I referenciajlel jiñi Jun chaʼan lac tempa bʌ I Subtʼan yicʼot i Melbal jiñi xÑoptʼan
4-10 I CHAʼAN FEBRERO
ÑUC TAC BɅ I CʼɅJÑIBAL TI BIBLIA | ROMANOS 1-3
Laʼ lac sʌclan ñuc tac bʌ i cʼʌjñibal
(Romanos 3:4, I tʼan Dios [ITD]) Maʼanic. Anquese xlotob pejtelel winicob, mach yujilic lot Dios. Cheʼ bajcheʼ tsʼijbubil ti Salmos: «Tojʌch chuqui miʼ yʌl Dios ti pejtelel ora. Maʼanic majqui mi mejlel i yʌl mach tojic Dios».
w08 15/6 30 párr. 5
Ñuc tac bʌ cʌntesʌntel am bʌ ti Romanos
3:4. Cheʼ bʌ miʼ contrajin i bʌ chuqui miʼ yʌl jiñi wiñic yicʼot chuqui miʼ yʌl i tʼan Dios, mi lac pʌs chaʼan isujmʌch chuqui miʼ yʌl Dios mi mucʼʌch lac ñop muʼ bʌ i yʌl jiñi Biblia yicʼot mi lac mel cheʼ bajcheʼ yom Dios. Cheʼ jaʼel, jiñi la queʼtel ti subtʼan yicʼot cheʼ mi lac sutqʼuin ti xcʌntʼan yambʌlob mi laj coltañob i qʼuel chaʼan Dios mach yujilic lot.
(Romanos 3:24, 25, ITD) Dios miʼ yotsañob tiʼ wenta chaʼan jach i yutslel i pusicʼal. Miʼ ñusʌbeñob i mul tiʼ majtan jach, come Cristo Jesús tsiʼ mʌñʌyob chaʼan miʼ yʌcʼob ti colel. 25 Come Dios tsiʼ waʼchoco Cristo chaʼan miʼ tojbeñob i mul yicʼot i chʼichʼel, chaʼan miʼ lajmel i michʼajel tiʼ tojlel pejtel muʼ bʌ i ñopob. Cheʼ jini tsiquil tojʌch Dios tsaʼ bʌ i toʼol qʼuelbeyob i mul winicob xʼixicob ti yambʌ ora cheʼ woli to i cuchbeñob i mul.
w08 15/6 29 párr. 6
Ñuc tac bʌ cʌntesʌntel am bʌ ti Romanos
3:24, 25 ¿Bajcheʼ tsaʼ mejli i tojben «i mul» jiñi wiñicob xʼixicob ti wajali jiñi i cuxtʌlel tsaʼ bʌ i yʌcʼʌ Jesús? Jiñi ñaxam bʌ profecía tsaʼ bʌ ajli chaʼan jiñi Mesías muʼ bʌ lac taj ti Génesis 3:15, tsaʼ tsʼʌctiyi cheʼ bʌ tsaʼ tsʌnsʌnti Jesucristo i tsaʼ jocʼchoconti ti teʼ cheʼ ti jabil 33 (Gá. 3:13, 16). Cheʼ bʌ Jehová tsiʼ yʌlʌ jiñi profecía, lajal bajcheʼ tsaʼix ajqʼui jiñi i tojol laj coltʌntel come maʼañic chuqui miʼ mejlel i mʌctan chaʼan miʼ tsʼʌctesan i tʼan. Jehová tsaʼ mejli i ñusʌben i mul majqui jach miʼ yʌcʼ i ñopoñel ti jiñi wʌn albil bʌ i chaʼan come tsiʼ chʼʌmʌ ti ñuc jiñi i cuxtʌlel muʼ bʌ caj i yʌcʼ i yalobil. Cheʼ jaʼel, jiñi i tojol laj coltʌntel miʼ yʌcʼ chaʼan jiñi tsaʼ bʌ chʌmiyob cheʼ bʌ maxto tilemic Cristo miʼ chaʼ chʼojyelob (Hch. 24:15).
