¿Bajcheʼ miʼ mejlel ti pʼojlel laj cʼuxbiya ti Dios yicʼot ti lac piʼʌlob?

Ti ili ora, mach xicʼbiloñixla chaʼan mi lac jacʼ i Mandar Moisés, pero Jehová yom chaʼan jiñi i wiñicob miʼ chʌn jacʼob jiñi chaʼpʼejl mandar ñumen am bʌ i cʼʌjñibal, jiñʌch i cʼuxbintel Dios yicʼot lac piʼʌlob (Mt. 22:37-39). Pero jiñi laj cʼuxbiya maʼañic miʼ bajñel tilel, yom mi lac pʼojlesan. ¿Bajcheʼ? Junchajp jiñʌch cheʼ ti jujumpʼejl qʼuin mi lac pejcan jiñi Biblia. Cheʼ mi lac wen ñaʼtan muʼ bʌ lac pejcan miʼ cʼotel laj cʌn jiñi utsʼatax bʌ i melbal Jehová (Sal. 27:4). Mi cheʼ mi lac mel, mi caj lac ñaʼtan bajcheʼ Jehová yicʼot mi caj lac ñumen cʼuxbin, i jiñi miʼ ñijcañonla chaʼan mi lac chʼujbiben i mandar tac, cheʼ bajcheʼ jiñi muʼ bʌ i yʌl chaʼan yom mi laj cʼuxbin tiʼ pejtelel lac piʼʌlob (Jn. 13:34, 35; 1 Jn. 5:3). Laʼ laj qʼuel uxchajp muʼ bʌ caj i coltañonla chaʼan mi lac ñusan lac bʌ cheʼ bʌ mi lac pejcan jiñi Biblia.

• Laʼ laj qʼuel ti lac pensar yicʼot laʼ laj cʼʌn jiñi joʼchajp am bʌ lac chaʼan. Laʼ lac ñaʼtan chaʼan yaʼañonla ti jiñi woli bʌ lac pejcan. Laʼ lac ñop laj qʼuel, laʼ la cubin chuqui tac miʼ sub i bʌ yicʼot laʼ la cubiben i yujtsʼil chuqui tac jach. Laʼ lac ñaʼtan bajcheʼ yubil tsiʼ yubiyob jiñi quixtañujob.

  

• Yambʌ mejl bʌ lac mel. Miʼ mejlel lac pejcan ti cʼam bʌ tʼan o mi lac ñʌchʼtan jiñi grabación i mi laj qʼuel majlel ti lac Biblia. Yambʌ jiñʌch cheʼ mi lac pejcan ujtem bʌ tiʼ tojlel juntiquil am bʌ ti Biblia, o jumpʼejl temaj com bʌ laj cʌn i mach jiñic mi lac pejcan tiʼ pejtelel jiñi Biblia. Jumpʼejl ejemplo, chaʼan mi laj cʌn tiʼ tojlel Jesús, miʼ mejlel lac pejcan jiñi folleto Guía para el estudio de la Palabra de Dios yaʼ ti sección 4 (A, B, C, D, E, F, G, H) yicʼot 16 (A, B). Miʼ mejlel lac pejcan jaʼel jiñi capítulo baqui chucul jiñi texto chaʼan bʌ jiñi qʼuin o mi lac pejcan jujumpʼejl libro am bʌ ti Biblia cheʼ bajcheʼ tsaʼ tsʼijbunti tilel.

  

• Laʼ lac chʼʌmben isujm muʼ bʌ lac pejcan. An i tajol la com lac pejcan cabʌl capítulo, pero ñumen wen cheʼ jumpʼejl jach chaʼan mi lac chʼʌmben isujm yicʼot mi lac wen ñaʼtan. Laʼ lac ñaʼtan chuqui tac ujtem, laʼ lac wen tsajin tiʼ pejtelel muʼ bʌ i yʌjlel i laʼ laj cʼʌn jiñi mapa tac yicʼot jiñi yambʌ versículo tac am bʌ bajcheʼ i referenciajlel jumpʼejl versículo. Mi an maʼañic bʌ mi lac ñaʼtan, laʼ lac sʌclʌben i sujmlel. Mi mucʼʌch i mejlel, cheʼ bajcheʼ jalel mi lac pejcan jun cheʼ jalel yom mi lac wen ñaʼtan jaʼel.