I jisʌntel Jerusalén

Jiñi tejclum Judá mach junsujtelic jach tsiʼ ñajtʼesayob i bʌ ti Jehová, i tsaʼ caji i chʼujutesañob yambʌ dios tac. Ti jiñi jabil tac, Jehová tsiʼ chocbeyob majlel xʼaltʼañob chaʼan miʼ coltañob. Pero maʼañic tsiʼ jacʼʌyob i tsaʼ jach caji i wajleñob. Jehová yom i jisan i chʼujutesʌntel jiñi diosteʼ tac. ¿Bajcheʼ mi caj i mel (chaʼlen)?

Nabucodonosor, rey bʌ ti Babilonia, tsaʼ caji i contrajin majlel jujumpʼejl tejclum chaʼan miʼ chʼʌm. Cheʼ bʌ tsiʼ ñaxan contraji Jerusalén, tsiʼ chucu jiñi rey Joaquín, i yalobilob jiñi rey, jiñi soldadojob yicʼot jiñi muʼ bʌ i cʼʌñob ti eʼtel (troñel) jiñi teʼ, i tsiʼ pʌyʌyob majlel ti Babilonia. Cheʼ bʌ tsaʼ ochi yaʼ tiʼ templo Jehová, tsiʼ chʼʌmʌ loqʼuel jiñi lets tac bʌ i tojol. Ti wiʼil, Nabucodonosor tsiʼ yʌlʌ chaʼan jiñix Sedequías miʼ yochel ti rey yaʼ ti Judá.

Ti ñaxan, jiñi rey Sedequías miʼ jacʼben i tʼan Nabucodonosor. Pero jiñi lot bʌ xʼaltʼan yicʼot jiñi yaʼ bʌ chumulob ti lʌcʼʌl tiʼ subeyob Sedequías chaʼan maʼañix miʼ jacʼben i tʼan Nabucodonosor. Jeremías tsiʼ sube Sedequías: «Mi tsaʼ cʌyʌ a jacʼben i tʼan, miʼ cajel chʌmel, wiʼñal yicʼot cʼamʌjel ti Judá».

Cheʼ bʌ ñumeñix 8 jab, jiñi rey Sedequías tsiʼ contraji Babilonia, i tsiʼ cʼajtibe i coltaya Egipto. Jin chaʼan, Nabucodonosor tsiʼ choco majlel i soldadojob chaʼan miʼ contrajiñob Jerusalén. Jiñi soldadojob tsiʼ joyoyob jiñi tejclum. Jeremías tiʼ sube Sedequías: «Jehová miʼ yʌl chaʼan miʼ tsaʼ wʌcʼʌ a bʌ tiʼ tojlel jiñi Babilonia, cuxul miʼ caj a wajñel yicʼot a piʼʌlob. Pero mi maʼañic, mi caj i pulob Jerusalén yicʼot mi caj i chuquetob majlel». Sedequías tsiʼ jacʼʌ: «¡Maʼañic mi caj cʌcʼ c bʌ!».

Cheʼ bʌ ñumeñix jumpʼejl jab yicʼot ojlil, jiñi babiloniojob tsiʼ jembeyob i murojlel Jerusalén. Tsaʼ ochiyob i tsiʼ puluyob jiñi tejclum yicʼot jiñi templo. Yonlel ti tsʌnsayob wiñicob xʼixicob (quixtañujob) yicʼot an tsaʼ bʌ chujquiyob majlel.

Sedequías tsaʼ to mejli ti loqʼuel ti Jerusalén, pero jiñi babiloniojob tsaʼ majli i yajñesañob, tsiʼ chucuyob ti tʼejl Jericó i tsiʼ pʌybeyob majlel jiñi rey Nabucodonosor. Jiñi rey tsiʼ wersa xiqʼui i qʼuel Sedequías bajcheʼ woli (choncol) ti tsʌnsʌbentel i yalobilob. Cheʼ jaʼel, tsiʼ sujtesa ti xpotsʼ i tsaʼ yotsa ti cárcel. Yaʼʌch tsaʼ chʌmi Sedequías. Pero Jehová tsiʼ yʌqʼue i tʼan jiñi tejclum Judá: «Cheʼ bʌ miʼ ñumel 70 jab, mi caj c chaʼ pʌyetla majlel ti Jerusalén».

¿Chuqui mi caj i yujtel tiʼ tojlel jiñi xcolelob tsaʼ bʌ pʌjyiyob majlel ti Babilonia? ¿Chʌn xucʼul ba mi caj i yajñelob ti Jehová?