11-17 I CHAʼAN FEBRERO
ÑUC TAC BɅ I CʼɅJÑIBAL TI BIBLIA | ROMANOS 4-6
«Dios miʼ pʌsbeñonla i cʼuxbiya»
(Romanos 5:8, ITD) Pero tsaʼ chʌmi Cristo chaʼañonla cheʼ xmulilon tola. Cheʼ jini, Dios tsiʼ pʌsbeyonla cʼux miʼ yubiñonla.
(Romanos 5:12, ITD) Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel.
w11 15/6 12 párr. 5
Dios miʼ yʌqʼueñonla i cʼuxbiya
5 Pablo miʼ tech i tsictesan tsaʼ bʌ ujti ti wajali: «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel» (Ro. 5:12). Ti Biblia mi lac taj yan tac bʌ texto baqui Dios miʼ coltañonla lac chʼʌmben i sujm chuqui yom i yʌl ili tʼan tac. Cheʼ bajcheʼ la cujil, Jehová tsiʼ ñaxan mele Adán yicʼot Eva, mach bʌ xmulilobic. Ti wiʼil tsaʼ aqʼuentiyob jumpʼejl mandar mach bʌ wocolic ti melol, mi tsiʼ ñusayob jiñi tʼan miʼ chʌmelob (Gn. 2:17). Pero jiñi ñaxam bʌ lac tatob maʼañic tsiʼ jacʼbeyob i tʼan Jehová, cheʼ bajcheʼ jiñi tsiʼ pʌsʌyob chaʼan mach yomobic i qʼuel bajcheʼ jiñi xʼAcʼ mandar yicʼot bajcheʼ Yumʌl (Dt. 32:4, 5).
(Romanos 5:13, 14, ITD) Cheʼ maxto tsʼijbubilic jini mandar, anix mulil ti pañimil. Pero cheʼ maxto anic mandar, maxto anic mulil tiʼ wenta winicob xʼixicob. 14 Melel tsaʼ laj chʌmiyob cʼʌlʌl ti Adán cʼʌlʌl ti Moisés, yicʼot jaʼel jini mach bʌ lajalobic i mul bajcheʼ Adán. Jini Adán mach lajalic cheʼ bajcheʼ Cristo tsaʼ bʌ tili ti wiʼil.
w11 15/6 12 párr. 6
Dios miʼ yʌqʼueñonla i cʼuxbiya
6 Jiñi i pʼolbal Adán tsaʼ tili cheʼ bʌ tsaʼix i chaʼle mulil. Jin chaʼan, tsiʼ laj tajayob jiñi mulil yicʼot i wocolel. Pero Jehová maʼañic tsiʼ yotsʌbeyob tiʼ mul jiñi tsaʼ bʌ i mele Adán, come mach jiñobic tsaʼ bʌ i ñusayob jiñi mandar, cheʼ jaʼel maxto añic acʼbil yambʌ mandar tac (Gn. 2:17). Pero tsaʼʌch cʼaxtesʌbentiyob jiñi mulil. Ti jimbʌ ora, tsaʼ ochi jiñi mulil yicʼot chʌmel ila ti pañimil cʼʌlʌl cheʼ bʌ Dios tsiʼ yʌqʼueyob mandar tac jiñi israelob, baqui tsiʼ yʌcʼʌ ti cʌñol chaʼan laj xmulilob (pejcan Romanos 5:13, 14). Jiñi mulil miʼ mejlel ti lajintel bajcheʼ jumpʼejl cʼamʌjel muʼ bʌ i mejlel i cʼaxtesʌben i yalobil jiñi tatʌlob. An i tajol mach ti pejtelelobic i yalobil mi caj i tajob jiñi cʼamʌjel. Pero mach cheʼic jiñi mulil, ti lac pejtelel tsaʼ cʼaxtesʌbentiyonla, jin chaʼan mi lac chʌmel. ¿Muʼ ba caj i jilel ili wocol?
