¿A wujilix ba?
¿Isujm ba chaʼan an quixtañujob ti wajali muʼ bʌ i wejchʼuñob mach bʌ weñic pacʼ tiʼ lum yambʌ quixtañu?
Ili jun chaʼan Digesto tsaʼ bʌ i mele jiñi emperador Justiniano cheʼ ti jabil 1468 jiñʌch jumpʼejl libro muʼ bʌ i taj ti tʼan jiñi wocol tac muʼ bʌ i yujtel ti wajali.
YAʼ ti Mateo 13:24-26, Jesús tsiʼ yʌlʌ: «I yumʌntel jini am bʌ ti panchan lajalʌch bajcheʼ juntiquil winic tsaʼ bʌ i wejchʼu wen bʌ pacʼ tiʼ lum. Cheʼ bʌ wʌyʌlob winicob, tsaʼ tili juntiquil i contra. Tsiʼ wejchʼu mach bʌ wenic bʌ pacʼ baʼ wejchʼubil jini trigo. Tsaʼ majli. Tsaʼ caji ti pasel i yopol. Tsaʼ caji i yʌcʼ i wut jini jam. Tsaʼ caji ti pasel jini mach bʌ wenic bʌ pacʼ jaʼel». An wen yujiloʼ bʌ maʼañic bʌ miʼ wen ñopob mi cheʼʌch miʼ yujtel ti wajali. Pero ti jiñi mandar i chaʼan romanojob, miʼ pʌs chaʼan mucʼʌch i mejlel ti ujtel bajcheʼ jiñi.
Jumpʼejl diccionario chaʼan Biblia, miʼ tsictesan chaʼan ti jiñi mandar miʼ yʌl chaʼan mulil cheʼ bʌ juntiquil miʼ chaʼ sutqʼuin chuqui miʼ tumbentel i miʼ wejchʼuben mach bʌ weñic pacʼ tiʼ lum jiñi yambʌ quixtañu. Mi cheʼ miʼ yʌl jiñi mandar bajcheʼ ili, tiʼ sujm yom i yʌl chaʼan cheʼʌch miʼ yujtel. Alastair Kerr, juntiquil wen yujil bʌ chaʼan mandar tac, miʼ tsictesan chaʼan cheʼ ti jabil 533 cheʼ bʌ tsajñix Cristo, jiñi emperador Justiniano am bʌ ti Roma tsiʼ pucu jumpʼejl libro cʌmbil bʌ bajcheʼ Digesto. Ti jiñi libro yaʼʌch lotol tiʼ pejtelel i mandar jiñi Roma baqui tsʼijbubil i tʼan jiñi wen yujiloʼ bʌ chaʼan mandar tsaʼ bʌ chumleyob cheʼ bʌ ti jabil 100 cʼʌlʌl ti 250 cheʼ bʌ tsajñix Cristo. Jiñi libro miʼ taj ti tʼan juntiquil wen yujil bʌ i cʼabaʼ Ulpiano, baqui tiʼ tsictesa chaʼan juntiquil quixtañu tsiʼ wejchʼu mach bʌ weñic pacʼ tiʼ lum yambʌ i piʼʌl. Tiʼ tsictesa jaʼel chaʼan jiñi tsaʼ bʌ wejchʼubenti mach bʌ weñic pacʼ tiʼ lum, miʼ mejlel i cʼajtin i tojol.
Cheʼ bajcheʼ mi laj qʼuel, iliyi mucʼʌch i yujtel wajali yaʼ ti Roma. Ili miʼ pʌs chaʼan cheʼʌch tsaʼ ujti tiʼ tojlel quixtañujob jiñi lajiya tsaʼ bʌ i cʼʌñʌ Jesús.