JIÑI MAR

Jiñi mar an ti wocol

Jiñi cʌmbil bʌ bajcheʼ arrecifes de coral, jiñi chʌy tac yicʼot yan tac bʌ cuxul bʌ yaʼ ti mar miʼ mejlel ti jilel tiʼ caj ñoj qʼuexelix jiñi clima. Cabʌl cuxul tac bʌ yaʼ ti mar i cʼʌjñibal i chaʼan jiñi arrecife tac. Pero jiñi científicojob miʼ yʌlob chaʼan pejtelel ili arrecife miʼ mejlel ti jilel ti jiñi 30 jab talto bʌ.

Jiñi expertojob miʼ yʌlob chaʼan yonlel añimal am bʌ ti mar miʼ chʌmel ti jujumpʼejl jab tiʼ caj jiñi plástico tac. I lʌcʼʌ tiʼ pejtelel jiñi añimal tac yaʼ bʌ miʼ taj i bucʼbal yaʼ ti mar an i cʼuxu plástico.

Ti 2022, António Guterres, secretario general chaʼan jiñi Naciones Unidas, tsiʼ yʌlʌ: «Maʼañic mi lac wen qʼuel ti ñuc jiñi mar, pero wʌle woli lac taj jumpʼejl ñuc bʌ wocol».

Jiñi Lum tsaʼ mejli chaʼan mi lac mejlel ti chumtʌl

Jiñi mar yicʼot pejtelel chuqui cuxul bʌ yaʼi melbil chaʼan miʼ mejlel i bajñel sʌqʼuesan i bʌ yicʼot chaʼan maʼañic chuqui miʼ chaʼlen, pero joñonla jaʼel mach yomic mi lac choc ochel basura. Jiñi libro Regeneration: Ending the Climate Crisis in One Generation miʼ yʌl chaʼan cheʼ bʌ mucʼʌch lac chaʼlen wersa chaʼan maʼañic mi lac bibʼesan jiñi mar miʼ mejlel i bajñel sʌqʼuesan i bʌ tiʼ pejtelel ora. Laʼ laj qʼuel chaʼpʼej uxpʼejl ejemplo:

• Jiñi mar an i yalʌ chʌñil tac cʌmbil bʌ bajcheʼ fitoplancton. Iliyi miʼ tsʼuʼ yicʼot miʼ tempan jiñi dióxido de carbono, jiñi gas muʼ bʌ i ñumen pʼol jiñi calentamiento global. Jiñi fitoplancton lʌcʼʌ cheʼ cʼamel miʼ mejlel i tsʼuʼ dióxido de carbono cheʼ bajcheʼ miʼ mel jiñi teʼ tac.

• An bacteria tac muʼ bʌ i cʼux jiñi chʌmeñix bʌ chʌy tac, cheʼ bajcheʼ jiñi maʼañic miʼ bibʼan jiñi mar. Cheʼ jiñi, yambʌ añimal tac am bʌ yaʼ ti mar miʼ cʼux jiñi bacteria. Jiñi página chaʼan internet Smithsonian Institution miʼ yʌl chaʼan cheʼ bajcheʼ iliyi sʌc miʼ yajñel jiñi mar.

• Cheʼ bʌ jiñi chʌy miʼ chaʼ choc loqʼuel jiñi i bucʼbal an chuqui an i chaʼan muʼ bʌ i coltan chaʼan jiñi jaʼ am bʌ ti mar miʼ chaʼ tojʼan, i cheʼ bajcheʼ jiñi maʼañic chuqui miʼ chaʼlen jiñi coral, chʌy yicʼot yan tac bʌ am bʌ yaʼ ti mar.

An woli bʌ i qʼuelob chuqui tac yom miʼ mejlel

Machic miʼ chojquel basura yaʼ ti mar, mach cʼʌñʌlic miʼ sʌqʼuesʌntel. Jin chaʼan, jiñi especialista miʼ yʌlob chaʼan yom mi laj cʼʌn bolsa tac yicʼot plástico o yan tac bʌ muʼ bʌ i mejlel lac chaʼ cʼʌn.

Pero mach jasʌlic jiñi. Maxto wen jali, jumpʼejl organización ti jumpʼejl jach jab tsiʼ tempa 8 mil 300 tonelada basura ti playa tac am bʌ ti 112 país. Tiʼ sujm, iliyi mach ya oñic come cʌlʌxix basura miʼ tempʌyel ti mar ti jujumpʼejl jab.

Cheʼ bʌ jiñi revista National Geographic tsiʼ taja ti tʼan jiñi mar, tsiʼ yʌlʌ chaʼan cheʼ bʌ asiyemix jiñi jaʼ am bʌ yaʼ ti mar maʼañix miʼ mejlel ti chaʼ sʌqʼuesʌntel. Tsiʼ yʌlʌ jaʼel chaʼan jiñi añimal tac am bʌ yaʼ ti mar maʼañix miʼ mejlel i sʌqʼuesan jiñi jaʼ come jiñi lac piʼʌlob cʌlʌxix miʼ cʼʌñob petróleo, gas o yan tac bʌ cheʼ bʌ bajcheʼ jiñi.

Mucʼʌch caj i tojʼan jiñi wocol.¿Chuqui miʼ yʌl jiñi Biblia?

«Tiʼ pejtelel pañimil tsiquil jini wen tac bʌ tsaʼ bʌ a melbeyon lojon. An colem ñajb cabʌl bʌ i ñajtlel. Mach mejlic ti tsijquel i chʌñil tac. Cabʌl i chʌñil, biqʼuit bʌ yicʼot colem bʌ» (Salmo 104:24, 25).

Jehová tsiʼ mele jiñi mar yicʼot chuqui tac i cʼʌjñibal bʌ chaʼan miʼ mejlel i bajñel sʌqʼuesan i bʌ. Ñaʼtancu iliyi, mi Jehová wen i cʌñʌ jiñi mar yicʼot pejtelel am bʌ yaʼi, miʼ mejlel lac ñop chaʼan yujilʌch chuqui miʼ mejlel i mel chaʼan miʼ chaʼ luʼ tojʼesan. Qʼuele jiñi tema «Dios miʼ yʌl chaʼan mi caj i chaʼ tojʼan ili Lum», am bʌ ti página 15 ti ili revista.