(Romanos 5:18, ITD) Chaʼan tiʼ mul Adán sajtemob pejtelel winicob xʼixicob, pero chaʼan ti toj bʌ i melbal Cristo miʼ qʼuejlelob ti toj pejtelel winicob xʼixicob, chaʼan cuxul miʼ yajñelob.
(Romanos 5:21, ITD) Tsiquil cheʼ jini, tsaʼ chʌmiyob cabʌlob tiʼ yumʌntel mulil, pero chaʼan tiʼ yutslel i pusicʼal Dios anix laj cuxtilel mach bʌ anic miʼ jilel, chaʼan tsaʼ aqʼuentiyonla toj bʌ lac pusicʼal ti Jesucristo lac Yum.
w11 15/6 13 párr. 9, 10
Dios miʼ yʌqʼueñonla i cʼuxbiya
9 ¿Chuqui yom i yʌl jiñi tʼan am bʌ griego muʼ bʌ i chaʼlentel ti traducir «miʼ qʼuejlelob ti toj»? Jiñi tsaʼ bʌ i chaʼlen ti traducir jiñi Biblia tsaʼix bʌ lac taja ti tʼan, tiʼ tsʼijbu: «Ili jiñʌch jumpʼejl lajiya muʼ bʌ i pʌs chuqui miʼ yujtel ti jumpʼejl melobʌjʌl. Maʼañic woliʼ taj ti tʼan chaʼan tsiʼ qʼuexta i melbal juntiquil quixtañu, jiñʌch bajcheʼ yilal miʼ qʼuejlel ti Dios [...]. Ti ili lajiya, Dios jiñʌch jiñi xmeloñel muʼ bʌ i coltan jiñi am bʌ i mul, lajal bajcheʼ jiñi xmulil miʼ cʼotel i mel i bʌ tiʼ tojlel jiñi Dios, pero miʼ ñusʌbentel i mul».
10 ¿Bajcheʼ miʼ mejlel i qʼuel ti toj juntiquil xmulil jiñi «xMeloñel muʼ bʌ i mel pejtel añoʼ bʌ ti pañimil»? (Gn. 18:25). Mucʼʌch i mejlel i mel come tiʼ yutslel i pusicʼal tsiʼ choco tilel ti pañimil jiñi cojach bʌ i yalobil i cheʼ bajcheʼ jiñi, miʼ mejlel i qʼuel ti toj jiñi xmulil. Jesús tsiʼ laj tsʼʌctesa chuqui yom i Tat anquese tsaʼ ilʌbenti i pusicʼal, tsaʼ wajlenti yicʼot tsaʼ ticʼlʌnti. Chʌn xucʼul tsaʼ ajñi cʼʌlʌl tsaʼ chʌmi (He. 2:10). Cheʼʌch bajcheʼ ili, tsiʼ yʌcʼʌ jiñi toj bʌ i cuxtʌlel chaʼan miʼ yʌcʼ ti colel i pʼolbal Adán, ili yom i yʌl chaʼan miʼ locʼsañob ti mulil yicʼot chʌmel (Mt. 20:28; Ro. 5:6-8).
Laʼ lac sʌclan ñuc tac bʌ i cʼʌjñibal
(Romanos 6:3-5, Traducción del Nuevo Mundo [TNM]) ¿O mach ba laʼ wujilic chaʼan ti lac pejtelel tsaʼix bʌ lac chʼʌmʌjaʼ ti Jesucristo, tsaʼix lac chʼʌmʌjaʼ tiʼ chʌmel? 4 Jin chaʼan tsaʼ tem mujquiyonla la quicʼot cheʼ tsaʼ lac chʼʌmʌjaʼ tiʼ chʌmel, chaʼan cheʼ bajcheʼ tsaʼ tejchi Cristo baʼan chʌmeñoʼ bʌ tiʼ ñuclel i Tat, cheʼ joñonla jaʼel mi la cajñel ti tsijiʼ bʌ laj cuxtʌlel. 5 Mi temel añonla la quicʼot cheʼ bajcheʼ tsaʼ chʌmi, cheʼʌch jaʼel temel mi caj la cajñel cheʼ bajcheʼ tsaʼ chaʼ chʼojyi.
