Cʌntesʌntel 105
Tsiʼ chaʼleyob pijt ti Jerusalén
JINI winicob xʼixicob jiñobʌch woli bʌ i tsajcañob majlel Jesús. Tsiʼ jacʼbeyob i tʼan yicʼot tsaʼ cʌleyob ti Jerusalén. Cheʼ bʌ woliyob ti pijt, an chuqui juʼucña tsiʼ yubiyob tiʼ pejtelel otot. Cheʼ bajcheʼ tsʌts bʌ icʼ tsaʼ ñumi ti ora. Tsaʼ caji i pʌs i bʌ alʌ cʼajc tiʼ pam i jol ti jujuntiquil. ¿Muʼ baʼ taj a qʼuel jini alʌ cʼajc tiʼ pam i jol ti jujuntiquil xcʌntʼañob? ¿Chuqui yom i yʌl jini?
¡Jumpʼejlʌch milagro! Jesús yaʼix chaʼ an ti panchan yicʼot i Tat, i woliʼ yʌqʼuen chʼujul bʌ i yespíritu Dios tiʼ tojlel woli bʌ i tsajcañob majlel. ¿Awujil ba chuqui miʼ mel jini espíritu tiʼ tojlel jini woli bʌ i tsajcañob majlel Jesús? Tiʼ pejtelel tsaʼ cajiyob ti tʼan ti yan tac bʌ tʼan.
Yonlel winicob xʼixicob yaʼ ti Jerusalén tsaʼ caji i yubiñob juʼucña bʌ cheʼ bajcheʼ tsʌts bʌ icʼ, jin chaʼan tsaʼ majliyob i qʼuel chuqui woli ti ujtel yaʼi. Lamital winicob xʼixicob yaʼañob ti Jerusalén tilemoʼ bʌ ti yan tac bʌ tejclum, chaʼan miʼ melob jini qʼuiñijel chaʼan bʌ Pentecostés. ¡Tojsajtelob i pusicʼal jini tsaʼ bʌ cʼotiyob ti Jerusalén! Come jini xcʌntʼañob tsaʼ cajiyob ti tʼan cheʼ bajcheʼ i tʼan cʼotemoʼ bʌ ti julaʼ yaʼ ti Jerusalén, tsaʼ caji i yʌlob wen ñuc tac bʌ melbil bʌ i chaʼan Dios.
‹Pejtelel jini winicob xʼixicob chʼoyolob ti Galilea›, cheʼ tsiʼ yʌlʌyob jini tsaʼ bʌ cʼotiyob ti Jerusalén. ‹Cheʼ jini, ¿bajcheʼ miʼ mejlelob ti tʼan ti yan tac bʌ tʼan, cheʼ mach tsaʼ lajal bʌ país tilemonla?›
Pedro tsaʼ waʼle i tsictesan iliyi. Tsaʼ caji ti tsʌts bʌ tʼan yicʼot tsaʼ caji i suben winicob xʼixicob bajcheʼ tsaʼ tsʌnsʌnti Jesús yicʼot chaʼan Jioba tsaʼix i tejchesa chʼojyel. Pedro tsiʼ yʌlʌ: ‹Waʼli yaʼix an Jesús ti panchan tiʼ ñoj Dios, jiñʌch tsaʼ bʌ i yʌcʼʌ jini chʼujul bʌ espíritu albil bʌ i chaʼan. Jin chaʼan, woli ti ujtel ili milagro tac›.
Weno, cheʼ bʌ Pedro tsiʼ yʌlʌ ili tʼan tac, yonlel winicob xʼixicob tsaʼ caji i yubiñob i chʼijiyemlel chaʼan tsaʼ bʌ i melbeyob Jesús. ‹¿Chuqui yom mic mel lojon?›, cheʼ tsiʼ cʼajtiyob. Pedro tsiʼ subeyob: ‹Yom mi laʼ qʼuextan bajcheʼ chumuletla yicʼot yom mi laʼ chʼʌm jaʼ›. Ti jini jach bʌ qʼuin lujuncʼajl i waxʌcbajcʼ (3,000) tsiʼ chʼʌmʌyob jaʼ yicʼot tsaʼ caji i tsajcañob majlel Jesús.