I cʌntesa jiñi añobix bʌ i jabilel

¿MAJQUI YOM MIʼ CɅNTESAN A WALOBIL?

Jiñi añobix bʌ i jabilel yom miʼ cʌntesañob yicʼot miʼ ticʼob jaʼel jiñi alobob, pero ñumen añoʼ bʌ tiʼ wenta jiñʌch jiñi tatʌlob. Pero jiñi yambʌ añobix bʌ i jabilel miʼ mejlel i coltan a walobil jaʼel.

¿CHUCOCH ÑUC I CʼɅJÑIBAL?

An tac tejclum baqui jiñi xcolelob maʼañic miʼ wen ñochtañob añobix bʌ i jabilel. Ñaʼtancu iliyi:

• Jiñi alobob miʼ wen ñusañob qʼuin ti escuela i yaʼi mach cabʌlobic maestrojob o añobix bʌ i jabilel, ñumen añob jach xqʼueljun.

• Cheʼ miʼ cʼotelob tiʼ yotot maʼañic majqui an come jiñi i tatob añob tiʼ yeʼtel (troñel).

• Jumpʼejl estudio tsaʼ bʌ mejli ti Estados Unidos tsiʼ yʌlʌ chaʼan jiñi xbiʼtalob añoʼ bʌ 8 cʼʌlʌl ti 12 i jabilel miʼ ñusañob 6 ora tiʼ cʼʌñol celular o tableta ti jumpʼejl qʼuin.a

Jiñi libro Hold On to Your Kids (Mach a cʌy a walobil), miʼ yʌl: «Jiñi xcolelob maʼañix miʼ lajiñob i tat, i maestrojob o jiñi añobix bʌ i jabilel. Cheʼ jaʼel maʼañix miʼ cʼajtibeñob i ticʼojel. Ti ili ora miʼ sʌclañob i coltʌntel [...] ti yambʌ xcolelob lajaloʼ bʌ i jabilel yicʼotob».

¿BAJCHEʼ MIʼ MEJLEL A CɅNTESAÑOB?

Ajñen a wicʼot a walobilob

PRINCIPIO AM BɅ TI BIBLIA: «Cʌntesan alʌlob ti jini bij yom bʌ miʼ xʌñob majlel. Cheʼ ñoxobix maʼanic mi caj i cʌyob» (Proverbios 22:6).

I tilelʌch cheʼ bʌ jiñi alobob miʼ sajcañob i cʌntesa i tatob. Jiñi wen yujiloʼ bʌ miʼ yʌlob chaʼan cheʼ bʌ wolix i tajob majlel i colel jiñi xbiʼtalob, miʼ ñumen qʼuelob ti ñuc i ticʼojel i tat i mach jiñic tilem bʌ tiʼ yamigojob. Jiñi libro You and Your Adolescent (Jiñi xcolel yicʼot i tat) tsaʼ bʌ i tsʼijbu jiñi maestro i chaʼan bʌ Psicología Laurence Steinberg, tsiʼ yʌlʌ chaʼan «jiñi tatʌlob jiñʌch muʼ bʌ i ñumen coltañob tiʼ cuxtʌlel yicʼot tiʼ melbal (chaʼleya) jiñi i yalobilob cheʼ bʌ xcolelobto yicʼot cheʼ bʌ bej añobix i jabilel». Jiñi libro miʼ chaʼ al: «Jiñi a walobil miʼ qʼuel ti ñuc chuqui maʼ wʌl anquese tajol maʼañic miʼ jacʼ yicʼot miʼ mulan i ñʌchʼtan anquese mach lajalic miʼ ñaʼtan bajcheʼ jatet».

Jiñi a walobil miʼ qʼuelet ti ñuc, jin chaʼan locʼsʌben i wenlel cheʼ yaʼan a wicʼot. Suben bajcheʼ yubil maʼ wubin, chuqui muʼ bʌ a qʼuel ti ñuc yicʼot chuqui ñusʌbil a chaʼan.

Cʼajtiben i coltaya jiñi añobix bʌ i jabilel

PRINCIPIO AM BɅ TI BIBLIA: «Jini muʼ bʌ i piʼleñob majlel jini weñoʼ bʌ i pusicʼal mucʼʌch i tajob i ñaʼtʌbal» (Proverbios 13:20).

¿Am baʼ añobix bʌ i jabilel muʼ bʌ mejlel i pʌsben wem bʌ i melbal jiñi xcolelto bʌ a walobil? ¿Am ba chuqui miʼ mejlel a mel chaʼan miʼ yajñel yicʼot a walobil? Pero iliyi mach yomic i yʌl chaʼan maʼañix mi caj a chʼʌm ti a wenta a walobil. Cheʼ bʌ an juntiquil wem bʌ i melbal yicʼot mach bʌ i ticʼlayic a walobil, miʼ coltañet chaʼan maʼ cʌntesan a walobil. Jiñi Biblia miʼ yʌl chaʼan juntiquil xcolel i cʼabaʼ Timoteo tsiʼ taja i wenlel cheʼ bʌ tsaʼ ajñi yicʼot jiñi apóstol Pablo cʼʌlʌl cheʼ bʌ tsaʼix i taja i jabilel. Cheʼ jaʼel, Pablo tsiʼ tajbe i wenlel cheʼ bʌ tsaʼ ajñi yicʼot Timoteo (Filipenses 2:20, 22).

Ti ili ora, an tac familia mach bʌ temelix chumulob come jiñi i tatuchob yicʼot yambʌ i piʼʌlob chumulobix ti yan tac bʌ tejclum. Mi cheʼ woliʼ yujtel a familia bajcheʼ ili, acʼʌ chaʼan jiñi a walobilob miʼ cʌñob yicʼot miʼ lajibeñob wen tac bʌ i melbal jiñi añobix bʌ i jabilel.