w08 15/6 29 párr. 7
Ñuc tac bʌ cʌntesʌntel am bʌ ti Romanos
6:3-5 ¿Chuqui yom i yʌl jiñi chʼʌmjaʼ ti Jesucristo yicʼot jiñi chʼʌmjaʼ tiʼ chʌmel? Cheʼ bʌ Jehová miʼ bon jiñi xñoptʼañob ti chʼujul bʌ espíritu miʼ cʼotelob ti tem ajñel yicʼot Jesús i miʼ yochelob ti jiñi congregación, i bʌcʼtal jiñi Cristo. Cheʼ jaʼel, Jesús jiñʌch i jol jiñi congregación (1 Co. 12:12, 13, 27; Col. 1:18). Ili jiñʌch jiñi chʼʌmjaʼ ti Cristo. Cheʼ bʌ jiñi bombil bʌ xñoptʼañob miʼ chʼʌmob jaʼ «tiʼ chʌmel» Jesús, yom i yʌl chaʼan miʼ yʌcʼob i cuxtʌlel tiʼ melol i yeʼtel yicʼot maʼañix miʼ ñaʼtañob chumtʌl ila ti Lum. Jin chaʼan, cheʼ miʼ chʌmelob jumpʼejlʌch majtan lajal bʌ bajcheʼ i chaʼan Cristo, pero maʼañic miʼ mejlel i coltañonla. Jiñi chʼʌmjaʼ ti Cristo miʼ tsʼʌctiyel cheʼ ba ora miʼ chʌmelob i miʼ tejchelob chaʼan miʼ chumtʌlob ti panchan.
(Romanos 6:7, ITD) Come jini tsaʼix bʌ chʌmi, colbilix tiʼ pʼʌtʌlel mulil.
¿Chuqui ti pijtaya an i chaʼan jiñi c ñojteʼelob?
Cheʼ bʌ miʼ chaʼ tejchelob jiñi mach bʌ tojobic, ¿muʼ ba caj i tojob i mul chaʼan chuqui tsiʼ meleyob ti wajali? Maʼañic. Romanos 6:7 miʼ yʌl: «Jini tsaʼix bʌ chʌmi, colbilix tiʼ pʼʌtʌlel mulil». Cheʼ bajcheʼ mi laj qʼuel, jiñi mach bʌ tojobic tsaʼix i tojoyob i mul cheʼ bʌ tsaʼ chʌmiyob, jin chaʼan maʼañic mi caj i mejlelob chaʼan tsaʼ bʌ meleyob ti wajali, mi caj i mejlelob chaʼan chuqui mi caj i melob cheʼ bʌ miʼ chaʼ tejchelob. ¿Chucoch weñʌch iliyi?
18-24 I CHAʼAN FEBRERO
ÑUC TAC BɅ I CʼɅJÑIBAL TI BIBLIA | ROMANOS 7, 8
¿Woli ba lac pijtan?
(Romanos 8:19, ITD) Come pejtel melbil tac bʌ ti pañimil woli ti pijt jinto miʼ pʌstʌlob i yalobilob Dios.
w12 15/7 11 párr. 17
Jehová miʼ yʌqʼueñonla i sujm bʌ lac librejlel
17 Cheʼ bʌ miʼ tsictesan chaʼan jiñi librejlel muʼ bʌ caj i yʌqʼuen Jehová jiñi i wiñicob ila ti pañimil, Pablo tsiʼ yʌlʌ chaʼan «pejtel melbil tac bʌ ti pañimil woli ti pijt jinto miʼ pʌstʌlob i yalobilob Dios». Cheʼ jiñi tsiʼ chaʼ alʌ: «Jini melbil tac bʌ mi caj i yʌjqʼuel ti colel tiʼ pʼʌtʌlel chʌmel. Mi caj i yochel ti libre chaʼan tijicña miʼ yajñel yicʼot i ñuclel i yalobilob Dios» (Ro. 8:19-21). Ti ili texto jiñi «melbil tac bʌ» jiñobʌch jiñi wiñicob xʼixicob añoʼ bʌ i pijt chaʼan miʼ chumtʌlob tiʼ pejtelel ora wʌʼ ti pañimil i mi caj i tajob i wenlel cheʼ bʌ miʼ «pʌstʌlob» jiñi bombiloʼ bʌ i yalobil Dios. Ili mi caj i tejchel cheʼ bʌ laj yaʼix añob ti panchan i miʼ coltañob Cristo chaʼan miʼ jisan jontolil ila ti Lum yicʼot miʼ pʌyob ochel yonlel «winicob xʼixicob» ti jiñi tsijiʼ bʌ pañimil (Ap. 7:9, 14).
