Jumpʼejl wen jach bʌ tʼan tiʼ tojlelob jontolob bʌ pastorob

Artur, juntiquil superintendente ti Armenia, woliʼ julaʼtan jumpʼejl congregación i chaʼan i testigojob Jehová. Tsaʼ cʼoti i yubin chaʼan maʼañic mi chaʼleñob subtʼan baqui miʼ ñumel cabʌl lac piʼʌlob, baqui miʼ cʼʌjñel jiñi carrito. Chaʼan miʼ coltañob, Artur yicʼot i yijñam, Ana, yicʼot yambʌ Testigo i cʼabaʼ Yiraír tsiʼ yʌcʼʌyon jiñi carrito ti jumpʼejl alʌ tejclum. Tsiʼ yajcayob baqui miʼ wen ñumel jiñi quixtañujob.

Cabʌl quixtañu muʼ bʌ i ñumelob yaʼi tsaʼ i mulañob jiñi jun i tsaʼ caji i chʼʌmob majlel. Pero ili tsijib subtʼan maʼañic tsiʼ mulayob jiñi i contrajob.Chaʼtiquil pastor tsiʼ lʌcʼtesayob i bʌ, juntiquil tsiʼ lʌp tʼuchta jiñi carrito.Ti wiʼil tsaʼ i jatsʼbe i choj Artur, i ñajt tsaʼ cʼoti i lente. Artur, Ana yicʼot Yiraír tsiʼ ñopo i ñʌjchʼesañob, pero maʼañic tsaʼ mejliyob. Jiñi pastorob tsiʼ tʼuchtayob jiñi carrito i pam pucul tsaʼ majli jiñi jun tac. Cheʼ bʌ tsaʼ ujti i pʼaj yicʼot i chʼʌcob jiñi testigojob, jiñi pastorob tsaʼ majliyob.

Artur, Ana yicʼot Yiraír tsaʼ majliyob ti policía. Tiʼ subuyob tsaʼ bʌ ujti i tiʼ tsʼitaʼ chaʼleyob tʼan chaʼan bʌ jiñi Biblia yicʼot jiñi policía. Ti wiʼil tsaʼ pʌjyiyob majlel baʼan i yum policía come yom i ñaʼtan bajcheʼ tsaʼ ujti. Cheʼ tsiʼ yubi chaʼan Artur, juntiquil pʼʌtʌl bʌ wiñic, maʼañic tsiʼ qʼuexta cheʼ bʌ tsaʼ jajtsʼi, i yum policía tsiʼ cʌyʌ i cʼajtin chaʼan jiñi tsaʼ bʌ ujti i tsaʼ bʌ caji i cʼajtin jiñʌch chaʼan i ñopbal jiñi Testigojob. Cheʼ añix 4 hora i chaʼleñob tʼan, jiñi policía toj sajtel i pusicʼal tsiʼ yʌlʌ: «¡Wen utsʼat bʌ ñopbalʌl, com sujtel bajcheʼ jatetla!».

Ti yijcʼʌlal, Artur tsaʼ chaʼ majli ti subtʼan yicʼot jiñi carrito. Tsiʼ lʌcʼtesa i bʌ juntiquil wiñic tsaʼ bʌ i qʼuele chuqui tsaʼ ujti i ti sube utsʼat bʌ tʼan chaʼan ñʌchʼʌl tsaʼ ajñi i maʼañic tsiʼ chaʼle leto yicʼot jiñi pastorob. Tsiʼ yʌlʌ chaʼan ti caj tsaʼ bʌ ujti mach utsʼatix miʼ qʼuel jiñi pastorob.

Ti jin jach bʌ acʼʌlel, i yum policía tsiʼ pejca jiñi Artur chaʼan miʼ chaʼ majlel yaʼ baqui añob jiñi policía. Tsaʼ cajiyob ti tʼan chaʼan bʌ Biblia i mach jiñix chaʼan tsaʼ bʌ ujti. Cheʼ jaʼel yaʼañob yambʌ chaʼtiquil policíajob.

Ti yijcʼʌlal, Artur tsiʼ chaʼ julaʼta i yum policía chaʼan miʼ pʌsben jiñi video chaʼan bʌ Biblia i tsiʼ pʌyʌ yambʌ i piʼʌlob chaʼan miʼ qʼuelob jiñi video.

Cabʌl policíajob tsiʼ ñʌchʼtayob ti cojaxto bʌ jiñi wen tʼan chaʼan bʌ Biblia i utsʼat tsiʼ qʼueleyob jiñi i testigojob Jehová tiʼ caj jiñi mach bʌ utsʼatic i melbalob jiñi pastorob.