¿Chucoch mach weñic i chaʼan tac bʌ xiba?

¿Chuqui maʼ wʌl?

• ¿Wem ba chaʼan mi lac pejcan jiñi horóscopo, jiñi yujiloʼ bʌ i qʼuel talto bʌ qʼuin o yan tac bʌ lajal bʌ bajcheʼ jiñi?

• Pejtelel chuqui miʼ yʌjlel chaʼan jiñi xiba tac ¿cojach ba miʼ taj ti tʼan bajcheʼ miʼ contrajin chuqui wen bʌ yicʼot jiñi jontolil o an yambʌ i wocolel?

Ila mi caj i tsictesʌntel chucoch jiñi quixtañujob miʼ wen mulañob i chaʼan tac bʌ xiba i chucoch yom tsajilet.

• ¿Chucoch miʼ wen mulʌntel?

• ¿Chucoch yom tsajilet?

• ¿Chuqui miʼ mejlel a mel?

• Muʼ bʌ i yʌl yambʌ xcolelob

¿Chucoch miʼ wen mulʌntel?

Muʼ bʌ i ñumen pʌstʌl yaʼ ti jiñi ñusaqʼuin tac jiñʌch i chaʼan tac bʌ xiba. Miʼ tilel ti película, ti televisión, ti videojuego yicʼot ti libro tac. Jin chaʼan, cabʌl xcolelob miʼ wen mulañob i chaʼan bʌ astrología, xibajob, vampiro yicʼot xwujtob. ¿Chucoch miʼ wen mulʌntel?

• Come miʼ mulañob i ñaʼtan mi tiʼ sujm an baqui chumul jiñi espíritujob.

• Come miʼ cʼojotañob chuqui miʼ caj ti ujtel ti talto bʌ qʼuin.

• Come yomob i pejcan jiñi tsaʼix bʌ chʼʌmiyob.

Pero mach yomic i yʌl chaʼan mach weñic cheʼ la com lac ñaʼtan iliyi. Jumpʼejl ejemplo, i tilelʌch cheʼ mi laj cʼajtiben lac bʌ chuqui mi caj ti yujtel tiʼ tojlel juntiquil ti lac familia o juntiquil la camigo tsaʼ bʌ chʌmi. Pero jiñi i chaʼan tac bʌ xibajob añʌch i wocolel.

¿Chucoch yom tsajilet?

Yaʼ ti Biblia mi lac taj baqui miʼ subeñonla chaʼan yom mi laj cʌntan lac bʌ ti tojlel i chaʼan tac bʌ xibajob. Jumpʼejl ejemplo, miʼ yʌl:

«Mach yomic miʼ yajñel ti laʼ tojlel [...] mi xticʼlaya mi xwujt mi jini muʼ bʌ i wʌn ñaʼtan chuqui mi caj i yujtel, mi jini muʼ bʌ i yʌcʼ i bʌ tiʼ wenta ecʼ, mi xpejca cruz mi jini muʼ bʌ i yʌcʼ i bʌ tiʼ wenta xiba chaʼan miʼ sub i tʼan yicʼot chaʼan miʼ mel ñuc tac bʌ i yeʼtel, mi jini yujil bʌ i pejcʌntel chʼujlelʌl. Come tsʼaʼlebil ti lac Yum pejtel muʼ bʌ i melob cheʼ bajcheʼ jini» (Deuteronomio 18:10-12).

¿Chucoch miʼ tsʼaʼlen jiñi Biblia i chaʼan tac bʌ xibajob?

• Pejtelel i chaʼan bʌ xibajob miʼ yʌcʼonla tiʼ tojlelob, lajal bajcheʼ woli laj coltañob. Jiñi Biblia miʼ pʌs chaʼan lamital ángelob tsaʼ sujtiyob tiʼ contra Dios (Génesis 6:2; Judas 6). Chaʼan miʼ lotin quixtañujob, ili jontol bʌ ángelob miʼ cʼʌñob jiñi yujiloʼ bʌ i qʼuel jiñi talto bʌ qʼuin, jiñi astrología, o muʼ bʌ i yʌlob chaʼan miʼ pejcañob jiñi tsaʼix bʌ chʌmiyob. Pero pejtelel ili miʼ sujtesañonla tiʼ contra Dios.

• I chaʼan tac bʌ xiba miʼ yʌqʼueñonla lac ñop chaʼan añʌch muʼ bʌ i mejlel i ñaʼtañob jiñi talto bʌ qʼuin. Pero cojach Dios miʼ mejlel i «wʌn sub i yujtibal jini woli bʌ ti tejchel» yicʼot ‹miʼ wʌn tsictesan jini maxto bʌ anic woli ti ujtel› (Isaías 46:10; Santiago 4:13, 14).

• I chaʼan tac bʌ xiba miʼ yʌqʼueñonla lac ñop chaʼan jiñi tsaʼix bʌ chʌmiyob muʼto i mejlel i pejcan jiñi cuxulobto. Pero jiñi Biblia miʼ yʌl chaʼan ‹maʼanix chuqui yujilob jini chʌmeñobix bʌ, [...] come maʼanix e’tel baqui mi lac majlel› (Eclesiastés 9:5, 10).

Jin chaʼan, jiñi i testigojob Jehová maʼañic miʼ melob pejtelel chuqui ochem ti chaʼan bʌ xibajob. Maʼañic miʼ yajcañob ñusaqʼuin tac baqui miʼ tilel zombijob, vampiro o yan tac bʌ leco jax bʌ. Juntiquil xchʼoc i cʼabaʼ María miʼ yʌl: «Maʼañic mij qʼuel mi yaʼ ochem i chaʼan tac bʌ xibajob».a

¿Chuqui miʼ mejlel a mel?

• Mach a yajcan ñusaqʼuin tac ochem bʌ tiʼ chaʼan tac bʌ xiba, bajcheʼ jiñi sʌc miʼ caj i yajñel a conciencia tiʼ tojlel Jehová (Hechos 24:16).

• Jisan pejtelel chuqui an a chaʼan ochem bʌ tiʼ chaʼan xibajob. Pejcan Hechos 19:19, 20 i qʼuele chuqui tsiʼ meleyob jiñi xñoptʼañob ti ñaxam bʌ siglo.

Cʼajtesan: Mi maʼañic maʼ mel pejtelel chuqui ochem tiʼ chaʼan bʌ xibajob, woli a wʌcʼ a bʌ tiʼ tojlel Jehová i mi caj a tijicñesʌben i pusicʼal (Proverbios 27:11).