(Romanos 8:20, ITD) Come tsaʼ asiyi yicʼot wocol pejtel melbil tac bʌ, mach chaʼanic bajñel yom, pero cheʼʌch yom Dios chaʼan miʼ wersa pijtan jini ñumen utsʼat tac bʌ muʼ bʌ caj i tilel.
w12 15/3 23 párr. 11
Yom tijicñayonla chaʼan jiñi lac pijtaya
11 Jehová tsiʼ yʌcʼʌ jumpʼejl pijtaya tiʼ tojlel wiñicob xʼixicob cheʼ bʌ tsiʼ yʌlʌ chaʼan juntiquil «i pʼolbal jiñi xʼixic» mi caj i coltañob tiʼ tojlel Satanás, jiñi «oñiyix bʌ lucum» (Gn. 3:15; Ap. 12:9). I «pʼolbal jiñi xʼixic» jiñʌch Jesucristo (Gá. 3:16). I chʌmel yicʼot i chaʼ tejchel Jesús tsiʼ yʌcʼʌ chaʼan jiñi wiñicob xʼixicob miʼ mejlelob ti loqʼuel tiʼ pʼʌtʌlel jiñi mulil yicʼot chʌmel. Chaʼan miʼ tsʼʌctiyel ili tʼan wʌn albil bʌ miʼ taj i bʌ yicʼot i «pʌstʌlob i yalobilob Dios». ¿Jala mi caj i «pʌstʌlob»? Jiñʌch cheʼ bʌ jiñi bombiloʼ bʌ miʼ chaʼ tejchelob bajcheʼ i chaʼmojtlel «i pʼolbal jiñi xʼixic» i miʼ temob i bʌ yicʼot Cristo chaʼan miʼ jisañob jiñi jontol bʌ i pañimil Satanás (Ap. 2:26, 27). Ili mi caj i coltan jiñi yambʌ tiñʌmeʼob cuxul bʌ miʼ ñumelob ti jiñi ñuc bʌ wocol (Ap. 7:9, 10, 14).
(Romanos 8:21, ITD) Pejtel jini melbil tac bʌ mi caj i yʌjqʼuel ti colel tiʼ pʼʌtʌlel chʌmel. Mi caj i yochel ti libre chaʼan tijicña miʼ yajñel yicʼot i ñuclel i yalobilob Dios.
w12 15/3 23 párr. 12
Yom tijicñayonla chaʼan jiñi lac pijtaya
12 Ti jiñi Mil jab i Yumʌntel Cristo, jiñi quixtañujob mi caj i tajob cabʌl tijicñʌyel. Ti jimbʌ ora an yambʌ bajcheʼ mi caj i «pʌstʌlob i yalobilob Dios»: Cheʼ bʌ añobix bajcheʼ motomajob yicʼot Cristo, mi caj i yʌqʼueñob i wenlel jiñi wiñicob xʼixicob chaʼan tsiʼ yʌcʼʌ i bʌ ti chʌmel Cristo. Cheʼ bʌ wolix i mel i yeʼtel jiñi i Yumʌntel Dios, mi caj i cʼunteʼ jilel majlel jiñi mulil yicʼot chʌmel tiʼ tojlel jiñi wiñicob xʼixicob xjacʼtʼañoʼ bʌ. Cʼunteʼ cʼunteʼ ‹mi caj i yʌjqʼuelob ti colel tiʼ pʼʌtʌlel chʌmel›. Mi chʌn xucʼulob tiʼ tojlel Jehová ti jiñi mil jab yicʼot miʼ cuchob jiñi cojix bʌ wocol mi caj i qʼuelob i cʼabaʼ ti jiñi «jun baʼ tsʼijbubil i cʼabaʼob añoʼ bʌ i cuxtʌlel» yicʼot mi caj ‹i yochelob ti libre chaʼan tijicña miʼ yajñelob yicʼot i ñuclel i yalobilob Dios› (Ap. 20:7, 8, 11, 12). ¡Wen utsʼatax bʌ pijtaya!
