʼ cʼʌb?›. Tsaʼ subenti: ‹Lujumpʼejl i chaʼcʼal (30) sʌsʌc taqʼuin›. Jin chaʼan Judas mi caj i tempan i bʌ yicʼot jini motomajob, chaʼan miʼ pʌyob majlel baʼan Jesús. ¡Wen bʌbʌqʼuen jini! ¿ñomach?

Jini cena chaʼan bʌ Pascua tsaʼix ujti. Pero waʼli Jesús woliʼ waʼchocon cojach bʌ cena. Tsiʼ yʌqʼue i apóstolob jumpʼejl caxlan waj i tsiʼ yʌlʌ: ‹Cʼuxula, come ili yom i yʌl c bʌcʼtal tsaʼ bʌ ajqʼui ti laʼ tojlel›. Cheʼ jaʼel tsiʼ chʼʌmʌ jumpʼejl vaso am bʌ i yaʼlel tsʼusub, i tsiʼ yʌlʌ: ‹Japʌla ti laʼ pejtelel, come jiñʌch yom yʌl c chʼichʼel muʼ bʌ i bejqʼuel ti laʼ tojlel›. Ti Biblia ili cena cʌmbil bajcheʼ, ‹I Cena lac Yum›.

Jini israelob caj i cʼuxob i waj cheʼ tiʼ yorajlel Pascua, chaʼan miʼ cʼajtesañob cheʼ bʌ tsaʼ ‹ñumi› juntiquil ángel i chaʼan Dios ti jujumpʼejl otot yaʼ ti Egipto, pero tsiʼ tsʌnsa ñaxam bʌ tsiʼ yila pañimil ti yalobil egiptojob. Pero ti jini ora, Jesús yom chaʼan jini woli bʌ i tsajcañob majlel miʼ cʼajtesañob yicʼot chaʼan tsaʼ chʌmi tiʼ cajob. Jin chaʼan tsiʼ mele jini cena muʼ bʌ i mejlel ti jujumpʼejl jab.

Cheʼ bʌ tsaʼix ujti i cʼuxob jini Cena i chaʼan lac Yum, Jesús tsiʼ sube i apóstolob chaʼan yom chʼejl yicʼot pʼʌtʌl jini ñopoloʼ bʌ i chaʼan ti Dios. Cheʼ bʌ tsaʼix ujti jini qʼuiñijel, tsiʼ chaʼleyob cʼay tiʼ tojlel Dios, cheʼ jini tsaʼ loqʼuiyob majlel. Tajol ojlilix o i xiñilix acʼʌlel. ¿Baqui mi caj i majlelob?

Mateo 26:14-30; Lucas 22:1-39; Juan, capítulo 13 cʼʌlʌl 17; 1 Corintios 11:20.