CɅNTESɅNTEL 12

Pʌsʌ cʼuxbiya yicʼot chʼʌmbeñob isujm

1 Ts. 2:7, 8

YOM BɅ MIʼ CɅJÑEL: Yom loqʼuem ti a pusicʼal chuqui maʼ wʌl yicʼot pʌsʌ chaʼan mucʼʌch a ñaʼtañob.

Ñaʼtan jiñi woli bʌ i ñʌchʼtañetob. Chaʼan maʼ chajpan a pusicʼal, wen ñaʼtan jiñi wocol tac muʼ bʌ i ñusañob i ñopo a chʼʌmben isujm bajcheʼ yubil miʼ yubiñob.
Wen yajcan jiñi a tʼan tac. Ñopo a coltañob, a ñuqʼuesʌbeñob i pusicʼal yicʼot a pʼʌtʼesañob. Mach a cʼʌn tʼan tac muʼ bʌ i mejlel i lowob yicʼot mach yomic lecoj chuqui maʼ wʌl tiʼ tojlel jiñi mach bʌ añic miʼ melbeñob i yeʼtel Jehová yicʼot tiʼ tojlel i ñopbalob.
Pʌsʌ chaʼan maʼ chʼʌmob ti ñuc. Yom uts jach maʼ chaʼlen tʼan yicʼot wen jach maʼ ñijcan a ñiʼ a wut. Ñaʼtan chuqui miʼ pʌs jaʼel bajcheʼ woli a mel a ñiʼ a wut, jujumujcʼ yom maʼ chaʼlen tseʼñal.

Chaʼlen wersa chaʼan jiñi woli bʌ a wʌl mach ñumeñic ti pʼis o xicʼbilet jach yubil. Cheʼ bʌ an chuqui woli a pejcan yomʌch maʼ chumtan, pero mach a cʌlʌx acʼ a bʌ ti qʼuejlel. Chaʼan ñumen utsʼat ti ubintel jiñi a tʼan ñopo a tamʼesan jiñi vocal tac. Mi ñumen cʼam maʼ wʌl jiñi consonante tac tucʼul jach miʼ caj ti ubintel a tʼan.