Laʼ lac sʌclan ñuc tac bʌ i cʼʌjñibal
(Romanos 8:26, 27, ITD) Cheʼ jaʼel jini Espíritu miʼ coltañonla cheʼ cʼuñonla, come mach la cujilic bajcheʼ yom mi lac pejcan Dios. Jini Espíritu miʼ cʼajtiben Dios ti wocol tʼan chuqui yom ti lac tojlel cheʼ woliyonla ti ajcʌn. 27 Dios muʼ bʌ i wen qʼuel lac pusicʼal yujil chuqui yom jini Espíritu, come miʼ cʼajtiben Dios ti wocol tʼan chaʼan miʼ coltan i chaʼañoʼ bʌ cheʼ bajcheʼ yom Dios.
w09 15/11 7 párr. 20
¿Chuqui miʼ yʌcʼ ti cʌjñel a woración?
20 An i tajol maʼañic mi lac ñaʼtan chuqui yom mi laj cʼajtin cheʼ mi lac bajñel mel la coración. Pablo tsiʼ yʌlʌ: «Mach la cujilic bajcheʼ yom mi lac pejcan Dios. Jini [chʼujul bʌ] Espíritu miʼ cʼajtiben Dios ti wocol tʼan chuqui yom ti lac tojlel cheʼ woliyonla ti ajcʌn. Dios muʼ bʌ i wen qʼuel lac pusicʼal yujil chuqui yom jini Espíritu» (Ro. 8:26, 27). Jehová tsiʼ yʌcʼʌ ti tsʼijbuntel cabʌl oración yaʼ ti Biblia. Come jiñʌch tsiʼ yʌcʼʌ ti tsʼijbuntel, yujil chuqui yom i yʌl jiñi tsaʼ bʌ i tsʼijbuyob jiñi Biblia. Cheʼ jaʼel, wen i cʌñʌyonla, jin chaʼan cheʼ bʌ mi laj cʼʌn jiñi oración tac am bʌ ti Biblia, lajal miʼ qʼuel bajcheʼ lac chaʼañʌch i miʼ jacʼ. Jehová miʼ jacʼ la coración cheʼ bʌ jiñi espíritu «miʼ cʼajtiben» ti wocol tʼan chuqui la com. Cheʼ bʌ mi lac ñumen cʌn i Tʼan Dios, mach wocolix mi caj lac ñaʼtan chuqui yom mi laj cʼajtin.
25 I CHAʼAN FEBRERO-3 I CHAʼAN MARZO
ÑUC TAC BɅ I CʼɅJÑIBAL TI BIBLIA | ROMANOS 9-11
«Jiñi lajiya i chaʼan olivo teʼ»
(Romanos 11:16, ITD) Come jini Abraham yicʼot jini xʼaltʼanob, i chaʼañobʌch Dios. Cheʼ jaʼel i pʼolbalob, come mi chʼujul i wiʼ teʼ, cheʼ jaʼel i cʼʌb tac.
w11 15/5 23 párr. 13
¡Wen cabʌl i ñaʼtʌbal Dios!
