Melben i yeʼtel Jehová

¿Juntiquilet ba xcolel maxto bʌ a chʼʌmʌ jaʼ? ¿Woli ba a chʼʌm estudio? ¿Añix ba a ñaʼta a chʼʌmjaʼ? ¿Chucoch yom maʼ mel? Cheʼ maʼ wʌqʼuen a bʌ Jehová yicʼot maʼ chʼʌmjaʼ, maʼ tech a ñumen lʌcʼtesan a bʌ tiʼ tojlel yicʼot miʼ mejlel a taj a coltʌntel (Sal. 91:1, TNM; 1 P. 3:21). ¿Chuqui yom maʼ mel chaʼan maʼ wʌcʼ a bʌ ti Jehová yicʼot chaʼan maʼ chaʼlen chʼʌmjaʼ?

Ñaxan yom maʼ ñop chaʼan jiñi woli bʌ a cʌn jiñʌch i sujmlel. Mi anto maʼan bʌ maʼ wen ñop, ñumen sʌclʌben i jacʼbal (Ro. 12:2). Mi yom maʼ qʼuextan a melbal, mele chaʼan a wom a qʼuejlel ti wen ti Jehová (Pr. 27:11; Ef. 4:23, 24). Cʼajtiben i coltaya Jehová, i ñopo chaʼan mi caj i cʼʌn jiñi chʼujul bʌ i yespíritu chaʼan miʼ yʌqʼueñet a pʼʌtʌlel (1 P. 5:10, 11). Chaʼlen wersa a melben i yeʼtel Jehová come jiñʌch ñumen wem bʌ (Sal. 16:11).

CHEʼ BɅ TSAʼIX LAʼ QʼUELE JIÑI VIDEO JIÑI WENLEL CHEʼ MAʼ CHAʼLEN CHʼɅMJAʼ, JACʼɅ ILI CʼAJTIYA TAC:

¿Chuqui am bʌ i mʌctayob yambʌlob chaʼan miʼ chʼʌmob jaʼ?
¿Chuqui yom maʼ mel chaʼan maʼ pʼʌtʼesan a ñopoñel, i maʼ wʌqʼuen a bʌ Jehová?
¿Chuqui an i colta jiñi yambʌlob chaʼan miʼ chʼʌmob jaʼ?
¿Bajcheʼ miʼ yʌqʼuen Jehová i bendición jiñi muʼ bʌ i melbeñob i yeʼtel?
¿Chuqui yom i yʌl cheʼ mi la cʌqʼuen lac bʌ Jehová yicʼot cheʼ bʌ mi lac chʼʌmjaʼ?

Cheʼ miʼ yujtel jiñi discurso chaʼan chʼʌmjaʼ, jiñi woli bʌ i ñusan discurso miʼ suben jiñi muʼ bʌ i cajelob ti chʼʌmjaʼ chaʼan miʼ jacʼob ti tsʌts bʌ tʼan ili chaʼpʼejl cʼajtiya:

¿Tsaʼix baʼ cʌyʌ a mul yicʼot tsaʼix baʼ wʌcʼʌ a bʌ ti Jehová, i mucʼʌch baʼ ñop chaʼan Jesucristo jiñʌch tsaʼ bʌ i yʌcʼʌ Dios chaʼan mi lac taj laj coltʌntel?

¿Muʼ ba chʼʌmben i sujm chaʼan cheʼ bʌ maʼ chʼʌmeʼ jaʼ miʼ yʌqʼuet ti cʌjñel bajcheʼ i testigo Jehová yicʼot chaʼan ili ora ochemetix tiʼ yorganización?

Cheʼ bʌ miʼ jacʼob jiñi cʼajtiya tac jiñi muʼ bʌ i cajelob ti chʼʌmjaʼ, choncol i pʌsob tiʼ tojlel yambʌlob chaʼan añobʌch i ñopoñel tiʼ cuxtʌlel Jesús yicʼot chaʼan tsaʼix i yʌcʼʌyob i bʌ ti Jehová (Ro. 10:9, 10).