Cʌntesʌntel 109
Pedro tsiʼ julaʼta Cornelio
JINI yaʼ bʌ waʼal ti ñaxan jiñʌch jini apóstol Pedro, jini yaʼ bʌ añob tiʼ pat jiñʌch i yamigojob. Pero, ¿chucoch tsiʼ ñocchoco i bʌ jini winic tiʼ tojlel Pedro? ¿Wem ba miʼ mel bajcheʼ jini? ¿Awujil ba majqui jini?
Jini winic jiñʌch Cornelio. Yumʌlʌch chaʼan soldadojob yaʼ ti Roma. Cornelio mach i cʌñʌyic Pedro, pero tsaʼ subenti chaʼan miʼ pʌy majlel tiʼ yotot. Laʼ laj qʼuel bajcheʼ tsaʼ ujti iliyi.
Jini ñaxam bʌ tsiʼ tsajcayob majlel Jesús, judíojobʌch, pero Cornelio mach judíojic. Pero mucʼʌch i cʼuxbin Dios, miʼ pejcan ti oración yicʼot miʼ mel cabʌl chuqui wem bʌ tiʼ tojlel winicob xʼixicob. Ti jumpʼejl bʌ ochʼajel qʼuin, tsiʼ taja i qʼuel juntiquil ángel i tsiʼ yʌlʌ: ‹Wen maʼ qʼuejlel tiʼ tojlel Dios, jiñʌch muʼ bʌ caj i jacʼ a woración. Choco ti pʌyol juntiquil winic i cʼabaʼ Pedro. Yaʼan ti Jope, tiʼ yotot jini Simón, yaʼ bʌ an tiʼ tʼejl ñajb›.
Weno, Cornelio jiñʌch tsaʼ bʌ i mele ti ora. Tiʼ yijcʼʌlal, Pedro tsaʼ letsi tiʼ jol i yotot Simón. Dios tsiʼ yʌqʼue i ñaʼtan Pedro chaʼan woliʼ jubel tilel ti panchan cheʼ bajcheʼ colem pisil. Yaʼ tiʼ malil jini pisil an cabʌl añimal tac. Yaʼ tiʼ mandar tac Dios, yaʼ mi yʌl chaʼan jini añimal tac mach yomic chaʼan miʼ cʼuxtʌl, pero jumpʼejl tʼan tsiʼ sube: ‹Chʼojyen, Pedro. Tsʌnsan yicʼot cʼuxu›.
‹¡Maʼanic!›, cheʼ tsiʼ jacʼʌ Pedro. ‹Maʼanic baʼ ora tsaj cʼuxu chuqui tac bibiʼ bʌ.› Pero jini tʼan tsiʼ sube: ‹Mach a tsʼaʼlen chuqui tac tsaʼix i sʌqʼuesa Dios›. Uxyajl tsaʼ cʼoti jini tʼan. Cheʼ woliʼ chʌn ñaʼtan Pedro chuqui i sujmlel jini tsaʼ bʌ ujti i qʼuel, tsaʼ tiliyob jini winicob chocbiloʼ bʌ tilel i chaʼan Cornelio.
Pedro tsaʼ jubi majlel baʼan jini winicob, tsiʼ yʌlʌ: ‹Joñon jini winic woli bʌ laʼ sajcan. ¿Chucoch tsaʼ tiliyetla?›. Cheʼ bʌ jini winicob tsaʼ caji i subeñob, chaʼan juntiquil ángel tsiʼ sube Cornelio chaʼan miʼ pʌy jini Pedro tiʼ yotot, Pedro tsiʼ jacʼʌ majlel yicʼotob. Tiʼ yijcʼʌlal, Pedro yicʼot i yamigojob tsaʼ majli i julaʼtañob jini Cornelio yaʼ ti Cesarea.
Cornelio tsiʼ tempa tiʼ pejtelel i familia yicʼot yamigojob. Cheʼ bʌ Pedro tsaʼ cʼoti, Cornelio tsiʼ ñocchoco i bʌ tiʼ tojlel Pedro, cheʼ bajcheʼ maʼ qʼuel yaʼ ti dibujo. Pero Pedro tsiʼ yʌlʌ: ‹Chʼojyen winicon jach jaʼel›. Jini Biblia miʼ yʌl chaʼan mach wenic cheʼ mi lac chʼujutesan juntiquil winic. Cojach Jioba yom mi lac chʼujutesan.
Cheʼ jini, Pedro tsaʼ caji i suben jini wen tʼan yaʼ bʌ tempʌbilob. ‹Mic ñaʼtan chaʼan Dios miʼ qʼuel ti ñuc pejtelel winicob yom bʌ i melben i yeʼtel›, cheʼ tsiʼ yʌlʌ Pedro. Cheʼ bʌ Pedro woli to ti tʼan, Dios tsiʼ yʌqʼue chʼujul bʌ espíritu yaʼ bʌ tempʌbilob, i tsaʼ cajiyob ti tʼan ti yan tac bʌ tʼan. Tsaʼ toj sajtiyob i pusicʼal jini xcʌntʼañob judíojoʼ bʌ yaʼ bʌ an yicʼotob Pedro, come tsiʼ ñaʼtʌyob chaʼan cojach jini judíojob miʼ qʼuejlelob ti ñuc ti Dios. Iliyi tsiʼ pʌsbeyob chaʼan Dios junlajal miʼ qʼuel winicob xʼixicob. ¿Mach ba wenic cheʼ mi laj cʼajtesan jini?
Hechos 10:1-48; 11:1-18; Apocalipsis 19:10.