CɅNTESɅNTEL 2

Chaʼlen tʼan bajcheʼ ñʌmʌl a mel

2 Corintios 2:17

YOM BɅ MIʼ CɅJÑEL: Chaʼlen tʼan bajcheʼ ñʌmʌlet chaʼan maʼ pʌs muʼ bʌ a wubin chaʼan jiñi temaj yicʼot chaʼan jiñi woli bʌ i ñʌchʼtañetob.

Mele oración yicʼot wen chajpan a bʌ. Cʼajtin a coltʌntel ti oración chaʼan jin maʼ wʌcʼ ti a ñaʼtʌbal jiñi muʼ bʌ caj a sub i mach jatetic maʼ ñaʼtan a bʌ. Yom cʼajal a chaʼan baqui bʌ jiñi ñuc tac bʌ i cʼʌjñibal yom bʌ maʼ tsictesan. Ti a bajñel tʼan yom maʼ wʌl, mach jin jach maʼ chʌcʌ al jujumpʼejl tʼan am bʌ yaʼ ti jun.

Mi woli a ñaʼtan a pejcan muʼ bʌ i yʌl ti Biblia o yambʌ jun, wen chajpan a bʌ chaʼan belecña maʼ pejcan. Mi woli a ñaʼtan a pejcan tsaʼ bʌ i yʌlʌ juntiquil quixtañu, yom maʼ chumtan jiñi muʼ bʌ a pejcan, pero mach yomic miʼ ñumel ti pʼis.
Yom loqʼuem ti a pusicʼal chuqui maʼ wʌl. Ñaʼtan chucoch yomʌch miʼ yubiñob chuqui woli a wʌl. Acʼʌ a ñaʼtʌbal tiʼ tojlelob. Cheʼ jiñi, mi caj a pʌs a cʼuxbiya yicʼot a wutslel ti bajcheʼ maʼ ñijcan tac a cʼʌb, bajcheʼ añet yicʼot bajcheʼ maʼ mel a ñiʼ a wut.

Mach lajalic cheʼ mi lac chaʼlen tʼan bajcheʼ ñʌmʌlonla yicʼot cheʼ bajcheʼ jach mi lac chaʼlen tʼan. Yom maʼ wʌcʼ ti qʼuejlel ti wen jiñi woli bʌ a sub, iliyi maʼ mel cheʼ tojʌch maʼ wʌl jiñi tʼan tac yicʼot cheʼʌch maʼ mel bajcheʼ an ti chʼol.
Qʼuele jiñi woli bʌ i ñʌchʼtañetob. Mi mach lecojic ti qʼuelol, yom maʼ qʼuelob tiʼ wut. Cheʼ bʌ woli a ñusan jumpʼejl discurso, qʼuele juntiquil quixtañu, cheʼ jiñi qʼuele yambʌ. Mach cheʼic jach yom maʼ pam qʼuelob jiñi yaʼ bʌ tempʌbilob.