13 Pablo miʼ lajin i pʼolbal Abrahán yicʼot i cʼʌb tac jiñi olivo teʼ (Ro. 11:21). Ili teʼ jiñʌch i yejtal bajcheʼ mi caj i tsʼʌctiyel chuqui yom Dios tiʼ tojlel jiñi trato tsaʼ bʌ i mele yicʼot Abrahán. Chʼujul i wiʼ jiñi olivo teʼ i jiñʌch i yejtal Jehová, come miʼ yʌqʼuen i cuxtʌlel jiñi chʼujul bʌ israelob (Is. 10:20; Ro. 11:16). Jiñi i xujcʼunteʼlel jiñʌch Jesús, jiñi ñuc bʌ i pʼolbal Abrahán, i jiñi i cʼʌb tac jiñʌch tiʼ pejtelel ochemoʼ bʌ ti jiñi yambʌ parte i pʼolbal Abrahán.
(Romanos 11:17, ITD) Tsaʼ jajqui loqʼuel lamital i cʼʌb teʼ. Jatet i cʼʌbet yambʌ olivo teʼ mach bʌ anic i cʼʌjñibal, yilol jach bʌ tsaʼ coli ti mateʼel. Tsaʼ otsʌntiyet baʼ tsaʼ jajqui loqʼuel i cʼʌb. Tsaʼ taja a pʼʌtʌlel tiʼ wiʼ yicʼot tiʼ yetsel jini wen bʌ olivo teʼ.
(Romanos 11:20, 21, ITD) Melelʌch. Tsaʼ jajqui loqʼuel come maʼanic tsiʼ ñopoyob. Jatet maʼ cʌytʌl baʼ ochemet chaʼan jach tsaʼ ñopo. Mach a qʼuel a bʌ ti ñuc. Chaʼlen bʌqʼuen. 21 Dios tsiʼ jacʌ loqʼuel lamital jini mero i cʼʌb teʼ. Mach toʼo cheʼic jach tsiʼ qʼuele. Mach toʼo cheʼic jach mi caj i qʼuelet jaʼel.
w11 15/5 24 párr. 15
¡Wen cabʌl i ñaʼtʌbal Dios!
15 Cheʼ jiñi, ¿chuqui tsiʼ mele Jehová chaʼan miʼ tsʼʌctesan chuqui yom? Cheʼ bajcheʼ miʼ tsictesan Pablo, yaʼ baqui tsaʼ jajqui loqʼuel i cʼʌb jiñi olivo teʼ tsiʼ yotsa yambʌ i cʼʌb olivo yilol jach bʌ tsaʼ coli ti mateʼel (pejcan Romanos 11:17, 18). Cheʼ bajcheʼ miʼ yʌl ili tʼan, jiñi bombil bʌ xñoptʼañob tilemoʼ bʌ ti cabʌl tejclum, cheʼ jaʼel jiñi mach bʌ judíojobic añoʼ bʌ ti congregación i chaʼan Roma, tsaʼ otsʌntiyob ti jiñi olivo teʼ cheʼ ti lajiya tʼan. Bajcheʼ ili tsaʼ sujtiyob tiʼ pʼolbal Abrahán. Anquese ti ñaxan maʼañic miʼ mejlelob ti ochel ti jiñi trato, come lajalob bajcheʼ olivo yilol jach bʌ tsaʼ coli ti mateʼel, pero Jehová tiʼ sujtesayob ti chʼujul bʌ Israel (Ro. 2:28, 29).
(Romanos 11:25, 26, ITD) Hermanojob, yom mi laʼ ñaʼtan jini tʼan mach bʌ tsictiyemic ti yambʌ ora, ame ñuquic mi laʼ lon qʼuel laʼ bʌ ti laʼ bajñel pusicʼal. Tsaʼ tsʌtsayob i pusicʼal lamital israelob jinto tsʼʌcʌl miʼ yochelob jini gentilob. 26 Cheʼ jini, pejtelel israelob mi caj i coltʌntelob cheʼ bajcheʼ tsʼijbubil: «Tal juntiquil xColtaya loqʼuem bʌ ti Sion. Mi caj i jisʌben i jontolil i pʼolbal Jacob.
w11 15/5 25 párr. 19
¡Wen cabʌl i ñaʼtʌbal Dios!
19 Tiʼ sujm, utsʼat woliʼ tsʼʌctiyel jiñi yom bʌ Jehová tiʼ tojlel jiñi «i chaʼañoʼ bʌ Dios» (Gá. 6:16). Cheʼ bajcheʼ tsiʼ yʌlʌ Pablo, «pejtelel israelob mi caj i coltʌntelob» (Ro. 11:26). Cheʼ miʼ cʼotel i yorajlel bajcheʼ acʼbil i chaʼan Jehová «pejtelel israelob» ili yom i yʌl cheʼ miʼ tsʼʌctiyel jiñi chʼujul bʌ israelob mi caj i chaʼleñob eʼtel ti panchan. Mi caj i yochelob ti rey yicʼot ti motomajob. ¡Maʼañic chuqui miʼ mejlel i mʌctan chaʼan miʼ tsʼʌctiyel jiñi ñaʼtʌbil bʌ i chaʼan Dios!
Laʼ lac sʌclan ñuc tac bʌ i cʼʌjñibal
(Romanos 9:21-23, ITD) Jini xmel ucʼum, ¿mach ba mejlic i cʼʌn jini ocʼol bajcheʼ yom? Ti juncʼojl ocʼol miʼ mel jumpʼejl ucʼum muʼ bʌ i cʼʌjñel chaʼan chuqui utsʼat. Miʼ mel yambʌ ucʼum muʼbʌ i cʼʌjñel chaʼan jini mach bʌ wenic. 22 ¿Chuqui cheʼ jini? Anquese yom Dios i pʌs i michʼajel yicʼot i pʼʌtʌlel, wen jal tsiʼ cuchbeyob i mul jini tsaʼ bʌ i techbeyob i michʼajel muʼ bʌ caj i jisʌntelob. 23 Wen jal tsiʼ cuchbeyob i mul chaʼan miʼ yʌcʼ ti tsictiyel pejtelel i ñuclel tiʼ tojlel jini pʼuntʌbiloʼ bʌ i chaʼan, yajcʌbiloʼ bʌ chaʼan miʼ tajob i ñuclel.
w13 15/6 25 párr. 5
Laʼ i weñʼesañet i ticʼojel tac Jehová
5 ¿Bajcheʼ miʼ cʼʌn i pʼʌtʌlel jiñi Ñuc bʌ xMel ucʼum tiʼ tojlel mach bʌ añic miʼ yʌcʼob i bʌ ti weñʼesʌntel? Cheʼ bʌ jiñi ocʼol mach weñic bajcheʼ miʼ loqʼuel, tajol miʼ mejlel ti sujtesʌntel ti yambʌ ucʼum o miʼ chojquel. Tajol jiñi xmel ucʼum maʼañic tsaʼ mejli i cʼʌn ti wen. Pero mach cheʼic miʼ yujtel tiʼ tojlel jiñi Ñuc bʌ xMel ucʼum (Dt. 32:4). Cheʼ bʌ juntiquil quixtañu maʼañic miʼ yʌcʼ i bʌ ti weñʼesʌntel, jiñʌch an tiʼ mul. Jehová miʼ cʼʌn i pʼʌtʌlel tiʼ tojlel wiñicob xʼixicob jiñʌch bajcheʼ miʼ yʌcʼob i bʌ ti tojʼesʌntel. Jiñi wem bʌ miʼ yʌcʼob i bʌ ti tojʼesʌntel utsʼat miʼ cʼʌjñelob. Jumpʼejl ejemplo, jiñi bombil bʌ xñoptʼañob jiñʌch «pʼuntʌbiloʼ bʌ i chaʼan» tsaʼ bʌ sujtesʌntiyob ti «ucʼum muʼ bʌ i cʼʌjñel chaʼan chuqui utsʼat». Pero jiñi muʼ bʌ i chʌn contrajiñob Dios jiñʌch jiñi ucʼum «muʼ bʌ caj i jisʌntelob» (Ro. 9:19-23).